ހައްޖަށް ދިއުމަށް ޕެންޝަން ފާއިސާގެ 80 ޕަސެންޓް ނެގޭ ގޮތަށް ފާސްކޮށްފި
މި އިސްލާހު މަޖިލީހުން ފާސް ކޮށްފައިވަނީ 70 މެމްބަރުންގެ ވޯޓާއެކު
މަޖިލިސް
ހައްޖަށް ދިއުމަށް ޕެންޝަން ފާއިސާގެ 80 ޕަސެންޓް ނެގޭ ގޮތަށް ޕެންޝަނާއި ބެހޭ ގާނޫނަށް ގެނައި އިސްލާހު ފާސްކޮށްފިއެވެ. މި އިސްލާހު ފާސްކޮށްފައިވަނީ 70 މެމްބަރުންގެ ތާއީދާއެކުއެވެ.
ފާސްކުރި އިސްލާހުގައި ބުނެފައިވަނީ ހައްޖުގެ އަޅުކަން އަދާކުރުމަށް ރިޓަޔަރމަންޓް ސޭވިންގްސް އެކައުންޓްސް އިން ބޭނުންކުރެވޭނީ، އެ އަހަރަކު ހައްޖަށް ދިޔުމަށް ދައްކަންޖެހޭ ރަސްމީ އަގުގެ ގޮތުގައި ސަރުކާރުން ކަނޑައަޅާ އަދަދަށްވާ ފާއިސާގެ 80% (އަށްޑިހަ އިންސައްތަ) ކަމަށެވެ.
ޕެންޝަނާއި ބެހޭ ގާނޫނަށް މި އިސްލާހު ގެންނަން ހުށަހެޅުއްވީ ކެނދިކުޅުދޫ ދާއިރާގެ މެމްބަރު އަހްމަދު އީސައެވެ. މެމްބަރު އީސަ ހުށަހެޅުއްވި އިސްލާހު އިޖްތިމާއީ ކޮމިޓީން މަޖިލީހުގެ ތަޅުމަށް ހުށަހަޅާފައިވަނީ އެއްވެސް އިސްލާހަކާއި ނުލައެވެ.
މި އިސްލާހު ދިރާސާކޮށް ކޮމެޓީގެ ރިޕޯޓު ބުދަ ދުވަހުގެ މަޖިލީހަށް ހުށަހަޅުއްވާފައިވާއިރު އެ ރިޕޯޓުގައި 6 ރިކޮމެންޑޭޝަން އެއް ހިމަނާފަވެއެވެ. އެގޮތުން 80 އިންސައްތަ ދޫކުރުމަށް ޝަރުތު ހަމަވަނީ މަދުވެގެން 420،000 ރުފިޔާ ހުރުމުން ކަމަށް ކަނޑައެޅުން ފާހަގަ ކޮށްލެވެއެވެ.
މީގެ އިތުރުން ފައިސާ ޖަމާކުރާނެ ޝަރުއީ ހަމަތަކަށް ފެތޭ ވޮލަންޓަރީ ސްކީމެއް ހިންގަން ވާނެ ކަމަށް ރިޕޯޓުގައިވެއެވެ.
ޕެންޝަން ސްކީމްގައި ބައިވެރިވެފައި ވާ މީހުންގެ ތެރެއިން ހައްޖުގެ އަޅުކަން އަދާކުރަން ސޭވިންގްސް އެކައުންޓުން ފައިސާ ދޫކުރެވޭނީ އަލަށް ހައްޖަށް ދާ މީހުންނަށް އެކަންޏެވެ. މި ގާނޫނަށް އަމަލުކުރަން ފަށާނީ ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެންނެވެ.
މިހާރު ޕެންޝަނާ ބެހޭ ގާނޫނުގައި ޕެންޝަން ސްކީމްއިން ހައްޖުގެ އަޅުކަން އަދާ ކުރުމަށް ދޫކުރެވޭނީ ހައްޖަށް ގެންދިއުމުގެ ރަސްމީ އަގުގެ ގޮތުގައި ސަރުކާރުން އެ އަހަރަކަށް ކަނޑައަޅާ އަދަދުގެ 50 އިންސައްތައެވެ. ހައްޖަށް ދިއުމަށް ޕެންޝަން ފަންޑުގެ ފައިސާ ބޭނުން ކުރެވޭ ގޮތް ހެދުމަކީ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދެކެވެ.
