ފްރާންސް ލޮކްޑައުން ކުރި ފަހުން އެންމެ މަދުން ކޭސްތައް ފެނުނީ އާދިއްތަ ދުވަހު

ފްރާންސްގައި ކޮވިޑް-19 ފެތުރުން ކޮންޓްރޯލް ކުރުމަށްޓަކައި މަރޗް މަހުގެ 17 ވަނަ ދުވަހު އެ ގައުމު 'ލޮކްޑައުން' ކުރި ފަހުން އެންމެ މަދުން މީހުންނަށް ވައިރަސް ޖެހިގެން އަދި މަރުވެގެން ރިޕޯޓުކޮށްފައި ވަނީ އާދިއްތަ ދުވަހު ކަމަށް އެ ގައުމުގެ ހެލްތު މިނިސްޓްރީން ބުނެފި އެވެ.

ފްރާންސްގެ ހެލްތު މިނިސްޓްރީން ހާމަކޮށްފައިވާ ގޮތުގައި އާދިއްތަ ދުވަހު އެ ގައުމުގައި އަލަށް ވައިރަސް ޖެހިފައި ވަނީ 115 މީހުންނަށެވެ. އެއާއެކުގައި އެ ގައުމުގައި މިހާރު ވައިރަސް ޖެހިފައިވާ މީހުންގެ އަދަދަކީ 144،921 ( އެއްލައްކަ ސާޅީސްހަތަރު ހާސް ނުވަސަތޭކަ އެކާވީސް) އެވެ. މިނިސްޓްރީން ބުނެފައިވަނީ އާދިއްތަ ދުވަހު މަރުވެފައި ވަނީ 35 މީހުން ކަމަށެވެ. އެއާއެކު މަރުވި މީހުންގެ އަދަދަކީ 28،367 އެކެވެ. މިއީ ވައިރަސް އަލަށް ޖެހޭ މީހުންނާއި ވައިރަސް ޖެހިގެން މަރުވަމުންދާ ނިސްބަތަށް ބަލާއިރު 0.1 އިންސައްތަ އެވެ.

ފްރާންސްގައި ލޮކްޑައުންގައި އަޅާފައިވާ ފިޔަވަޅުތަކަށް މެއި 11 ގައި ލުއި ދޭން ފަށާފައި ވާއިރު ހަފުތާ ބަންދުގައި ވެސް ވައިރަސް އަލަށް ޖެހޭ މީހުންނާއި މަރުވާ މީހުން ނިސްބަތުން ދަށަށްދާން ފަށާފައިވާ ކަމަށް ހެލްތު މިނިސްޓްރީން ބުނެ އެވެ.

އެޕިޑެމޮލޮޖިސްޓެއް ކަމުގައިވާ ލޯރެންޓް ތޫބިއާނާ ބުނެފައި ވަނީ ފްރާންސްގައި އެންމެ ހަލުވި މިނުގައި ވައިރަސް ފެތުރި މަރުވަމުންދާ ދުވަސްތައް މިހާރު ފަހަނައަޅައި ގޮސްފައިވާ ކަމަށެވެ. އަދި އަލުން ވައިރަސް އައުމަކީ ވުމަށްވުރެ، ނުވުން ކައިރިކަމަށް ލޯރެންޓް ވަނީ ބުނެފަ އެވެ.

ލޮކްޑައުންގައި އަޅާފައިވާ ފިޔަވަޅުތަކަށް ލުއި ތަކެއް ދީފައި ވީނަމަވެސް ބޭރުތެރޭގައި އިޖުތިމާޢީ ގައިދުރުކަން ގެންގުޅެން ޖެހޭނެކަމަށް އެގައުމުގެ އެންވަޔަރަންމަންޓް މިނިސްޓަރ އެލިޒަބަތު ބޯރން ފްރާންސްގެ އިންޓަރ ރޭޑިއޯ އަށް ދެއްވި އިންޓަރވިއު އެއްގައި ވިދާޅުވެފައި ވެއެވެ. އަދި ކުރިޔަށް އޮތް ހޫނު މޫސުމުގައި ފްރާންސްގެ ރައްޔިތުން އެ ގައުމުން ބޭރަށް ދަތުރު ނުކުރުމަށްވެސް އެލިޒަބަތު ވަނީ އެދިވަޑައިގަންފަ އެވެ.

މީގެއިތުރުން ޕެރިސް އަކީ އަދިވެސް ވައިރަސް ފެތުރޭ "ރެޑް ޒޯން" ގެ ގޮތުގައި ކަނޑައަޅާފައިވާ ތަނެއްކަމުން އެތަނުގައި ހުރި ޕަރކްތައް އަދިވެސް ހުންނާނީ ބަންދު ކުރެވިފައި ކަމަށް އެލިޒަބަތު ވިދާޅުވި އެވެ.

އައު ޑާޓާތައް ދައްކާގޮތުން ހޮސްޕިޓަލްތަކުގައި އެޑްމިޓް ވެފައިވާ ވައިރަސް ޖެހިފައިވާ ބަލި މީހުންގެ އަދަދު ވަނީ އިތުރު ވެފައެވެ. އިތުރަށް 7 މީހުން ހޮސްޕިޓަލްގައި އެޑްމިޓްކޮށްފައިވާ ކަމަށް ޑާޓާތަކުން ދައްކާއިރު ހޮސްޕިޓަލްތަކުގައި އެޑްމިޓްކޮށްފައިވާ މީހުންގެ ޖުމުލަ އަދަދަކީ 17،185 މީހުންނެވެ. އެއީ ރިޕޯޓުުކުރެވޭ ނިސްބަތުގެ ސްޕީޑް ލަސްވެފައިވުމާއި ހަފުތާ ބަންދާއެކު ގިނަ ބަޔަކު ހޮސްޕިޓަލްތަކުގައި ތިބުމާއެކު ކަމަށް ހެލްތު މިނިސްޓްރީން ބުނެ އެވެ.

އެހެންނަމަވެސް އައިސީޔޫތަކުގައި ފަރުވާ ދެމުންދާ މީހުންގެ އަދަދުތައް ވަނީ އެއް މިންވަރެއްގައި ދަށަށްދާން ފަށާފަ އެވެ. އާދިއްތަ ދުވަހު 10 މީހުން އައިސީޔޫތަކުން ދޫކޮށްލިއިރު އެ އަދަދު މިހާރު ހުރީ 1655 ގައެވެ. ފްރާންސްގައި ވައިރަސްގެ ޕީކުގެ ދުވަސްވަރު އައިސީޔޫތަކުގައި 7148 މީހުންނަށް ފަރުވާދީފައި ވެއެވެ.