އަލަށް އިތުރުކުރި 200 ޖާގައާއެކު މި މަހުގެ 17 ވަނަ ދުވަހު ވިލިވަރު ކަރަންޓީން ފެސިލިޓީ އަލުން ހުޅުވާނެކަމަށް ޓުއަރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ކޮވިޑްގެ ގައުމީ ޓާސްކް ފޯހުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އަލީ ވަހީދު ވިދާޅުވީ ދިވެހިންގެ އިތުރުން ބިދޭސީންގެ އައިސޮލޭޝަންގެ ކަންކަން ވަގުތަށް ނިންމޭނެ ކަމަށެވެ. އަދި ހުޅުމާލޭގައި ބޭނުންކުރާ ހިޔާ ފެސިލިޓީގެ އިތުރުން ކޮވިޑަށް ހާއްސަކޮށްގެން މަސައްކަތް ކުރަމުންދާ ފެސިލިޓީގެ މަސައްކަތް ވެސް 'ސަރޖް'ގެ ތެރެގައި ނިންމާލެވޭ ވަރަށް މަސައްކަތް ކުރެވިފައިވާ ކަމަށެވެ.

އަލީ ވަހީދު ވިދާޅުވީ ވިލިވަރުގައި އިތުރަށް ތަރައްގީ ކުރާ 200 މީހުންގެ ޖާގައިގެ ފެސިލިޓީ މެއި މަހުގެ 17 ވަނަ ދުވަހުގައި މީހުން ވައްދާ ވަރަށް ނިންމާލެވޭނެ ކަމަށެވެ. އަދި މެއި މަހުގެ 16 ވަނަ ދުވަހު މީޑިއާ އާއި ހިއުމަން ރައިޓްސް ކޮމިޝަނަށް އެތަން ދައްކާލަން ގެންދިއުމަށް ގަސްދުކުރުމާ ކަމަށް ވިދާޅުވިއެވެ. އެއީ، އެތަނުގެ ހާލަތު ބަލާލުމުގެ ފުރުސަތު އެފަރާތްތަކަށް ފަހިކޮށްދިނުމުގެ ބޭނުމުގައި ކަމަށް ވިދާޅުވިއެވެ.

ވިލިވަރު ކަރަންޓީން ފެސިލިޓީއެއްގެ ގޮތުގައި ހަމަޖެއްސުމަށް ފަހު އެތަނުގައި ދިމާވި މައްސަލައަކާއި ގުޅިގެން ފެސިލިޓީ އެއްކޮށް ހުސްކުރިއެވެ. އަދި ފަހުން އެތަން މަރާމާތު ކުރުމަށްފަހު އެތަނަކީ ބިދޭސީންނަށް ހާއްސަ ތަނެއްގެ ގޮތުގައި ވަނީ ކަނޑައަޅާފައެވެ.

މީގެ ކުރިން ވިލިވަރުގައި ތަރައްގީ ކުރީ 30 އެނދުގެ ފެސިލިޓީއެކެވެ. އަދި 200 އެނދު އިތުރު ކުރުމާއެކު ޖުމުލަ އަދަދު މިހާރު ވަނީ 230ށް އަރާފައެވެ.