ޔަމަނުގައި ކޮވިޑް-19 ފެތުރެމުންދާތީ އެކަމުން އަރައިގަތުމަށް ކުރަމުންދާ މަސައްކަތައް އެހީތެރިވުމުގެ ގޮތުން ޔަމަނުގައި ޙަރަކާތްތެރިވާ އަރަބި ގުޅިފައިވާ ލަޝްކަރުގެ ޙަމަލާތައް އިތުރު އެއްމަސްދުވަހަށް ހުއްޓާލައިފިއެވެ.

ޔަމަނުގައި ޙަރަކާތްތެރިވާ ހުޘީ ހަނގުރާމަވެރިންނާއި ދެކޮޅަށް އަސްކަރީ އޮޕަރޭޝަނެއް ޔަމަނުގައި ކުރިޔަށްގެންދާ އަރަބި ގުޅިފައިވާ ލަޝްކަރުން ވަނީ މީގެ ކުރިންވެސް ދެހަފުތާވަންދެން ޙަމަލާ ބަދަލުކުރަން އެއްބަސްވެފައެވެ. އަދި ބުރާސްފަތި ދުވަހަށް މި މުއްދަތު ހަމަވުމާއި ގުޅިގެން އެއްމަސް މިހާރު ވަނި އިތުރުކޮށްފައެވެ. މިއީ ހޫޘީންނާއެކު ވެވުނު ވަގުތީ އެއްބަސްވުމެއްކަމަށާއި، ޙަމަލާ ބަދަލުކުރުން ހުއްޓާލާ ދާއިމީ އެއްބަސްވުމަކާއި ހަމަޔަށް އައުމަށް މަސައްކަތްކުރަމުންދާ ކަމަށް އަރަބި ލަޝްކަރުން ބުނެއެވެ.

އަރަބި ލަޝްކަރުން މިދިޔަ ދެހަފުތާގައިވެސް ޙަމަލާދީފައެއް ނުވެއެވެ. އެހެންނަމަވެސް ޙަމަލާ ބަދަލުކުރުން ހުއްޓާލާ އެއްބަސްވުމާއި ޚިލާފުވެ، ހޫޘީ ހަނގުރާމަވެރިން ބައެއް ޕްރޮވިންސްތަކަށް ޙަމަލާދީފައިވެއެވެ. އަރަބި ލަޝްކަރުން ވަނީ މިކަމާއި ކަންބޮޑުވުން ފާޅުކޮށްފައެވެ. އީރާނުން ވާގިވެރިވެދޭ ހޫޘީ ހަނގުރާމަވެރިންގެ އަމަލުތައް ހުންނަގޮތުން އެޤައުމުގެ މަދަނީ އަދި ދާޚިލީ ހަމަޖެހުން ދެމެހެއްޓުމުގައި އެޤައުމުގެ ކަމާގުޅޭ މަސްއޫލުވެރިންނަށް ވަނީ ބޮޑެތި ގޮންޖެހުންތަކާއި ކުރިމަތިވެފައެވެ.

އެޤައުމުގެ ސަރުކާރުން މިހާރު އެންމެ އަހައްމިއްޔާތުކަން ދީގެން ކުރަމުންދާ މަސައްކަތަކީ ނުރައްކާތެރި ކޮވިޑް-19 ރޯގާއިން ސަލާމަތްވުމެވެ. މިކަމުގައި އެޤައުމުގެ ދާޚިލީ ހަމަޖެހުން ވަރަށް މުހިންމެވެ. މިހާތަނަށް ޔަމަނުގައި ރިކޯޑުކުރެވިފައިވަނީ ކޮވިޑް-19ގެ އެންމެ ކޭސްއެކެވެ. އެހެންނަމަވެސް އެޤައުމުގައި ބަލިމަޑުކަމެއް ފެތުރިދާނެކަމުގެ ބިރު އޮތުމާއެކު ބައިނަލްއަޤުވާމީ ޖަމްއިއްޔާ ޖަމާއަތްތަކާއި އެކުވެރި ދައުލަތްތަކުގެ އެހީގައި އެޤައުމުން ދަނީ ތައްޔާރުވަމުންނެވެ.