އިމާރާތެއްގެ ދަނގަޑު އޮނިގަނޑެއް ހަދަން އެއް މިލިއަން ޑޮލަރު
މި މަޝްރޫޢު ހަވާލުކޮށްފައިވަނީ ޗައިނާގެ ކުންފުންޏަކަށް
ކާށިދޫގެ ޓުއަރިސްޓް ވިލެޖްގައި ހުރި އިމާރާތިގެ އޮނިގަނޑު ކޮމެޓީގެ މެމްބަރުންނާ ހިއްސާ ކުރަނީ
ކާށިދޫގައި ޓުއަރިސްޓް ވިލެޖެއް ހެދުމުގެ މަޝްރޫއެއްގެ އިމާރާތުގެ ދަނގަޑު އޮނިގަނޑު ހެދުމަށްޓަކާ އެއް މިލިއަން ޑޮލަރު ހަރަދުވެފައިވާކަމަށް މޯލްޑިވްސް އިންޓެގްރޭޓެޑް ޓުއަރިޒަމް ޑިވެލޮޕްމެންޓް ކޯޕަރޭޝަން (އެމްއައިޓީޑީސީ) ގެ މެނޭޖިންގް ޑިރެކްޓަރ މުހައްމަދު ރާއިދު ވިދާޅުވެއްޖެއެވެ.
ރާއިދު މިހެން ވިދާޅުވީ ބުދަ ދުވަހުގެ ސްޓޭޓް އޯންޑް އެންޓަޕްރައިޒެސް ކޮމިޓީގައި ވާހަކަދައްކަވަމުންނެވެ.
ރާއިދު ވިދާޅުވީ މި މަޝްރޫޢު ހަވާލުކޮށްފައިވަނީ ޗައިނާގެ ކުންފުންޏަކަށް ކަމަށާއި ހަވާލު ކުރެވުނުއިރު އެއްވެސް ކަހަލަ ކޮންސްޕްޓެއް ހަދާފައެއް ނުވާކަމަށެވެ. އަދި އެކުންފުންޏާއި ހަވާލު ކުރެވުނީ ޕްރީފެބްރިކޭޓެޑް ބިލްޑިންގް ތަކެއް އެޅުމަށް ކަމަށެވެ.
މި މަޝްރޫއު ހިންގުމަށްޓަކާ އެމްއައިޓީޑީސީ އިން ފިނޭންސް މިނިސްޓްރީއިން 8% ގެ އިންޓްރެސްޓަކާއިއެކު 1 މިލިއަން ޑޮލަރުގެ ލޯނެއް ނެގި ކަމަށާއި އެ މިލިއަން ޑޮލަރުގެ ލޯނު ހުސްކޮށްލީ ހަމައެކަނި ދަގަނޑު އޮނިގަނޑު ހެދުމަށް ކަމަށްވެސް ރާއިދު ވިދާޅުވިއެވެ.
ލޭންޑް އެކުއިޝަން ކޯސްޓްގެ ގޮތުގައި 22.7 މިލިއަން ރުފިޔާ ދައްކަން ޓުއަރިޒްމް މިނިސްޓްރީއިން އަންގާފައިވާ ކަމަށާއި ކާށިދޫ ބިން އޭރުވެސް އެމްއައިޓީޑީސީ އާއި ހަވާލުކޮށްފައި ނުވާކަމަށާއި އެ ރުފިޔާ ނުދައްކާ އޮތުމުން މިނިސްޓްރީއިން ކޯފަރޭޝަންއަށް ބިން ހަވާލު ކުރުމަށް އިންކާރު ކުރަމުންދާ ކަމަށް ވެސް ރާއިދު ވިދާޅުވިއެވެ. މީގެއިތުރުން ރާއިދު ވިދާޅުވީ އެ ބިމުގެ އަގަކީ 22.7 މިލިއަން ރުފިޔާ ކަމަށް ދެކިވަޑައިނުގަންނަވާކަމަށެވެ.
ރާއިދު ވިދާޅުވީ އާ ސަރުކާރުން ވެރިކާމާއި ހަވާލު ވުމުގެ ދެ ހަފްތާ ކުރިން ޓުއަރިޒްމް މިނިސްޓްރީއިން ކާށިދޫގައި ހިންގާ މަޝްރޫޢޫ އަކީ ދެކޮޅު ޖެހޭ މަޝްރޫޢެއް ކަމަށް ނުފެންނަކަމަށް ބުނެ ސީޓީއެއް ފޮނުވައި އެ މަޝްރޫއުގެ މަސައްކަތް ހުއްޓާލުމަށް މިނިސްޓްރީއިން އެންގި ކަމަަށެވެ.
އަދި މި މަޝްރޫއަކީ އިންތިޚާބަކާއި ކައިރިކޮށް ރައްޔިތުންނަށް އޮޅުވާލުމަށްޓަކާ ފެށި މަޝްރޫއެއް ކަމަށާއި އެމްއައިޓީޑީސީ މެދުވެރިކޮށް މިފަދަ އޮޅުވާލުމެއް ހިންގާފައިވާއިރު މިކަމަށް ވެސް ޒިންމާ ނަގަން ޖެހޭ ކަމަށް ވެސް ވިދާޅުވިއެވެ. މިއީ އެމްއައިޓީޑީސީ އިން ޒިންމާ ނަގަން ޖެހޭ ކަމެއް ކަމަށް ކޮމެޓީގައި ވާހަކަދައްކަވަމުން ރާއިދު ވަނީ ވިދާޅުވެފައެވެ.
