އައިޖީއެމްއެޗުން، ހިލޭ ކަކުލުހުޅު ބަދަލުކުރުމުގެ 100 ވަނަ އޮޕަރޭޝަން ކާމިޔާބުކަމާއެކު ނިންމާލައިފި
3 ނޮވެމްބަރު 2019 | އާދީއްތަ 14:46މިއީ އާސަންދައިން ހިލޭ ކުރިއަށްގެންދާ ޕްރޮގްރާމެއް
100 ވަނަ އަށް ކަކުލުހުޅު ބަދަލުކުރި މީހާއާއި ނައިބުރައީސް ބައްދަލުކުރައްވަނީ
އާސަންދައިގެ ހިލޭ އެހީގެ ދަށުން، ކަކުލުހުޅު ބަދަލުކުރުމަށް ކުރި 100 ވަނަ އޮޕަރޭޝަން ކާމިޔާބުކަމާއެކު ނިންމާލައިފިއެވެ.
އިންދިރާގާނދީ މެމޯރިއަލް ހޮސްޕިޓަލް(އައިޖީއެމްއެޗުން) ބުނީ އާސަންދަ ސްކީމްގެދަށުން ހިލޭ ކަކުލުހުޅު ބަދަލު ކުރުމަށް ކުރާ އޮޕަރޭޝަންކުގެ ތެރެއިން 100 ވަނަ އޮޕަރޭޝަން ކުރީ އާދީއްތަ ދުވަހުކަމަށެވެ.
މި އޮޕަރޭޝަން ކުރެއްވީ ޑރ.ހުސެން ފައިސަލްއާއި ޑރ. އިސްމާއިލް ޒާހިރު ކަމަށް އައިޖީއެމްއެޗުން ބުނެއެވެ. އަދި ހުޅު ބަދަލުކުރި ބަލިމީހާގެ ޙާލަތު ރަނގަޅުކަމަށް ވެސް އައިޖީއެމްއެޗުން ބުނެއެވެ.
100 ވަނަ އޮޕަރޭޝަން ކުރި މީހާގެ ޙާލު ރައީސުލްޖުމްހޫރިއްޔާގެ ނައިބު ފައިސަލް ނަސީމް މިއަދު ބައްލަވާލައްވާ ބަލިމީހާއަށް ހެޔޮ ޝިފާއަކަށް އެދިވަޑައިގެންނެވިއެވެ. އަދި އެމަނިކުފާނު ވަނީ މި އޮޕަރޭޝަންގައި ޙަރަކާތްތެރިވި ޑޮކްޓަރުންގެ ޓީމާއި ބައްދަލުކުރައްވައި އެބޭފުޅުންނަށް މަރުޙަބާ ވިދާޅުވެފައެވެ.
"ޓޯޓަލް ނީ ރިޕްލޭސްމަންޓް ސަރޖަރީ" (ކަކުލު ހުޅު ބަދަލުކުރުމުގެ އޮޕަރޭޝަން) މަޝްރޫޢަކީ ރައްޔިތުންނަށް ފޯރުކޮށްދޭ ޞިއްޙީ ޚިދުމަތް އަވަސްކުރުމަށްޓަކައި ސަރުކާރުން އިސްނަގައިގެން، އާސަންދައިން ކުރިއަށް ގެންދާ މަޝްރޫޢެކެވެ. މި މަޝްރޫޢުގެ ދަށުން އައިޖީއެމްއެޗާއި، ޓްރީޓޮޕް ހޮސްޕިޓަލާއި، މެޑިކާއިން މި އޮޕަރޭޝަން ކުރެއެވެ.
