2020 ވަނަ އަހަރުގެ ދިރާސީ އައު އަހަރަށް ދަރިވަރުންނަށް ހިތްވަރު ދިނުމުގެ ގޮތުން ސަރުކާރުގެ މިނިސްޓަރުން 19 އަތޮޅެއްގެ ސްކޫލް އެސެމްބްލީގައި ބައިވެރިވެވަޑައިގެންފިއެވެ.

އެޑިއުކޭޝަން މިނިސްޓްރީން ބުނީ ރައީސް އިބްރާހިމް މުޙައްމަދު ޞާލިޙުގެ އިސްނެންގެވުމުގެ މަތިން ދަރިވަރުންނަށް ހިތްވަރު ދިނުމަށް ރާއްޖޭގެ ހުރިހާ ޞަރަޙައްދެއްގައި މިއަދު ބޭއްވި އެސެމްބްލީތަކުގައި ކެބިނެޓުގެ ވަޒީރުންނާއި، ސަރުކާރުގެ އިސްވެރިން ބައިވެރިވެވަޑައިގެންވި ކަމަށެވެ.

ދިރާސީ އައު އަހަރުގެ ފުރަތަމަ ދުވަހުގެ އެސެމްބްލީގައި ވަޒީރުންނާއި، ސަރުކާރުގެ އިސްވެރިން ބައިވެރިވެވަޑައިގެން ވަނީ ދަރިވަރުންނަށް ހިތްވަރު ދެއްވާ ނަޞޭޙަތްތެރިވެވަޑައިގެންފައެވެ. މިއީ ސްކޫލްތަކުގެ ދިރާސީ އައު އަހަރު ފެށުމުގެ ގޮތުން އަލަށް ސަރުކާރަކުން ކުރި ކަމެކެވެ.

އެގޮތުން ފިޝަރީޒް މިނިސްޓަރ ޒަހާ ވަހީދު ވަނީ އދ. އަތޮޅު ތަޢުލީމީ މަރުކަޒުގެ އެސެމްބްލީގައި ބައިވެރިވެވަޑައިގެން ދަރިވަރުންނަށް ނަޞޭޙަތް ދެއްވާ ހިތްވަރު ދެއްވިއެވެ. އޭގެ އިތުރުން އއ. އަތޮޅަށް ސައިންސް އެންޑް ޓެކްނޮލަޖީ މިނިސްޓަރު މަލީހު ޖަމާލް ވަނީ ވަޑައިގެން އއ. އަތޮޅު އެޑިއުކޭޝަން ސެންޓަރުގެ ދިރާސީ އައު އަހަރު ފެށުމުގެ ރަސްމިއްޔާތުގައި ވާހަކަ ދައްކަވާފައެވެ.

މީގެ އިތުރުން ދިރާސީ އާ އަހަރުގެ ފެށުން ފާހަގަ ކުރުމަށް ރ. އުނގޫފާރު ސްކޫލްގައި ބޭއްވުނު ޚާއްޞަ އެސެމްބްލީ މިނިސްޓަރ އޮފް ފިނޭންސް އިބްރާހީމް އަމީރު ވަނީ ޝަރަފުވެރި ކޮށްދެއްވާފައެވެ. އަދި ހައުސިން މިނިސްޓަރު އައިމިނަތު އާތިފާ ވަނީ ބައިވެރިވެވަޑައިގެން ދަރިވަރުންނާއި ބެލެނިވެރިންނާއެކު ވަގުތު ހޭދަކުރައްވާފައެވެ.

އަދި ދިރާސީ އައު އަހަރު ފެށުމުގެ ގޮތުން ގދ. އަތޮޅު ތަޢުލީމީ މަރުކަޒުގައި ބޭއްވި ޚާއްޞަ އެސެމްބްލީ ޝަރަފުވެރިކޮށްދެއްވައި، މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މައުމޫން ވަނީ ދަރިވަރުންނާއި ބައްދަލުކުރައްވާފައެވެ. ދިރާސީ އައު އަހަރުގެ ކިޔެވުން ފެށުމަށް ބޭއްވި ފުރަތަމަ އެސެމްބްލީގައި ޓްރާންސްޕޯޓް މިނިސްޓަރު ޢާއިޝަތު ނަހުލާ ބައިވެރިވެވަޑައިގެންފައިވަނީ މުލަކު ސްކޫލުގައެވެ.

މި ޕްރޮގުރާމުގެ ތެރެއިން 19 އަތޮޅުގެ ސްކޫލްތަކަށް ވަޒީރުންނާއި ސަރުކާރުގެ އިސްފަރާތްތައް ވަޑައިގެން ދަރިވަރުންނާ ބައްދަލު ކުރައްވާ ވާހަކަ ދައްކަވާފައިވެއެވެ. އަދި ބެލެނިވެރިންނާއި މުދައްރިސުން ސަމާލުކަން ދޭންވާ މުހިންމު ކަންކަމުގެ މައްޗަށް އަލިއަޅުވާލައްވާ ވަޒީރުންނާއި ސަރުކާރުގެ އިސްފަރާތްތަކުން ވަނީ ވާހަކަ ދައްކަވާފައެވެ.