ޔޫރަޕުގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) އަށް ޕޮޒިޓިވްވި އާސެނަލްގެ ކޯޗު މިކޭލް އާޓެޓާ ގެ ބަލިހާލު އަންނަނީ ރަނގަޅުވަމުން ކަމަށް އޭނާ ބުނެފިއެވެ.

އާސެނަލްގެ ކޯޗު އާޓެޓާ ކޮރޯނާވައިރަސް (ކޮވިޑް-19) އަށް ޕޮޒިޓިވްވިއިރު، ދާދިފަހުން ވަނީ އާސެނަލްގެ ކުޅުންތެރިންނާއި އޮފިޝަލުން ކަރަންޓީނުކޮށްފައެވެ.

އާސެނަލުން ޔުރޮޕާ ލީގުގައި މީގެ ދެ ހަފުތާ ކުރިން ގްރީސްގެ އޮލިމްޕިއާކޯސްއާ ބައްދަލުކުރިއިރު، ދާދި ފަހުން އޮލިމްޕިއާކޯސްގެ ވެރިޔާ އެވަންޖެލޯސް މަރިނާކިސް ވަނީ ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައެވެ. ރިޕޯޓުތައް ބުނާގޮތުން ލަންޑަނުގައި ކުޅުނު މި މެޗަށްފަހު އާސެނަލްގެ ބައެއް ކުޅުންތެރިން ވަނީ އޭނާއާ ބައްދަލުކޮށްފައެވެ.

އާސެނަލްގެ ކޯޗު އާޓެޓާ އޭނާގެ ޓްވިޓާގައި ބުނީ އޭނާއަށް ދުއާކޮށްދިން އެންމެނަށް ޝުކުރުއަދާ ކުރާ ކަމަށާއި، މިއީ އުނދަގޫ ހާލަތެއް ކަމަށެވެ. މީގެއިތުރުން އާޓެޓާ ބުނީ ރަނގަޅު ސިއްހަތެއްގައި ހުރުމަކީ އެންމެ މުހިންމުކަން ކަމަށާއި އެހެން ކަމުން ސިއްހަތަށް ވިސްނުމަށް އާޓެޓާ ވަނީ ގޮވާލައިފައެވެ. އަދި އެންމެން އެކުވެ ކުރާ މަސައްކަތުން މިހާލަތުން އަރައިގަނެވޭނެ ކަމަށްވެސް އާޓެޓާ ބުންޏެވެ.

އާޓެޓާ ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާއިރު، އިނގިރޭސި ޕްރިމިއާ ލީގުގެ މެޗުތައް މިހާރުވަނީ ފަސްކޮށްފައެވެ. ލީގު މެޗުތައް ފަސްކުރަން ނިންމީ އާސެނަލްގެ ކޯޗު މިކޭލް އާޓެޓާ އާއި ޗެލްސީގެ ޒުވާން ފޯވާޑް ކަލުމް ހަޑްސަން-އޮޑޯއި ކޮރޯނާވައިރަސް (ކޮވިޑް-19) އަށް ޕޮޒިޓިވްވުމާއި ގުޅިގެންނެވެ.

އިންގްލެންޑުގައި 590 މީހުންނަށް މިހާތަނަށް މި ބަލި ޖެހިފައިވާއިރު، މި ބައްޔާ ގުޅިގެން އެގައުމުން ވަނީ 10 މީހުން މަރުވެފައެވެ.

ދުނިޔޭގެ ގިނަ ގައުމުތަކުން ކޮރޯނާވައިރަސް (ކޮވިޑް-19) މިހާރު ފެނިފައިވާއިރު، ގިނަ ގައުމުތަކުން އަންނަނީ ސަލާމަތީ ފިޔަވަޅުތައް ވަރުގަދަ ކުރަމުންނެވެ. އެގޮތުން އަންނަ އޭޕްރީލް މަހުގެ ތިންވަނަ ދުވަހުގެ ނިޔަލަށް އެއްވެސް ކުޅިވަރު ހަރަކާތެއް ނުބޭއްވުމަށް އިޓަލީން ނިންމާފައިވާއިރު، ސްޕެނިޝް ލީގާއި ފްރެންޗު ލީގުގެ މެޗުތައްވެސް މިހާރު ވަނީ ފަސްކޮށްފައެވެ.