ސައުދީ ޢަރައްބިއްޔާގައި ތިބި ބިދޭސީން ފޮނުވާލަނީ

ސައުދީޢަރަބިއްޔާގައި ވިސާހަމަވެފައި ތިބި ބިދޭސީން އެޤައުމުން ފޮނުވާލަން ނިންމައިފިއެވެ.

ރަސްގެފާނު ސަލްމާން ބިން ޢަބްދުލް އަޒީޒުގެ އަމުރުފުޅާ ގުޅޭގޮތުން، އެޤައުމުގެ ދާޚިލީ ވުޒާރާއިން ޢާންމު ކޮށްފައިވާ ބަޔާނުގައިވަނީ މިހާރު ވިސާ ހަމަވެފައި ތިބި މީހުންނާއި، އަދި ރީ-އެންޓްރީ ވިސާގައި ތިބި ބިދޭސީން އެޤައުމުން ފޭބުމުގެ ހުއްދަ ރަސްގެފާނު ދެއްވާފައިވާކަމަށެވެ. އަދި އެމީހުން އެމީހުންގެ ޤައުމަށް އެނބުރިދިއުމަށް ސައުދީން ހަމަޖައްސަންޖެހޭ ކަންކަން އިންތިޒާމުކޮށްދޭނެކަމަށް ބަޔާނުގައި ބުނެފައިވެއެވެ.

ސައުދީގެ ދާޚިލީ ވުޒާރާގެ "އަބްޝަރ" ޕޯޓަލްގައި ވަނީ ބިދޭސީން ފޮނުވުމަށް ޚާޢްޞަ ޕްރޮގުރާމެއް ފަށާފައެވެ. "އައުދާ"ގެ ނަމުގައި ފެށި މި ޕްރޮގުރާމުގެ ދަށުން ރަސްޖިސްޓަރީ ކުރާ ބިދޭސީންނަށް ބައިނަލްއަޤުވާމީ ފްލައިޓުން ޖާގަ ހޯދައިދިނުމާއި، އަދި ފުރަން ބޭނުންވާ އެހެނިހެން ލިޔެކިޔުންތައް ދާޚިލީ ވުޒާރާއާއި، ކަމާއި ގުޅުންހުރި ހުރިހައި އިދާރާތައް ގުޅިގެން ކުރުމަށް ވަނީ ހަމަޖެހިފައެވެ. އަދި އިންތިޒާމުތައް ހަމަޖެހުމުން ރަޖިސްޓްރީކުރާ ފަރާތްތަކައް ފޯނުގެ ޒަރީއާއިން ޕޯޓަލް މެދުވެރިކޮށް އެގިގެންދާނެފަދަ އިންތިޒާމުތައްވެސް ވަނީ ހަމަޖައްސާފައެވެ.

ސައުދީޢަރަބިއްޔާގައި ތިބި ބިދޭސީން ފުރުވަން ހަމަޖެހިފައިވަނީ ވެރިރަށް ރިޔާދުގެ ކިންގް ޚާލިދު އިންޓަނޭޝަނަލް އެއަރޕޯޓާއި، ޖިއްދާގެ ކިންގް އަބްދުލްއަޒީޒު އިންޓަނޭޝަނަލް އެއަރޕޯޓާއި، މަދީނާގެ ޕްރިންސް މުހައްމަދު އިންޓަނޭޝަނަލް އެއަރޕޯޓުގެ އިތުރުން، ދަމާމުގައި ހުންނަ ކިންގް ފަހްދު އިންޓަނޭޝަނަލް އެއަރޕޯޓުންނެވެ. މިހަތަރު ސިޓީން ބޭރުގައި ތިބި ބިދޭސީންނަށްވެސް އެއަރޕޯޓަށް ދިއުމުގެ އިންތިޒާމު ސައުދީ ސަރުކާރުން ހަމަޖައްސައިދޭނެކަމަށް އެޤައުމުގެ ދާޚިލީ ވުޒާރާއިން ބުނެއެވެ.

ސައުދީ ޢަރަބިއްޔާގައި ކޮވިޑް-19 ފެތުރެން ފެށުމާއި ގުޅިގެން މިދިޔަ ފެބްރުއަރީ މަހު އެޤައުމުން ބައިނަލްއަޤުވާމީ އުދުހުންތައް ހުއްޓާލުމާއި ގުޅިގެން އެޤައުމުގައި ގިނަ ޢަދަދެއްގެ ބިދޭސީންނާއި ބިދޭސީ މަސައްކަތްތެރިން ތާށިވިއެވެ.

ސައުދީ ޢަރަބިއްޔާއަކީ ވިސާގެ ކަންތައްތަކުގައި ހަރުކަށި ފިޔަވަޅުތަކެއް ތަންފީޒުކުރާ ޤައުމެއް ކަމުގައި ވީނަމަވެސް، ކޮވިޑް-19އާއި ގުޅިގެން ވިސާ ހަމަވި ބިދޭސީންނަށް ވިސާ އޮފީހަށް ނުގޮސް، ވިސާ ވަނީ އިތުރުކޮށްދީފައެވެ.

އަދި ރަސްކަމުގެ ދަރުބާރުންވަނީ އެމީހުންނަށް ކޮވިޑް-19އަށް ޓެސްޓްކުރުމާއި އަދި ފަރުވާ ހިލޭ ދިނުމަށް ކަމާއިގުޅޭ އިދާރާތަކައް އަމުރުކޮށްފައެވެ.

ކޮވިޑް-19 ރޯގާއާއި ގުޅިގެން ސައުދީ އަރަބިއްޔާގެ މައި ސިޓީތައް ލޮކް ޑައުންކޮށް، އެހެން ޞަރަޙައްދުތަކުގައި ވަނީ ކާފިއުގެ އަމުރު އިޢުލާނުކޮށްފައެވެ. އަދި ކޮވިޑް-19 އިން ރައްކާތެރިވުމަށް އެކި އިދާރާތަކުން ދަނީ ހަރުކަށި ފިޔަވަޅުތައް ތަންފީޒުކުރަމުންނެވެ.