އޮސްކާ 2021 ލަސްވެދާނެ

ކޮރޯނާވައިރަސްގެ ސަބަބުން އޮސްކާ 2021 ލަސްކުރަން މަޝްވަރާކުރަމުންދާ ކަމުގެ އަޑު ފެތުރިއްޖެ އެވެ.

އޮސްކާ އެވޯޑް ހަފުލާ ފަސް ކުރުމަށް މަޝްވަރާ ކުރެވެމުންދާއިރު، މި ހަފުލާ ޝެޑިއުލް ކުރެވިފައި އޮތީ 2021 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހަށެވެ. މަޝްވަރާކުރެވެމުން ދަނީ މި ހަފުލާ މެއި ނުވަތަ ޖޫން މަހާއި ހަމައަށް ފަސްކުރުމަށެވެ.

ކޮރޯނާވައިރަސްގެ ސަބަބުން ސިނަމާތަކުގައި ވަނީ ތަޅު އެޅުވުމާއި، ގިނަ މީހުން އެއްވެގެން ކުރާ ކަންކަން ގިނަ ގައުމުތަކެއްގައި ހުއްޓާލުމާއި ގުޅިގެން، ފިލްމުތައް ރިލީޒްކުރާ ތާރީހުތައް ވަނީ ފަސްކޮށްފަ އެވެ. ރިލީޒް ކުރުން ފަސްކޮށްފައިވާ ބައެއް ފިލްމުތަކުގެ ތެރޭގައި ނޯ ޓައިމް ޓު ޑައި، ޓޮޕް ގަން: މެވެރިކް، މުލާން އަދި ބްލެކް ވިޑޯ ހިމެނެ އެވެ.

މި ބަލިމަޑުކަމުގެ ސަބަބުން ދުނިޔޭގެ ފިލްމު އިންޑަސްޓްރީ އަށް ވަނީ ބޮޑެތި ގެއްލުންތަކެއް ވެފަ އެވެ. ފިލްމީ ދާއިރާގެ މާހިރުން އަންދާޒާކުރާ ގޮތުގައި މިކަމުން އަރައިގަންނަން އަހަރުތަކެއް ނަގާނެ އެވެ.

"ނިއު ނޯމަލް" ގެ ތެރެއިން ކަންކަން އަލުން ހުޅުވިގެން އަންނައިރު، އިޖުތިމާއީ ގައިދުރުކަން ބަހައްޓަން ޖެހުމާއި ގުޅިގެން ސިނާމާތަކަށް ވަދެވޭ މީހުންގެ އަދަދުތައް މަދުވުމާއި ގުޅިގެން، އާމްދަނީ އަށް އެކަމުގެ ނޭދެވޭ އަސަރުކުރާނެ ކަމަށް މާހިރުން ބުނެ އެވެ.