ދިވެހި ރާއްޖެއިން ތައިލޭންޑުގެ ބެންކޮކްގައި ޤާއިމުކޮށްފައިވާ ރައްޖޭގެ އެމްބަސީ މިމަހުގެތެރޭގައި ހުޅުވާނެކަމަށް މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު ވިދާޅުވެއްޖެއެވެ.

ރާއްޖެ އެމްވީ އެޑިޓަރުންނާއެކު ފޮރިން މިނިސްޓްރީގައި ބޭއްވި ބައްދަލުވުމުގައި ވާހަކަފުޅު ދައްކަވަމުން ފޮރިން މިނިސްޓަރ ޝާހިދު ވިދާޅުވީ، ޚަރިޖީ ސިޔާސަތު އޭގެ ފުރިހަމަ ގޮތުގައި ތަންފީޒުކުރުމާއެކު، ޢާއްމު ރައްޔިތުންނަށް އޭގެ ވާނުވާ އެންމެ ފުރިހަމަގޮތުގައި އެގިގެން ދިއުމަކީ އެމަނިކުފާނު ވަރަށް އަހައްމިއްޔަތުކަމެއް ދެއްވާކަމެއް ކަމަށެވެ.

އެމަނިކުފާނުގެ ކުރިޔަށް ރާއްވަވާފައި ހުރި ޕްރޮގުރާމުތަކައް އިޝާރާތް ކުރައްވާ ވިދާޅުވީ، މިމަހުގެ ފަނަރަވަނަ ދުވަހު ތައިލޭންޑަށް ރަސްމީ ދަތުރުފުޅެއް ކުރެއްވުމަށް ހަމަޖެހިފައިވާކަމަށެވެ. އެ ދަތުރުފުޅުގެ މައި އެޖެންޑާގެ ތެރޭގައި ބެންކޮކްގައި ޤާއިމްކޮށްފައިވާ ދިވެހިރާއްޖޭގެ އެމްބަސީ ރަސްމީކޮށް ހުޅުވުމަށް ހަމަޖެހިފައިވާކަމަށް މިނިސްޓަރ ވިދާޅުވިއެވެ. އެމަނިކުފާނު ވިދާޅުވީ ރަސްމީކޮށް ނުހުޅުވި ކަމުގައިވީ ނަމަވެސް އެމްބަސީގެ ޚިދްމަތް މިހާރުވެސް ދެމުން އަންނަކަމަށެވެ. އަދި އެމްބަސީ ހުޅުވުމުން އެމްބަސީގެ ޚިދުމަތުގެ ފެންވަރު ރަނގަޅުވެ ޚިދުމަތް ފުޅާކުރުމުގެ ފުރުޞަތު ފަހިވެ، ތައިލޭންޑުގެ ސަރުކާރާއެކު މުޢާމަލާތްކުރުމަށް ފަސޭހަވެގެންދާނެކަމަށްވެސް މިނިސްޓަރ ވިދާޅުވިއެވެ.

ތައިލޭންޑުގައި ހުންނަ ދިވެހި އެމްބަސީ މިމަހު ހުޅުވާނެ ވާހަކަ ހިއްސާކުރެއްވި ނަމަވެސް، ހުޅުވާނެ ތާރީޚާއި، ދަތުރުފުޅުގެ ރަސްމީ އެޖެންޑާ ހިއްސާކުރައްވާފައެއް ނުވެއެވެ.

ރާއްޖޭގެ އެމްބަސީއެއް ތައިލޭންޑުގަ ޤާއިމުކުރީ 2018 ވަނަ އަހަރުއެވެ. ރައީސް އިބްރާހިމް މުހައްމަދު ސާލިހު ވަނީ މިދިޔަ ސެޕްޓެމްބަރު މަހު މ. ތިބްރޯޒް މުހައްމަދު ޖިނާހު އައްޔަން ކުރައްވާފައެވެ. ފޮރިން މިނިސްޓަރ ވިދާޅުވީ ސަފީރު ތައިލޭންޑުގެ ރަސްގެފާނަށް ފަތްކޮޅު އެރުމުގެ މަރުޙަލާ ކުރިޔަށް ގެންދިއުމުގެ ކަންކަންވެސް އެމަނިކުފާނުގެ ދަތުރުފުޅުގެ ތެރެއިން ހަމަޖެއްސޭތޯ މަސައްކަތްކުރައްވަމުން ގެންދަވާ ކަމަށެވެ.

ރާއްޖެއާއި ތައިލޭންޑާ ދެމެދު 1979 ވަނަ އަހަރު ސިޔާސީ ގުޅުން ޤާއިމުކުރިފަހުން އެކި ދާއިރާތަކުން ގުޅުން ބަދަހިވެފައިވެއެވެ. އޭގެތެރެއިން އެންމެ ފާހަގަކުރެވޭ އެއްކަމަކީ ވިޔަފާރިއާއި ފަތުރުވެރިކަމުގެ ދާއިރާގެ ގުޅުންތަކެވެ. އެންމެ ފަހުގެ ޚަބަރުތަކަށް ބަލާއިރު މިއަހަރުގެ އެޕްރީލް މަހުން ފެށިގެން ދިވެހިންނަށް އޮންއެރައިވަލް ވިސާ ލިބޭނެގޮތް ތައިލޭންޑް ސަރުކާރުން އިންތިޒާމުކުރި ޚަބަރު ފާހަގަކޮށްލެވެއެވެ.

މި ވިސާގެ ދަށުން ފަތުރުވެރިކަމުގެ ބޭނުމަށް 30 ދުވަހުގެ މުއްދަތަކަށް ތައިލެންޑްގައި ތިބެވޭނެއެވެ.