ކޮންމެ ކަމެއް ކުރާއިރުވެސް ލިބޭނެ އެންމެ ބޮޑު ކާމިޔާބީ އަކީ އެކުގައި މަސައްކަތްކުރުން: ނައިބު ރައީސް
ކޮންމެ މީހަކު ވެސް އެމީހެއްގެ ވާޖިބެއްގެ ގޮތުގައި ދެކިގެން އެކަކު އަނެކަކަށް އަޅާލަންޖެހޭ
ޖަމާލުއްދީން ސުކޫލަށް 35 އަހަރު ފުރުން ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ނައިބު ރައީސް ވާހަކަފުޅު ދައްކަވަނީ
ކޮންމެ ކަމެއް ކުރާއިރުވެސް ލިބޭނެ އެންމެ ބޮޑު ކާމިޔާބީ އަކީ އެކުގައި މަސައްކަތްކުރުން ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ޖަމާލުއްދީން ސުކޫލަށް 35 އަހަރު ފުރުން ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަ ދައްކަވަމުން ނައިބު ރައީސް ވިދާޅުވީ ކޮންމެ މައިދާނެއްގައި ވެސް އެކުގައި މަސައްކަތް ކުރެވޭނެ މާޙައުލެއް ޤާއިމުކުރެވޭނީ އިހްތިރާމު ކޮށްގެން ކަމަށެވެ. އެގޮތުން މުދައްރިސުންނާއި މައިންބަފައިންނާއި ދޮށީ މީހުންނަށް އިހްތިރާމު ކުރަންޖެހޭނެ ކަމަށް އެމަނިކުފާނު ވިދާޅުވިއެވެ. ނައިބު ރައީސް ވިދާޅުވީ ޓީޗަރުން އެ ކުރާ ބުރަ މަސައްކަތަކީ އެ ދަރިވަރުންނަށްޓަކައި ކޮށްދޭ މަސައްކަތެއްގެ ގޮތުގައި ބަލައިގަނެ ޝުކުރު އަދާކުރަން ޖެހޭނެ ކަމަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވަނީ އެމަނިކުފާނުގެ ތަޢުލީމީ ޙަޔާތަށް އަލިއަޅުއްވާލައްވާ ވާހަކަފުޅު ދައްކަވާފައެވެ. އަދި އެމަނިކުފާނު ވިދާޅުވީ މިއަދު ސްކޫލުގައި ކިޔަވާ ކުދިންނަށް އެއްވެސް ދަތި އުނދަގޫ ކަމަކާ ނުލައި، ކިޔެވުމުގެ މަގު ތަނަވެސްވެފައި އޮތުމުން އެކަމުގެ ބޭނުން ރަނގަޅަށް ހިފާ ޝުކުރުވެރިވާން ޖެހޭނެ ކަމަށެވެ.
ކޮންމެ މީހަކު ވެސް އެމީހެއްގެ ވާޖިބެއްގެ ގޮތުގައި ދެކިގެން އެކަކު އަނެކަކަށް އަޅާލުމަށް ނައިބު ރައީސް ވަނީ އެދިވަޑައިގެންފައެވެ.
ޖަމާލުއްދީން ސްކޫލަކީ ވަރަށް ގިނަ ކާމިޔާބީތަކެއް ޙާޞިލުކޮށްފައިވާ ނަމޫނާ ސްކޫލެއްކަން ފާހަގަކުރައްވާ ނައިބު ރައީސް ވިދާޅުވީ ދިވެހި ރާއްޖެ މިއަދު މިދެކޭ ތަރައްޤީ ޙާޞިލުކުރުމަށްޓަކައި އެތައް ބައިވެރިން އެ ސްކޫލުން އުފައްދާފައިވާ ކަމަށެވެ.
ޖަމާލުއްދީން ސްކޫލުގެ 35 ވަނަ އަހަރީ ދުވަސް ފާހަގަކުރަމުން އަންނައިރު އެ ސްކޫލަކީ ނުކުޅެދުންތެރިކަން ހުންނަ ކުދިންނަށް މަދަރުސީ ތަޢުލީމު އެންމެ ފުރަތަމަ ފޯރުކޮށްދޭން ފެށި ސުކޫލެވެ. ހަމައެހެންމެ 1997 ވަނަ އަހަރު ތިމާވެށީގެ ފެހިފަތް ވެސް އެ ސްކޫލަށް ވަނީ ލިބިފައެވެ.
