ހުކުރު 02 އޮކްޓޯބަރ 2020
12 އަތަ
1442 ސަފަރު 14
ފަތިސް 04:41
އިރުއަރާ 05:52
މެންދުރު 12:00
އަސްރު 15:09
އިރުއޮއްސޭ 18:00
އިޝާ 19:11
ވޯލްޑް ކަޕް އަދި އޭޝިއަން ކަޕް ކޮލިފިކޭޝަން

ރާއްޖެ-ޗައިނާ މެޗު ތައިލެންޑަށް ބަދަލުކުރަނީ

  • ރާއްޖޭގައި ކުޅުނު މެޗުން ޗައިނާ މޮޅުވީ 5-0 އިން

ކ. މާލެ | 13 ފެބްރުއަރީ 2020 | ބުރާސްފަތި 14:43 | 5,069

ރާއްޖެ އާއި ޗައިނާ ބައްދަލުކުރި މެޗުގެ ތެރެއިން - މިހާރު

ފީފާ ވަރލްޑް ކަޕް އަދި އޭއެފްސީ އޭޝިއަން ކަޕްގެ ޖޮއިންޓް ކޮލިފިކޭޝަނުގައި އަންނަ މާޗު މަހު 26 ވަނަ ދުވަހު ޗައިނާގައި ރާއްޖެ އާއި ޗައިނާ ކުޅެން ހަމަޖެހިފައި އޮތް މެޗު، ތައިލެންޑަށް ބަދަލުކުރުމަށް މަޝްވަރާކުރަމުން އަންނަ ކަމަށް ޗައިނާގެ މީޑިއާތަކުން ރިޕޯޓުކޮށްފި އެވެ.

ޗައިނާގައި ކުޅެން ހަމަޖެހިފައި އޮތް މެޗު ތައިލެންޑަށް ބަދަލުކުރުމަށް މަސައްކަތް ކުރަމުންދަނީ އެ ގައުމުގައި މިހާރު ހަލުވިކަމާ އެކު ފެތުރެމުން އަންނަ ކޮރޯނާ ވައިރަހުގެ ސަބަބުންނެވެ. މި މެޗު ތައިލެންޑުގައި ކުޅޭނެކަން އަދި ޔަގީން ނުވިޔަސް، ޗައިނާގެ މީޑިއާތަކުން ރިޕޯޓުކުރާ ގޮތުގައި ޗައިނާއިން ބޭނުންވަނީ މި މެޗު ތައިލެންޑުގެ ބުރިއަމް ޕޮރޮވިންސްގައި ހުންނަ ޗޭންގް އެރީނާގައި ކުޅުމަށެވެ. އެ ދަނޑަކީ 32،600 މީހުންގެ ޖާގައިގެ ދަނޑެކެވެ.

މީގެ ކުރިން ރާއްޖޭގެ ގައުމީ ޓީމުގެ ކޯޗަކަށް ހަމަޖެއްސި ނެދަލެންޑްސްގެ މާޓިން ކޫޕްމަން ވެސް ވަނީ ޗައިނާގައި މި މެޗު ނުކުޅުމުގެ ފުރުސަތު އެބައޮތް ކަމަށް ބުނެފައެވެ.

ޗައިނާ މެޗަށް ތައްޔާރުވުމަށް ގައުމީ ޓީމުން ވަނީ ފަރިތަކުރުންތައް ފަށާފައެވެ. އެގޮތުން މިހާރު ވަނީ 31 ކުޅުންތެރިންގެ ސްކޮޑެއްވެސް އެކުލަވާލާފައެވެ.

އަންނަ މާޗު މަހު 26 ވަނަ ދުވަހު ޗައިނާއާ ދެކޮޅަށް ރާއްޖެ ނުކުންނައިރު، ރާއްޖޭގައި ކުޅުނު މެޗުން ޗައިނާ ވަނީ 5-0 އިން ރާއްޖެ ބަލިކޮށްފައެވެ. އެކަމަކު އޭގެ ފަހުން ސީރިއާ އަތުން 2-1 އިން ޗައިނާ ބަލިވުމުން އެ ޓީމުގެ ކޯޗު އިޓަލީގެ މާސެލޯ ލިއްޕީ ވަނީ މަގާމުން އިސްތިއުފާ ދީފައެވެ.

ކޮލިފައިންގައި ރާއްޖެ އޮތް ގްރޫޕް އޭގެ އެއްވަނައިގައި ސީރިއާ އޮތީ 54 މެޗުންވެސް މޮޅުވެ 15 ޕޮއިންޓާއެކު އެވެ. ދެވަނައިގައި އޮތް ޗައިނާއިން ވަނީ 4 މެޗުން 7 ޕޮއިންޓް ހޯދާފައެވެ. ތިންވަނައިގައި އޮތް ފިލިޕީންސް ވެސް ވަނީ 5 މެޗުން 7 ޕޮއިންޓް ހަމަކޮށްފައެވެ. ހަތަރުވަނައިގައި އޮތް ރާއްޖެއަށް 5 މެޗުން ލިބިފައިވަނީ 6 ޕޮއިންޓެވެ. އެންމެ ފުލުގައި އޮތް ގުއާމަށް އަދި ޕޮއިންޓެއް ނުލިބެ އެވެ.

އެންމެ ފަހުން އަޕްޑޭޓް ކުރީ: 6 މަސް ކުރިން | ރިވިއު ކުރީ: ޒިހްނަތު ހަސަން

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.