ކުޓީނިއޯ ބޭނުންވަނީ ޕްރިމިއާ ލީގަށް ބަދަލުވާން: އޭޖެންޓް

ބްރެޒިލްގެ ތަރި ފިލިއްޕޭ ކުޓީނިއޯ ބޭނުންވަނީ އިނގިރޭސި ޕްރިމިއާ ލީގަށް ބަދަލުވާން ކަމަށް އޭނާގެ އޭޖެންޓް ބުނެފި އެވެ.

އުމުރުން 27 އަހަރުގެ ކުޓީނިއޯ ބަޔާނަށް ކުޅެމުން އަންނަނީ ބާސެލޯނާގެ ލޯނު އެއްބަސްވުމެއްގެ ދަށުންނެވެ. މި ސީޒަން ނިމުމުން ބަޔާންގެ ލޯނު އެއްބަސްވުން ހަމަވާއިރު، ބަޔާނުން ބޭނުންވެއްޖެނަމަ ކުޓީނިއޯ ދާއިމީކޮށް 110 މިލިއަން ޕައުންޑަށް ގަނެވޭ ގޮތަށް އެއްބަސްވުމުގައި ވަނީ ހިމަނާފަ އެވެ. އެކަމަކު ބަޔާނުން ވަނީ ކުޓީނިއޯ ނުގަންނަން ނިންމާފައެވެ.

ރިޕޯޓުތައް ބުނާ ގޮތުން ލޯނު އެއްބަސްވުން ހަމަވުމުން، އަންނަ ސީޒަނުގައި ކުޓީނިއޯ ބާސާ އަށް އަލުން ބަދަލުވާނެއެވެ. އެކަމަކު ބާސާ އިން އޭނާ ވިއްކާލާނެ ކަމަށް ބެލެވޭއިރު، އާސެނަލާއި މެންޗެސްޓާ ޔުނައިޓެޑް އަދި ޗެލްސީން އަންނަނީ ކުޓީނިއޯ ގަތުމަށް މަސައްކަތް ކުރަމުންނެވެ.

ކުޓީނިއޯގެ އޭޖެންޓް ބުނީ އޭނާ މިހާރު ބޭނުންވަނީ ޕްރިމިއާ ލީގަށް އަލުން ބަދަލުވުމަށް ކަމަށެވެ. އެކަމަކު އޭނާ ޕްރިމިއާ ލީގަށް އަލުން ބަދަލުވާނެ ވަކި އަހަރެއް ބުނަން ނޭނގޭ ކަމަށާއި، މި ދަނޑިވަޅުގައި އެއްވެސް ކަމަކާ މަޝްވަރާ ކޮށްފައި ނުވާނެ ކަމަށް ވަނީ ބުނެފައެވެ.

ބާސާ އިން ކުޓީނިއޯ ވިއްކާލާނެ ކަމަށް ބެލެވުނު ނަމަވެސް، މީގެ ކުރިން ބާސާގެ ކޯޗު ކިކޭ ސެޓިއެން ވަނީ ކުޓީނިއޯ އަންނަ ސީޒަނުގައި ބާސާގައި މަޑުކުރާނެ ކަމުގެ އުންމީދު އެބައޮތް ކަމަށް ބުނެފައެވެ.

2018 ވަނަ އަހަރުގެ ޖެނުއަރީ މަހު ޕްރިމިއާ ލީގު ދޫކޮށް 142 މިލިއަން ޕައުންޑަށް ބާސާއަށް ބަދަލުވި ކުޓީނިއޯ އަށް އެ ކްލަބުގައި އެންމެ އެދެވޭ ކުޅުން ދެއްކިފައެއް ނުވެ އެވެ. އެގޮތުން ކުޓީނިއޯ ބާސެލޯނާގައި ކުޅުނު 76 މެޗުގައި ޖެހިފައިވަނީ 21 ލަނޑެވެ.

އޭގެ ފަހުން މިދިޔަ ސީޒަނުގައި ލޯނު އެއްބަސްވުމެއްގެ ބަޔާނަށް ބަދަލުވި ކުޓީނިއޯއަށް މިހާތަނަށް އެޓީމަށް ކުޅެދިން 32 މެޗުގައި ކާމިޔާބުކރެވިފައިވަނީ އެންމެ 9 ލަނޑެވެ.