ފެލިކްސްގެ މޮޅު ކުޅުމާއެކު ޔުވެންޓަސްގެ މައްޗަށް އެޓްލެޓިކޯ ކުރި ހޯދައިފި

އިންޓަނޭޝަނަލް ޗެމްޕިއަންސް ކަޕްގައި ޕޯޗުގަލްގެ ޒުވާން ފޯވާޑް ފެލިކްސް ދެއްކި މޮޅު ކުޅުމާއިއެކު ޔުވެންޓަސްގެ މައްޗަށް އެޓްލެޓިކޯއިން ކުރި ހޯދައިފިއެވެ.

ފޯރިގަދަ ކުޅުމެއް ފެނިގެންދިޔަ މި މެޗްގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. އެގޮތުން ދެޓީމުންވެސް ގިނަ ހަމަލާތަކެއް ގޯލާ އަމާޒުކޮށް ވަނީ ފޮނުވާލައިފަ އެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ އެޓްލެޓިކޯ މެޑްރިޑުންނެވެ. މި ލަނޑު އެޓީމަށް ކާމިޔާބު ކޮށްދިނީ މެޗުގެ 23 ވަނަ މިނެޓުގައި ޒުވާން ފޯވާޑް ފެލިކްސްއެވެ. މި ލަނޑަށްފަހު ވެސް އެޓްލެޓިކޯއިން ވަނީ ޔުވެންޓަސްގެ ގޯލަށް ނުރައްކާ ކޮށްފައެވެ.

އެޓްލެޓިކޯއިން ޖެހި ލަނޑާއެކު ޔުވެންޓަސްއިން ވަނީ އެޓީމުގެ އެޓޭކްތަށް ވަރުގަދަ ކޮށްފައެވެ. އެގޮތުން މެޗުގެ 28 ވަނަ މިނެޓުގައި ޔުވެންޓަސް އިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކޮށްފައެވެ.

މެޗުގެ ފުރަތަމަ ހާފު ނިމުމުގެ ކުރިން އެޓްލެޓިކޯގެ ފެލިކްސް ވަނީ އިތުރު ލަނޑެއް ޖަހާ އެޓީމަށް ލީޑު ދެވަނަ ފަހަރަށް ނަގައިދީފައެވެ. މި ލަނޑު އޭނާ ކާމިޔާބު ކުރީ ޔުވެންޓަސްގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައިގެންނެވެ.

މެޗުގެ ދެވަނަ ހާފުގައި ޔުވެންޓަސްއިން އެޓްލެޓިކޯގެ ގޯލަށް ގިނަ ހަމަލާތަކެއް ފޮނުވައިލި ކަމުގައިވި ނަމަވެސް އެޓީމަށްވަނީ ލަނޑެއް ކާމިޔާބުކުރެވޭ ގޮތް ވަނީ ނުވެފައެވެ.