ކޮރޯނާވައިރަސް ފެތުރުމުގެ ބިރު އޮތުމާއިއެކު އޮސްޓްރޭލިއާއަށް ދަތުރުކުރި ޗައިނާގެ އަންހެން ގައުމީ ފުޓުބޯޅަ ޓީމު އެގައުމުގައި ކަރަންޓީނުކޮށްފި އެވެ.
ޖަޕާނުގައި މިއަހަރު ބޭއްވުމަށް ހަމަޖެހިފައިވާ އޮލިމްޕިކްސް ގޭމްސްގެ ކޮލިފިކޭޝަން މެޗު ކުޅުމަށްޓަކައި އޮސްޓްރޭލިއާއަށް ދިޔަ ޗައިނާގެ ގައުމީ ފުޓުބޯޅަ ޓީމު ތިބި ހޮޓެލް ކަރަންޓީނުކޮށްފައިވާއިރު އޮސްޓްރޭލިއާގެ ސިއްހީ އިދާރާގެ އޮފިޝަލަކު ވަނީ ކަށަވަރު ކޮށްދީފައެވެ.
ޗައިނާގެ ޓީމު އޮސްޓްރޭލިއާގައި ތިބޭ ހޮޓަލުން ނިކުތުން އަންނަ މަހުގެ ފަސްވަނަ ދުވަހާއި ހަމައަށް ވަނީ މަނާ ކޮށްފައެވެ. އޮސްޓްރޭލިއާގެ ސިއްހީ އިދާރާގެ އިސް އޮފިޝަލަކު ބުނީ އަދި މިހާތަނަށް ޗައިނާގެ އެއްވެސް ކުޅުންތެރިއެއްގެ ފަރާތުން ކޮރޯނާވައިރަސްގެ އެއްވެސް ނިޝާނެއް އަދި ޝައްކުކުރެވޭފަދަ ކަމެއް ފެނިފައި ނުވާ ކަމަށާއި ކުޅުންތެރިންގެ ހާލު ވަރަށް ގާތުން ބަލަމުން އަންނަ ކަމަށެވެ.
ކުރިން ޗައިނާގެ ވޫހާން ސިޓީގައި ކުޅުމަށް ހަމަޖެހުނު މެޗު ފުރަތަމަ ބަދަލުކުރީ ޗައިނާގެ އެހެން ސިޓީއަކަށެވެ. އެހެން ނަމަވެސް ކޮރޯނާވައިރަސް ބާރު ސްޕީޑެއްގައި ފެތުރެމުން އައުމާއިއެކު އޭޝިއަން ފުޓުބޯޅަ ފެޑެރޭޝަނުން ވަނީ އެ މެޗު އޮސްޓްރޭލިއާގައި ކުޅޭ ގޮތަށް ހަމަޖައްސައިފައެވެ.
ޗައިނާގެ އިތުރުން ތައިލެންޑް، ވައިނީޒް ޓައިޕޭ އަދި އޮސްޓްރޭލިއާ ވާދަކުރާ ކޮލިފިކޭޝަންގެ މެޗުތައް ކުރިން 3 ފެބުރުއަރީގައި ފަށަން ހަމަޖެހިފައިވީ ނަމަވެސް ޗައިނާގެ ޓީމު ތިބޭ ހޮޓާ ކަރަންޓީނު ކުރުމާއި ގުޅިގެން މި މެޗުތަށް މިހާރުވަނީ މުއްދަތެއް ނެތް ގޮތަށް ފަސްކޮށްފައެވެ.
ޗައިނާއިން ވަނީ އެގައުމުގައި މިއަހަރު ބާއްވަން ހަމަޖެހިފައިވާ ހުރިހާ ކުޅިވަރު ހަރަކާތްތަކެއް ނުބާއްވަން ނިންމައިފައެވެ.
ކޮރޯނާވައިރަސް އެންމެ ފުރަތަމަ ފެނިފައިވަނީ ޑިސެމްބަރު މަހު ޗައިނާގެ ކަމުގައިވާ ވޫހާން ސިޓީއިންނެވެ. ނަމަވެސް މި ވައިރަސް މިހާރުވަނި މުޅި ޗައިނާއަށް ކަހަލަ ގޮތަކަށް ފެތުރިފައެވެ.
