ކޮރޯނާވައިރަސް ޖެހިގެން ބޮލީވިއާގެ ފުޓްބޯޅަ ކުޅުންތެރިޔާ ގުޒްމަން މަރުވެއްޖެ

ކޮރޯނާވައިރަސް (ކޮވިޑް-19) ޖެހިގެން ބޮލީވިއާގެ ޒުވާން ފުޓްބޯޅަ ކުޅުންތެރިޔެއް ކަމަށްވާ ޑެއިބާޓް ފްރާންސް ރޯމަން ގުޒްމަން މަރުވެއްޖެ އެވެ.

ބޮލީވިއާގެ ދެވަނަ ޑިވިޝަނުގައި ވާދަކުރަމުން އަންނަ ޔުނިވާސިޓީ އޮފް ޓްރިނިޑާޑްގެ ކުޅުންތެރިޔާ މަރުވީ މިދިޔަ ހަފުތާގެ ތެރޭގައެވެ. އުމުރުން 25 އަހަރުގައި ގުޒްމަން މަރުވިއިރު، ކޮވިޑް-19 ޖެހިގެން އޭނާ އަށް ފަރުވާ ދެމުން އަންނަތާ ދުވަސްކޮޅެއް ވަނީ ވެފައެވެ.

ގުޒްމަން އަކީ ކޮވިޑް-19 ޖެހިގެން ބޮލީވިއާ އިން މަރުވި ފުރަތަމަ ފުޓްބޯޅަ ކުޅުންތެރިޔާ އެވެ. ގުޒްމަންގެ މަރުވުމުގެ ކުރިން އޭނާގެ ބައްޕަ ވެސް ވަނީ ކޮވިޑް-19 ޖެހިގެން މަރުވެފައެވެ. ގުޒްމަންގެ ބައްޕަ އަކީ އޭނާ ކުޅެމުން އައި ޔުނިވާސިޓީ އޮފް ޓްރިނިޑާޑް ޓީމުގެ ކުރީގެ ރައީސް އެވެ. އަދި ކޮވިޑް-19 ޖެހިގެން ގުޒްމަންގެ ބޮޑު ބޭބެއެއް ވެސް ވަނީ މަރުވެފައެވެ.

ބޮލީވިއަން ފުޓްބޯލް ފެޑެރޭޝަނުގެ ރައީސް އެންހެލް ސުއަރޭޒް ވިދާޅުވީ ގުޒްމަން އާއި އޭނާގެ އާއިލާ މެމްބަރުން ކޮވިޑް-19 ޖެހިގެން މަރުވުމަކީ އެ ގައުމުގެ ފުޓްބޯޅަ އަށް ލިބުނު ބޮޑު ހިތާމައެއް ކަމަށެވެ.

ކޮވިޑް-19 އާ ގުޅިގެން ބޮލީވިއާގެ ފުޓްބޯޅަ ކުޅުންތެރިއެއް މަރުވިއިރު، އެ ގައުމުން މިހާތަނަށް 8،300 ށްވުރެ ގިނަ މީހުން ވަނީ މި ވައިރަހަށް ޕޮޒިޓިވް ވެފައެވެ. އަދި މި ވައިރަސް ޖެހިގެން އެ ގައުމުން މިހާތަނަށް 293 މީހަކު ވަނީ މަރުވެފައެވެ.