ފްރެންޗު ލީގުގެ ކްލަބުތަކުން ހުށަހެޅި މައްސަލަ ކޯޓުން ބަލައެއް ނުގަތް

ފްރެންޗު ލީގު ކެންސަލް ކުރުމާ ގުޅިގެން ލިޔޯން އާއި އަމިއެންސް އަދި ޓުލޫސް އިން ހުށަހެޅި މައްސަލަ ބަލައިނުގަންނަން ކޯޓުން ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ފްރެންޗު ލީގު ކެންސަލް ކޮށް، ޕީއެސްޖީ އަށް ވަނީ ޗެމްޕިއަންކަން ދީފައެވެ. ފްރެންޗު ލީގު ކެންސަލް ކުރީ އަންނަ ސީޒަނުގެ ޔޫރަޕް މުބާރާތްތަކަށް ކޮލިފައިވާ ޓީމުތައް ކަނަޑައެޅުމަށްފަހު އެވެ. އެގޮތުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވީ އެއްވަނައިގައި އޮތް ޕީއެސްޖީ އާއި ދެވަނައިގައި އޮތް މާސޭ އަދި ތިންވަނައިގައި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވީ ހަތަރުވަނައިގައި އޮތް ލިލް އާއި ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސް އެވެ. އެހެންކަމުން މިއީ 1997 ވަނަ އަހަރަށްފަހު ޔޫރަޕްގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ.

މީގެ އިތުރުން ލީގު ކެންސަލް ކުރުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓްވެފައެވެ. 19 ވަނައިގައި އޮތް އަމިއެންސް އާއި 18 ވަނައިގައި އޮތް ނިމްސްއާ ދެމެދު އޮތީ ހަތަރު ޕޮއިންޓުގެ ފަރަގެކެވެ.

ފްރެންޗު ފުޓްބޯލް ލީގު (އެލްއެފްޕީ) ގެ ނިންމުމާ ދެކޮޅަށް މި ތިން ކްލަބުން ނުރުހުން ފާޅުކުރިއިރު، ލިބޭ މާލީ ގެއްލުމުގެ ބަދަލު ހޯދަން ތިން ކްލަބުންވެސް ކޯޓަށް މައްސަލަ ހުށަހެޅިއެވެ. އެކަމަކު ކޯޓުން ވަނީ މައްސަލަ ބަލައިނުގަންނަން ނިންމާ، މައްސަލަ އަނބުރާ ފޮނުވާލާފައެވެ.

ޔޫރަޕްގެ ގަދަ ފަސް ލީގުގެ ތެރޭގައި ހިމެނޭ ފްރެންޗު ލީގު ކެންސަލް ކުރިއިރު، ޔޫރަޕުން މިހާތަނަށް ހަތަރު ލީގެއް ވަނީ ކެންސަލް ކޮށްފައެވެ. އެއީ ފްރެންޗު ލީގުގެ އިތުރުން ނެދަލެންޑްސް ލީގާއި ބެލްޖިއަމް ލީގު އަދި ސްކޮޓްލެންޑް ލީގެވެ. މީގެ ތެރެއިން ނެދަލެންޑްސް ލީގު ކެންސަލް ކުރީ ޗެމްޕިއަނެއް ކަނޑަނާޅައެވެ.