ސްރީލަންކާ ކެބިނެޓް މިނިސްޓަރުންގެ އެއް މަހުގެ މުސާރަ ކޮވިޑް-19 ފަންޑަށް

ސްރީލަންކާގެ ކެބިނެޓްގައި ހިމެނިވަޑައިގަންނަވާ ވަޒީރުންގެ އެއްމަހުގެ މުސާރަ ކޮވިޑް-19 ފަންޑަށް ހަދިޔާކުރެއްވުމަށް އެޤައުމުގެ ބޮޑު ވަޒީރު ނިންމަވައިފިއެވެ.

ބޮޑުވަޒީރު މަހިންދަ ރާޖަޕަކްސަގެ މި ނިންމެވުން އިޢުލާނުކުރައްވަފައިވަނީ ބުރާސްފަތިދުވަހުގެ ހެދުނުގައެވެ.

ސްރީލަންކާގެ ކެބިނެޓް މިނިސްޓަރެއްގެ މުސާރައަކީ އެއްލައްކަ ސާޅީސްހާސް ރުޕީސްއެވެ. ކެބިނެޓުގައި ބޮޑިވަޒީރާއެކު ޖުމުލަ 16 މިނިސްޓަރުން ތިއްބަވައެވެ. އެހެން ކަމުން ކެބިނެޓުން ހަދިޔާކުރާ ފައިސާގެ ޖުމުލަ އަދަދަކީ ދެ މިލިއަން ދުއިސައްތަ ސާޅީސްހާސް ރުޕީސް ރުޕީސްއެވެ.

ސްރީލަންކާ މައި ސަރުކާރުން އެކުލަވާލާފައިވާ ކޮވިޑް-19 ހެލްތުކެއަރ އެންޑް ސޯޝަލް ސެކިއުރިޓީ ފަންޑަށް ކެބިނެޓުން ހަދިޔާކުރާ ފައިސާއާއެކު ފަންޑަށް ލިބޭ ފައިސާގެ އަދަދު 822 މިލިއަން ސްރީލަންކަން ރުޕީސްއަށް އަރާނެއެވެ.