ކައުންސިލްތަކަށް ބަޖެޓް ބަހާނެ ގޮތުގެ ފޯމިއުލާއެއް އޮތް ނަމަވެސް އެއަށް އަމަލެއް ނުކުރޭ: އެލްޖީއޭ
9 ނޮވެމްބަރު 2019 | ހޮނިހިރު 08:33ކައުންސިލްތައް އިދާރީގޮތުން ލާމަރުކަޒު ނުކުރެވި އޮތީ މާލީގޮތުން ލާމަރުކަޒު ނުވެއޮތީމަ
އެލްޖީއޭގެ ޑިރެކްޓަރ ޖެނެރަލް ޝަމްއޫނު އާދަމް
ކައުންސިލްތަކަށް ބަޖެޓް ކަނޑައަޅާ އެ ބަހާނެ ގޮތުގެ ފޯމިއުލާއެއް އޮތް ނަމަވެސް އެއަށް އަމަލުކޮށްފައި ނުވާ ކަމަށާއި، ކައުންސިލްތައް ލާމަރުކަޒު ކުރެވުނީ ސިޔާސީ ގޮތުން އެކަނި ކަމަށް ލޯކަލް ގަވަރމަންޓް އޮތޯރިޓީ (އެލްޖީއޭ) އިން ބުނެފިއެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމުގައި ވާހަކަދައްކަވަމުން އެލްޖީއޭގެ ޑިރެކްޓަރ ޖެނެރަލް ޝަމްއޫނު އާދަމް ވިދާޅުވީ މިހާރު އޮތް ސަރުކާރު ވެރިކަމާ ހަވާލުކުރުމުގެ ކުރިން މިދިޔަ އަހަރުތަކުގައި ކައުންސިލްތައް މާލީ ގޮތުން ވެސް އަދި އިދާރީ ގޮތުން ވެސް ލާމަރުކަޒު ކުރެވިފައި ނެތްކަމަށެވެ. ނަމަވެސް ކަންކަން ކުރެވިފައި އޮތްގޮތުން ސިޔާސީގޮތުން ލާމަރުކުރެވިފައި އޮތޭ ބުނެވިދާނެ ޝަމްއޫނު ވިދާޅުވިއެވެ.
އޭނާ ވިދާޅުވީ އިދާރާ ގޮތުން ލާމަރުކަޒު ނުވާކަމަށް ވިދާޅުވަނީ ކައުންސިލްތަކުން ކުރަންޖެހޭ މަސައްކަތްތައް ކައުންސިލްތަކުން ނުކޮށް އޮތުމުން ކަމަށާއި، އެއީ މަގުބައްތި ދިއްލުންކަމުގައި ވިޔަސް ކުނިކެހުން ކަމުގައި ވިޔަސް ރައްޔިތުންނަށް ބޭނުންވާ ހިދުމަތްތައް ހަގީގަތުގައި ނުދެވޭ ކަމަށެވެ.
ޝަމްއޫނު ވިދާޅުވީ ހިލޭ އެހީ ބަހާލުމުގައި ގާނޫނުގައި ވަކިކަހަލަ ކަންތައްތަކަށް ބަލަންވާނެ ކަމަށް ބުނެފައިވާ ކަމަށެވެ. އޭގެ ތެރޭގައި އާބާދީއާއި ބިމުގެ ބޮޑުމިނާއި ދަތުރުުކުރަންޖެހޭ ވަރާއި މި ކަންތައްތައް ހުންނަ ކަމަށެވެ.
ވަރަށް ކުރީންސުރެ ބަޖެޓް ބަހާނެ ގޮތުގެ ފޯމިއުލާ އެކުލަވާލައިފިވީ ނަމަވެސް، ބަޖެޓް ދީފައިވަނީ ފޯމިއުލާގައިވާ ގޮތަކަށް ނޫން ކަމަށެވެ. މީގެ އިތުރުން 2014 ވަނަ އަހަރުން ފެށިގެން ފޯމިއުލާ އެކުލަވާލާފައި ކޮންމެ އަހަރަކުވެސް ސަރުކާރުން ފިނޭންސް މިނިސްޓްރީއަށް ހުށަހަޅާ އެލްޖީއޭއިން އެގޮތަށް ބަހާލަދޭން އެދުނު ނަމަވެސް ބަޖެޓް ބަހާފައިވަނީ އެގޮތަށް ނޫން ކަމަށެވެ.
އަންނަ އަހަރަށް ލަފާކުރާ ދައުލަތުގެ ބަޖެޓުން ކައުންސިލްތަކަށް ދޭ ހިލޭ އެހީގެ ޖުމްލަ މިންވަރަކީ ޑޮމެސްޓިކް ރެވެނިއުގެ 5 އިންސައްތައިގެ އިތުރުން، ބިމާއި، ރަށްރަށާއި، ފަޅާއި ފަރުފަދަ ތަންތަނުން ކުލީގެ ގޮތުގައި ލިބޭ އާމްދަނީގެ 40 އިންސައްތައެވެ.
އެގޮތުން 2020 ވަނަ އަހަރު ކައުންސިލްތަކަށް ބްލޮކް ގްރާންޓުގެ ގޮތުގައި 1.6 ބިލިއަން ރުފިޔާ ދޭގޮތަށް ހަމަޖެހިފައިވެއެވެ. އެއީ 2019 ވަނަ އަހަރުގެ ބަޖެޓުގައި ފާސްކުރި 656 މިލިއަން ރުފިޔާއަށްވުރެ 2.4 ގުނަ އިތުރު އަދަދެކެވެ.
