ރާއްޖޭ ޓީމުގެ ފިޓްނަސް ދަށް ވުމުން ދެވަނަ ހާފްގައި ފަލަސްތީނަށް ގިނަ ފުރުސަތު ތަކެއް ލިބުނު ކަމަށާއި އެގޮތުން ބަދަލު ކުޅުންތެރިންގެ ގޮތުގައި ކުޅެން ނެރުނު ކުޅުންތެރިންގެ ފަރާތުން ފެނިގެންދިޔައީ މޮޅު ކުޅުމެއް ކަމަށް ފަލަސްތީން ޓީމުގެ ކޯޗު އަބްދުލް ނާސިރު ބަރަކާތު ބުނެފިއެވެ.

އޭޝިއަން ކަޕުގެ ކޮލިފިކޭޝަންގައި ރޭ ރާއްޖެއާއި ވާދަކޮށް މޮޅުވި މެޗަށްފަހު ފަލަސްތީން ކޯޗު ބުނީ ރާއްޖެއާ ދެކޮޅަށް ކުޅެ މޮޅުވީ އިންސާފުވެރި ނަތީޖާއަކުން ކަމަށާއި، އަދި ދިވެހި ރާއްޖެއަކީ އަބަދުވެސް ފަލަސްތީނުގެ ނަސީބާއި ގުޅިފައިވާ ތަނެއް ކަމަށެވެ.

އޭނާ ބުނީ ރާއްޖޭގެ މުހިއްމު ދެ ކުޅުންތެރިއަކު ރޭގެ މެޗުގައި ނެތުމުން އެތަން ރާއްޖޭގެ ޓީމުން ދެއްކި ކަމަށާއި އެހެން ނަމަވެސް މިހާރު ޓީމުގައި ތިބި ކުޅުންތެރިންނަކީ ވެސް މޮޅު ކުޅުންތެރިން ކަމަށެވެ.

ރޭގެ މެޗަކީ 17 އަހަރަށްފަހު ކީޕަރު އިމްރާނާއި ނުލާ ރާއްޖެއިން ކުޅުނު ފުރަތަމަ ވާދަވެރި މެޗެވެ. އަދި ރާއްޖޭގެ ގައުމީ ޓީމުގެ އިތުބާރު ފޯވާޑްވެސް އަނިޔާގައި ހުރުމުގެ ސަބަބުން ރޭގެ މެޗު ކުޅެފައެއް ނުވެއެވެ.

ބަރަކާތު ބުނީ އޮމާންއަކީ ގުރޫޕްގެ ފެވަރިޓުން ކަމަށާއި، އެހެން ނަމަވެސް ދެން އޮތް ޓީމުތަކަށްވެސް ފުރުސަތު އެބައޮތް ކަމަށެވެ.

މީގެ އިތުރުން ބަރަކާތު ބުނީ ކޮލިފައިންގައި ކުރިއަށްދިޔުމަށް އެންމެ މުހިންމީ ކޮންމެ ޓީމެއް ވެސް އިތުބާރާއެކު މެޗުތަކަށް ތައްޔާރުވުން ކަމަށާއި މެޗެއްގެ ނަތީޖާ ނެރެންޖެހޭނީ ދަނޑުމަތިން ކަމަށެވެ.

ކޮލިފައިން ދެން ކުޅޭ މެޗުތައް އޮންނާނީ އަންނަ ޖޫން މަހު އެވެ. ޖޫން މަހު 13 ވަނަ ދުވަހު ރަށުން ބޭރުގައި ރާއްޖެ ކުޅޭނީ ބޫޓާނާ އެވެ. ފަލަސްތީން އަމިއްލަ ދަނޑުގައި ކުޅޭނީ އޮމާންއާ އެވެ.