ޝާހިދު ހުރީ ފިލްމު "ޖާޒީ" ގެ ސެޓަށް ދެވޭނެ ދުވަހެއްގެ އިންތިޒާރުގައި

ތެލެގޫ ފިލްމު "ޖާޒީ" ގެ ހިންދީ ރީމޭކްގެ ސެޓަށް ދިއުމަށް ކެތްމަދުވެފައި ހުރި ކަމަށް ޝާހިދު ކަޕޫރު ބުނެފި އެވެ.

"ޖާޒީ" އަކީ ކްރިކެޓްގެ ވާހަކައެއް ކިޔައިދޭ ސްޕޯޓްސް ފިލްމެކެވެ. މި ފިލްމުގެ ޝޫޓިންގް ހުއްޓިފައި މިވަނީ ލޮކްޑައުންއާއި ގުޅިގެންނެވެ. ޖާޒީގެ ސެޓަށް ދާން ބޭނުންވެފައި ހުރިކަން ޝާހިދު ހާމަކޮށްފައި ވަނީ އޭނާގެ އިންސްޓަގްރާމަށް ޖާޒީގެ ސެޓުގައި ނަގާފައިވާ ފޮޓޯއެއް ޕޯސްޓުކުރުމަށް ފަހުގަ އެވެ. އެ ފޮޓޯގެ ކެޕްޝަންގައި ޖާޒީގެ ސެޓް ވަރަށް މިސްވާކަމަށް ޝާހިދު ލިޔެފައި ވެއެވެ.

ޖާޒީ ގެ ހިންދީ ރީމޭކް ގެ ޕްރޮޑިއުސަރުންނަކީ އަލޫ އަރާވިންދް އާއި އަމަން ގިލް އެވެ.

ފިލްމު ކަބީރް ސިންގް އަށް ފަހު ޝާހިދު ކަޕޫރަށް ވަނީ ބޮޑު މަގުބޫލު ކަމެއް ލިބިގެންގޮސްފަ އެވެ. "ކަބީރު ސިންގް" ގެ ބޮޑު ކާމިޔާބިއާ އެކު ފިލްމު ކުޅެދޭ އަގު ބޮޑުވެސް ކޮށްފަ އެވެ. އެގޮތުން ދެން 35 ކްރޯޑް ރުޕީސް އަށް ވުރެ ކުޑަކޮށް ޝާހިދު ފިލްމެއް ނުކުޅޭނެ ކަމަށްވެ އެވެ.