"ފްރެންޗު ލީގު ކެންސަލް ކުރީ މާ އަވަހަށް"
ފްރެންޗު ލީގު ކެންސަލްކޮށް، ޕީއެސްޖީ އަށް ވަނީ ޗެމްޕިއަންކަން ދީފައި
ފްރެންޗު ލީގުގައި ޕީއެސްޖީ އާއި ލިޔޯން ބައްދަލުކުރި މެޗުގެ ތެރެއިން: ލީގު ޗެމްޕިއަންކަން ޕީއެސްޖީ އަށް ވަނީ ދީފައި | ގެޓީ އިމޭޖަސް
ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ފްރެންޗު ލީގު ކެންސަލް ކުރީ މާ އަވަހަށް ކަމަށް ފްރާންސްގެ ކުރީގެ ކުޅިވަރާ ބެހޭ ވަޒީރު ޕެޓްރިކް ކެނާ ވިދާޅުވެއްޖެ އެވެ.
ސެޕްޓެންބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާއެކު ފްރެންޗު ލީގު ކެންސަލް ކުރީ މިދިޔަ އޭޕްރީލް މަހުގެ 30 ވަނަ ދުވަހު އެވެ.
ފްރެންޗު ލީގު ކެންސަލް ކޮށް، ޕީއެސްޖީ އަށް ވަނީ ޗެމްޕިއަންކަން ދީފައެވެ. ފްރެންޗު ލީގަކީ ޔޫރަޕުގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ. މީގެ ކުރިން ޖަރުމަން ލީގުގެ ކުޅުން ފަށާފައި ވާއިރު، މި މަހުގެ ތެރޭގައި އިނގިރޭސި ޕްރިމިއަރ ލީގާއި ސްޕެނިޝް ލީގުގެ އިތުރުން އިޓާލިއަން ލީގު އަލުން ފެށުމަށް ވަނީ ތާވަލުކޮށްފަ އެވެ.
2014ން 2017ށް ފްރާންސްގެ ކުޅިވަރާ ބެހޭ ވަޒީރުކަން ފުރުއްވި ޕެޓްރިކް ކެނާ ވިދާޅުވީ ފްރެންޗު ލީގު ކެންސަލް ކުރަން އެ ގައުމުގެ ފުޓްބޯޅަ ފެޑެރޭޝަނުން ނިންމީ މާ އަވަހަށް ކަމަށެވެ. އެގޮތުން އެހެން ގައުމުތައް ނަމޫނާ އަކަށް ބަލައިގެން ފްރާންސްގައި ވެސް ސަޕޯޓަރުން ނުވައްދައި ލީގު ކުޅެވޭނެ އިންތިޒާމުތައް ހަމަޖެއްސޭނެ ކަމަށް ވިދާޅުވެފައި ވެއެވެ.
ފްރެންޗު ލީގު ކެންސަލް ކުރީ އަންނަ ސީޒަނުގެ ޔޫރަޕް މުބާރާތްތަކަށް ކޮލިފައިވާ ޓީމުތައް ކަނަޑައެޅުމަށް ފަހު އެވެ. އެގޮތުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވީ އެއްވަނައިގައި އޮތް ޕީއެސްޖީ އާއި ދެވަނައިގައި އޮތް މާސޭ އަދި ތިންވަނައިގައި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވީ ހަތަރުވަނައިގައި އޮތް ލިލް އާއި ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސް އެވެ. އެހެންކަމުން މިއީ 1997 ވަނަ އަހަރަށް ފަހު ޔޫރަޕުގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ.
މީގެ އިތުރުން ލީގު ކެންސަލް ކުރުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ.
އެއާއެކު ލިޔޯން، އަމިއެންސް އަދި ޓުލޫސް އިން ކޯޓަށް މައްސަލަ ހުށަހެޅި ނަމަވެސް، ކޯޓުން އެ މައްސަލަ ބަލައިގަނެފައެއް ނުވެއެވެ. އެހެންކަމުން ލިޔޯނުގެ ރައީސް ޖިއަން-މިކޭލް އައުލަސް ވަނީ ފްރާންސް ސަރުކާރުގެ އެންގުމަށް ލީގު ކެންސަލްކޮށްފައި ވާތީ އަލުން ލީގު ފަށަން ސަރުކާރުން އިސްނެގުމަށް އެދިފަ އެވެ.
