ދަރިފުޅު ސާރާގެ "ލަވް އާޖްކަލް" ޓްރެއިލަރ ސައިފަށް ކަމުނުދިޔަ ؟!

2009 ވަނަ އަހަރުގެ ބޮލީވުޑުގެ ކޮމެޑީ-ރޮމޭންޓިކް ފިލުމެއްކަމަށްވާ "ލަވް އާޖް ކަލް" ގެ ކުރީގެ ޓްރެއިލަރ މާ ކަމުދާކަމަށް ކުރީގެ ފިލްމުގެ ބަތަލުގެ ރޯލު ކުޅެފައިވާ ސައިފް އަލީ ޚާން ބުނެފިއެވެ.

ލަވް އާޖްކަލްގެ ފްރެންޗައިޒް ފިލުމުގެ ޓްރެއިލަރއަށް ވުރެ، އޮރިޖިނަލް ފިލުމުގެ ޓްރެއިލަރ މާ ކަމުދާކަމަށް ކުރީގެ ފިލުމުން ފެނިގެންދިޔަ ސައިފް އަލީ ޚާން ބުނެފައިވާއިރު، މިއަހަރުގެ ފިލުމުން ބަތަލާގެ ރޯލުން ފެނިގެންދަނީ ސައިފްގެ ދަރި ސާރާ އަލީ ޚާންއެވެ.

ބެލުންތެރިންގެ މެދުގައި ބޮޑު މަޤުބޫލުކަމެއް ލިބިގެންދިޔަ މި ފިލުމުގެ ޓްރެއިލަރ މިހާރު ރިލީސް ކޮށްފައިވާއިރު، ސައިފް ވަނީ ދެ ފިލުމުގެ ޓްރެއިލަރ އަޅާކިޔާފައެވެ.

އެގޮތުން ސާރާއަށް އަބަދުވެސް ކާމިޔާބަށް އެދޭ ކަމަށާއި، ނަމަވެސް މި ފިލުމުގެ ކުރީގެ ޓްރެއިލަރ އޭނާއަށް މާ ކަމުދާ ކަމަށް ފިލްމާއި ގުޅޭގޮތުން ވާހަކަދައްކަމުން ސައިފް ބުންޏެވެ.

މި ފިލުމުގެ ޑައިރެކްޓަރ އިމްތިޔާޒް އަލީ ބުނީ، މިފަހަރުގެ ފިލުމު ކުރީގެ ފިލްމާއި ވަރަށް ބޮޑަށް ތަފާތުވާނެ ކަމަށާއި، ކުރީގެ ފިލުމުގައި ދައްކުވައިދިން ކަންކަން ޒަމާނަށް ފެތޭ ގޮތަށް އާ ޚިޔާލުތަކާއެކު ހުށައަޅާފައިވާނެ ކަމަށެވެ.

ވެލެންޓައިން ޑޭ އާ ދިމާކޮށް މިފެށޭ ފެބްރުއަރީ މަހުގެ 14 ވަނަ ދުވަހު ރިލީސް ކުރުމަށް ހަމަޖެހިފައިވާ މި ފިލުމުގެ ލީޑް ރޯލުން ފެނިގެން ދަނީ ސާރާ އަލީ ޚާނާއި، ކާރތިކް އާރްޔަންއެވެ.

މި ފިލުމުގެ އޮރިޖިނަލް ވަރޝަންގައި ފެނިގެންގޮސްފައިވަނީ ސައިފް އަލީ ޚާނާއި، ބަތަލާ ދީޕީކާ ޕަޑުކޯންއެވެ.