"ނޫރު" ޕާކިސްތާނުގައި ޕްރިމިއާ ކުރަނީ
10 މާރިޗު 2017 | ހުކުރު 11:48ޕާކިސްތާނުގައި އެފިލްމް ޕްރިމިއާ ކުރުމަކީ އޭނާގެ ހުވަފެނެއް
"ނޫރު" ޕްރޮމޯޝަނަލް ޕޯސްޓަރު
ޕާކިސްތާންގެ ލިޔުންތެރިޔެއް ކަމަށްވާ ސަބާ އިމްތިޔާޒް ލިޔެފައިވާ ވާހަކަ "ކަރާޗީ: ޔޯ ކިލިންގް މީ" އަށް ތައްޔާރު ކޮށްފައިވާ ފިލްމް "ނޫރު" ޕާކިސްތާން ގައިވެސް ޕްރިމިއާ ކުރުމަށް ހަމަޖައްސައިފި އެވެ.
އިންޑިއާގެ ފިލްމް ޕްރޮޑިއުސަރު ބުޝާން ކުމާރް އުފައްދާފައިވާ މިފިލްމް އަންނަ އެޕްރީލް މަހުގެ 21 ގައި ޕްރިމިއަރ ކުރުމަށް ހަމަޖައްސާފައިވާއިރު މި ފިލްމް ޕާކިސްތާންގައިވެސް ޕްރިމިއާ ކުރުމަށް ހަމަޖެހިފައިވާ ކަމަށް ބުޝާން ވަނީ ބުނެފައެވެ.
ބުޝާން ބުނީ މިފިލްމަކީ ޕާކިސްތާނުގައި ހުރި އޭނާއަށް އެންމެ ކަމުދާ އެއް ލިޔުންތެރިޔާގެ ވާހަކަ އެވެ.
އަދި މި ފިލްމް ތައްޔާރު ކުރަން ފެށިދުވަހުން ފެށިގެން ޕާކިސްތާނުގައި އެފިލްމް ޕްރިމިއާ ކުރުމަކީ އޭނާގެ ހުވަފެނެއް ކަމަށް ބުޝާން ބުންޏެވެ.
މުމްބާއީގައި ހަރަކާތްތެރިވާ ޒުވާން ނޫސްވެރިއެއްގެ ހަޔާތުގެ މައްޗަށް ބިނާކޮށް ތައްޔާރު ކޮށްފައިވާ މި ފިލްމްގެ ލީޑް ރޯލުން ފެނިގެންދަނީ ސޯނާކްޝީ ސިންހާ އާއި ކަނާން ގިލް އަދި ޝިބާނީ ޑާންޑޭކަރެވެ.
މި ފިލްމުގެ ޓްރެއިލަރ ލޯންޗް ކުރުމަށް ބޭއްވި ޙަފްލާގައި ވާހަކަ ދައްކަމުން ސޮނާކްޝި ބުނީ، ފިލްމުގެ މަސައްކަތް ކުރަމުން ދިޔައިރު ނޫސްވެރިންގެ ދިރިއުޅުން އިހުސާސް ކުރެވުނު ކަމަށާއި، އޭގެ ސަބަބުން ނޫސްވެރިންނަށް ކުރާ އިޚުތިރާމް އިތުރުވެގެން ގޮސްފައިވާ ކަމަށެވެ.
އަދި ކުރިއަށް އޮތް ތާނގައި ނޫސްވެރިންގެ ސުވާލުތަކަށް ބީރު ކަންފަތެއް ނުދީ ވޭތޯ ބަލާނެ ކަމަށް ވެސް އޭނާ ވަނީ ބުނެފައެވެ. އަދި ނޫސްވެރިން އުނދަގޫ ސުވާލު ކުރާ ސަބަބު މިހާރު ވިސްނޭ ކަމަށާއި، އެކަމަށް ވެސް އިޚުތިރާމް ކުރަން ދަސްވެއްޖެ ކަމަށް އޭނާ ވަނީ ބުނެފައެވެ.
