ކޮވިޑް-19: މިއަދު އެންމެ ގިނައިން މީހުން މަރުވީވެސް އަދި އިންފެކްޓްވީވެސް އެމެރިކާއިން
އެމެރިކާއިން މިއަދު އެކަނި 20,607 މީހުން ވައިރަސްއަށް ޕޮޒިޓިވްވި
ޑިސްއިންފެކްޓް ކުރުމުގެ މަސައްކަތުގެ ތެރެއިން
ބައިނަލްއަޤުވާމީ ޞައްޙަ މަސްދަރުން މިއަދު ޢާންމުކޮށްފައިވާ ކޮވިޑް-19 ގެ އެންމެ ފަހިގެ ޑޭޓާތަކައް ބަލާއިރު މިއަދު ކޮވިޑް-19 އަށް އެންމެ ގިނަ މީހުން އިންފެކްޓްވީވެސް، އަދި މަރުވީވެސް އެމެރިކާއިންނެވެ.
މިއަދުގެ މިހާތަނަށް އައިއިރު އެމެރިކާއިން 20,607 މީހުން ވައިރަސްއަށް ޕޮޒިޓިވްވެފައިވާއިރު، ވައިރަސްގައި 694 މީހުން މަރުވިއެވެ. މިއާއެކު އެމެރިކާގައި ވައިރަސް ޖެހުނު މީހުންގެ ޖުމުލަ އަދަދަކީ 297,768 އެވެ. އަދި މަރުވީ މީހުންގެ ޖުމުލަ އަދަދަކީ 8,098 އެވެ.
ފަރުވާދީގެން މިހާތަނަށް އެމެރިކާގައި 14,436 މީހުން ރަނގަޅުކުރެވިފައިވާއިރު، އަދިވެސް 275,234 ދަނީ ފަރުވާދެމުންނެވެ. މީގެތެރެއިން 6,219 ތިބީ ވަރަށް ސީރިއަސް ޙާލަތުގައި ކަމަށް މަޢުލޫމާތު ލިބެއެވެ.
މުޅި ދުނިޔެއަށް ބަލާއިރު މިހާތަނަށް 1,167,063 މީހުން ވަނީ ވައިރަސްއަށް ޕޮޒިޓިވްވެފައެވެ. މިއަދު އެކަނި މުޅި ދުނިޔެއިން އަލަށް 50,420 ކޭސް ރިޕޯޓުކުރެވުނެވެ. މުޅި ދުނިޔޭގެ 207 ޤައުމަކުން/ ޓެރިޓަރީސް ހިމެނޭ ގޮތައް ޖުމުލަ 3,521 މީހުން މިއަދު މަރުވެފައިވާއިރު، މަރުވީ މީހުންގެ އަދަދު މިހާރު ވަނީ 62,691 އަށް އަރާފައެވެ. މުޅި ދުނިޔޭގެ އެކި ކަންކޮޅުތަކުގައި 862,630 މީހަކަށް އަދިވެސް ފަރުވާދެމުންދާއިރު، މީގެތެރެއިން 39,938 މީހެއްގެ ޙާލު ވަރަށް ސީރިއަސްކަަމަށް ރިޕޯޓުތައް ބުނެއެވެ. މިހާތަނަށް އައިއިރު މުޅި ދުނިޔެއިން ފަރުވާ ދީގެން ރަނގަޅުކުރެވިފައިވަނީ ޖުމުލަ 241,742 މީހުންނެވެ.
ވައިރަސް އެންމެ ނުރައްކާތެރި ފައްތަރެއްގައި އޮތީ ވިލާތު ބައްރުގެ ޤައުމުތަކުގައެވެ. މުސްލިމް ޤައުމުތަކުގެ ތެރެއިން އީރާނުގައެވެ. އަދި ގަލްފުގެ ޤައުމުތަކުގެ ތެރެއިން ސައުދީ އަރަބިއްޔާގައެވެ. އަދި ދެކުނު އޭޝިޔާގެ ޤައުމުތަކުން ޕާކިސްތާނުވެސް އޮތީ ނުރައްކާތެރި ޙާލަތެއްގައެވެ. އިރުމަތީ އޭޝިޔާގެ ޤައުމުތަކަށް ބަލާއިރު، މިވަގުތު އެންމެ ނުރައްކާ ޙާލަތެއްގައި އޮތީ ދެކުނު ކޮރެއާއާއި މެލޭޝިޔާއެވެ.
