ބަންގްލަދޭޝް ފުޓްބޯޅަ ޓީމު އެކަހެރިކޮށް ޓްރެއިނިންގ ކޭމްޕެއް ބާއްވަނީ

ބަންގްލަދޭޝް ފުޓްބޯޅަ ޓީމު އެކަހެރިކޮށް ޓްރެއިނިންގ ކޭމްޕެއް ކުރިއަށްގެންދަން އެ ގައުމުގެ ފުޓްބޯޅަ ފެޑެރޭޝަނުން ނިންމައިފި އެވެ.

މީގެ ކުރިން ކޮރޯނާވައިރަސް (ކޮވިޑް-19) އާ ގުޅިގެން ބަންގްލަދޭޝް ފުޓްބޯލް ފެޑެރޭޝަނުން ވަނީ ބަންގްލަދޭޝް ޕްރިމިއާ ލީގާއި މިއަހަރު ބޭއްވުމަށް ތާވަލު ކޮށްފައި އޮތް އިންޑިޕެންޑެންސް ކަޕް ކެންސަލް ކޮށްފައެވެ.

ބަންގްލަދޭޝް ޕްރިމިއާ ލީގު ކެންސަލް ކުރިއިރު، ކޮވިޑް-19 އާ ގުޅިގެން ލީގު މެދުކަނޑާލީ މާޗު މަހުގެ 16 ވަނަ ދުވަހު އެވެ. އެހެންކަމުން ގައުމީ ޓީމުގެ ކުޅުންތެރިން މެޗެއް ނުކުޅެ ތިބެން ޖެހުމުގެ ސަބަބުން އެކަމަށް ހައްލެއް ހޯދުމަށް ގައުމީ ޓީމުގެ ކުޅުންތެރިން އެކަހެރިކޮށް ޓްރެއިނިންގ ކޭމްޕެއް ކުރިއަށް ގެންދަން ވަނީ ނިންމާފައެވެ.

އެގޮތުން ޢީދުގެ ފަހުން ގައުމީ ޓީމުގެ ކުޅުންތެރިން އައިސޮލޭޓް ކުރުމަށް ފަހު، ފެޑެރޭޝަނުން ކަނޑައަޅާ ތަނެއްގައި ޓްރެއިނިންގ ކޭމްޕް ކުރިއަށް ގެންދާނެ ކަމަށް ރިޕޯޓުތައް ބުނެއެވެ.

މި މަހު 14 ވަނަ ދުވަހު ބަންގްލަދޭޝްގެ ގައުމީ ޓީމުގެ ކޯޗު އިންގްލެންޑްގެ ޖޭމީ ޑޭގެ އެއްބަސްވުން ވަނީ ހަމަވެފައެވެ. އެކަމަކު އޭނާގެ އެއްބަސްވުން އިތުރު ދެ އަހަރަށް އާކުރަން މިހާރު ވަނީ ނިންމާފައެވެ.

ކޮވިޑް-19 އާ ގުޅިގެން ޑޭ މިވަގުތު ހުރީ ބަންގްލަދޭޝް އަށް ނާދެވިފައެވެ. އޭނާ ބަންގްލަދޭޝް އަށް އައުމުގެ ކުރިން ޓީމުގެ ޓްރެއިނިންގ ކޭމްޕް ފަށަން ޖެހިއްޖެނަމަ، ކޭމްޕް ކުރިއަށްގެންދާނީ ފެޑެރޭޝަނުން ކަނޑައަޅާ ލޯކަލް ކޯޗުންނާ އެކު ކަމަށް ރިޕޯޓުތައް ބުނެއެވެ.

ބަންގްލަދޭޝް ގައުމީ ފުޓްބޯޅަ ޓީމު އެކަހެރިކުރާއިރު، ކޮވިޑް-19 ގެ އަސަރު ބަންގްލަދޭޝް އަށް ވެސް ވަނީ ކޮށްފައެވެ. އެގޮތުން މިހާތަނަށް އެ ގައުމުން މި ވައިރަހަށް 33،610 މީހަކު ވަނީ ޕޮޒިޓިވް ވެފައެވެ. އަދި މި ވައިރަސް ޖެހިގެން ބަންގްލަދޭޝް އިން 480 މީހަކު މަރުވެފައިވާއިރު، 6،901 މީހަކު ވަނީ ވައިރަހުން ރަނގަޅު ވެފައެވެ.