ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ފްރެންޗު ލީގު ކެންސަލް ކުރަން ނިންމި ނިންމުން ބަދަލުކޮށް، އަލުން ލީގު ފަށަން ހުއްދަ ދިނުމަށް އެދި ލިޔޯނުން ފްރާންސްގެ ސަރުކާރުގައި އެދިއްޖެ އެވެ.

ސެޕްޓެންބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާ އެކު ފްރެންޗު ލީގު ކެންސަލް ކުރީ މިދިޔަ އޭޕްރީލް މަހުގެ 30 ވަނަ ދުވަހު އެވެ.

ފްރެންޗު ލީގު ކެންސަލް ކޮށް، ޕީއެސްޖީ އަށް ޗެމްޕިއަންކަން ދިންއިރު، ލީގު ކެންސަލް ކުރީ އަންނަ ސީޒަނުގެ ޔޫރަޕް މުބާރާތްތަކަށް ކޮލިފައިވާ ޓީމުތައް ކަނަޑައެޅުމަށް ފަހު އެވެ. އެގޮތުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވީ އެއްވަނައިގައި އޮތް ޕީއެސްޖީ އާއި ދެވަނައިގައި އޮތް މާސޭ އަދި ތިންވަނައިގައި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވީ ހަތަރުވަނައިގައި އޮތް ލިލް އާއި ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސް އެވެ. އެހެންކަމުން މިއީ 1997 ވަނަ އަހަރަށް ފަހު ޔޫރަޕްގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ.

މީގެ އިތުރުން ލީގު ކެންސަލް ކުރުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ.

އެއާއެކު ލިޔޯން، އަމިއެންސް އަދި ޓުލޫސް އިން ކޯޓަށް މައްސަލަ ހުށަހެޅި ނަމަވެސް، ކޯޓުން އެއް މައްސަލަ ބަލައިގެންފައެއް ނުވެއެވެ. އެހެންކަމުން ލިޔޯނުގެ ރައީސް ޖިއަން-މިކޭލް އައުލަސް ވަނީ ފްރާންސް ސަރުކާރުގެ އެންގުމަށް ލީގު ކެންސަލްކޮށްފައި ވާތީ އަލުން ލީގު ފަށަން ސަރުކާރުން އިސްނެގުމަށް އެދިފަ އެވެ.

ލީގު ފެށުމާ ބެހޭގޮތުން އައުލަސް ފްރާންސްގެ ބޮޑުވަޒީރާއި ކުޅިވަރާ ބެހޭ ވަޒީރަށް ސިޓީއެއް ފޮނުވިއިރު، އޭނާ ވިދާޅުވީ ޖޫން މަހުގެ ދެވަނަ ދުވަހު ފްރާންސްގައި ވެސް އަލުން ފުޓުބޯޅައިގެ ދޮރުތައް ހުޅުވަން ޖެހޭ ކަމަށެވެ. އަދި ޔޫރަޕުގެ އެހެން ގައުމުތަކެކޭ އެއްގޮތަށް ފްރާންސްގައި މެޗުތައް ނުކުޅެވެންވީ ސަބަބެއް ނެތް ކަމަށާއި ސިއްހީ މާހިރުން ކަނޑައަޅާ އުސޫލުތަކާ އެއްގޮތަށް ސީޒަން އަލުން ފަށައި ޖުލައި މަހާއި އޮގަސްޓް މަހުގައި ކުޅެގެން ވެސް ލީގު ފުރިހަމަ ކުރެވޭނެކަމަށް ވެސް ވިދާޅުވި އެވެ.

ޔޫރަޕުގެ ގަދަ ފަސް ލީގުގެ ތެރޭގައި ހިމެނޭ ފްރެންޗު ލީގު ކެންސަލް ކުރިއިރު، މިމަގުގެ 16 ވަނަ ދުވަހު ޖަރުމަން ލީގުގެ ކުޅުން ވަނީ ފަށާފަ އެވެ. އަދި އަންނަ ޖޫން މަހު އިނގިރޭސި ޕްރިމިއަރ ލީގު، ސްޕެނިޝް ލީގު އަދި އިޓާލިއަން ލީގު އަލުން ފެށުމަށް އަންނަނީ ތައްޔާރުވަމުންނެވެ.