އާސާރީ ތަންތަން ހިމާޔަތް ކުރުމާ ބެހޭގޮތުން ކަމަދޫ ކައުންސިލުންް މިނިސްޓާރ ޔުމްނާއާއި މަޝްވަރާ ކުރައްވައިފި
ރަށުގައިވާ ހަތަރު ތަނެއް ހިމާޔަތް ކުރުމާ ގުޅޭގޮތުން މަޝްވަރާ ކުރެވުނު
ކަމަދޫ ކައުްނސިލްގެ މެމްބަރު މިނިސްޓަރ ޔުމްނާ އާއިއެކު
އާސާރީ ތަންތަން ހިމާޔަތް ކުރުމާ ގުޅޭގޮތުން ބ. ކަމަދޫ ކައުންސިލުން މިނިސްޓަރު ޔުމްނާ މައުމޫނާއި މަޝްވަރާކޮށްފި އެވެ.
ރާއްޖެ.އެމްވީއަށް މައުލޫމާތުދެއްވަމުން ބ. ކަމަދޫ ކައުންސިލްގެ ރައީސް އަހްމަދު ސާޖިދް ވިދާޅުވީ އެރަށުގެ އާސާރީ ތަންތަން ހިމާޔަތްކުރުމާ ގުޅޭގޮތުން ބޭއްވުނު ބައްދަލުވުމުގައި ރަށުގައިވާ ހަތަރު ތަނެއް ހިމާޔަތް ކުރުމާ ގުޅޭގޮތުން މަޝްވަރާ ކުރެވުނު ކަމަށެވެ. އަދި ހިމާޔަތް ކުރަން މަޝްވަރާކުރެވުނު ތަންތަނުގެ ތެރޭގައި އެރަށުގެ ދުވަސްވީ ނިކަގަހާއި، އާސާރީ މިސްކިތާއި، އެރަށުގެ ގްރީން އޭރިއާ އަދި އާސާރީ ވެވު ހިމެނޭކަމަށް ކައުންސިލްގެ ރައީސް ވިދާޅުވި އެވެ.
އަހްމަދު ސާޖިދު ވިދާޅުވީ ރަށުގެ އާސާރީ ތަންތަނަށް އަޅާނުލެވުމުގެ ސަބަބުން އެތަންތަން ވަރަށް ބޮޑަށް ވީރާނާވެ ހަލާކުވެފައިވާކަމަށާއި އެތަންތަން ކުރީގަ ހުރި ގޮތަށް އަލުން ރުޖޫޢު ކުރުމަށް މަސައްކަތް ކުރަމުން އަންނަކަމަށެވެ. އެގޮތުން އެ ރަށުގެ އާސާރީ ތަރިކައިގެ ގޮތުގައި ހިމެނޭ ވެވު ހިމާޔަތްކޮށް ރައްކާތެރި ކުރުމުގެގޮތުން އެތަން މަރާމާތުކޮށް، އެރަށުގެ ދުވަސްވީ ނިކަގަހުގެ ވަށާ ފާރެއް ރޭނުމަށް ގަސްތުކޮށްފައިވާކަމަށް އޭނާ ވިދާޅުވި އެވެ.
މީގެއިތުރުން އެރަށުގެ އާސާރީ ހިރިގަލުގެ މިސްކިތާއި ބެހޭގޮތުން މަޢުލޫމާތު ދެއްވަމުން އަލީ އިސްމާޢީލް ވިދާޅުވީ ކުރީ އަހަރެއްގައި އެ މިސްކިތް ވަނީ ތަޅާލާފައިކަމަށެވެ. އަދި މިގޮތަށް ކަންތައްތައް މެދުވެރިވީ އާސާރީ ތަންތަނާއި ބެހޭގޮތުން މީހުން ގެ ހޭލުންތެރިކަން ކުޑަވުމުން ކަމަށެވެ. އަދި އެތަންތަނުގެ މުހިއްމުކަން ނޭގުމަކީ ހިތާމަ ކުރަން ޖެހޭކަމެއްކަމަށް އަލީ އިސްމާޢީލް ވިދާޅުވިއެވެ. މިތަންތަން މަރާމާތުކޮށް ބޯޑުތައް ހަރު ކުރާނެ ކަމަށްވެސް ބ. ކަމަދޫ ކައުންސިލުންވަނީ މައުލޫމާތުދީފައެވެ.
މީގެއިތުރުން ބ. ކަމަދޫ ގައި މީހުން އާބާދުވިގޮތާއި އެރަށުގައި ފުރަތަމަ ވަޒަންވެރިވި އާއިލާތަކާއި ބެހޭގޮތުން ދިރާސާކުރަން އެރަށުގެ ކައުންސިލް އިން ބޭނުން ވާކަމަށްވެސް އަހްމަދު ސާޖިދު ވިދާޅުވިއެވެ.
ރާއްޖޭގެ ތަރިކަތަށް ހިމާޔަތްކޮށް ރައްކާތެރި ކުރުމަކީ ރައީސް އިބްރާހިމް މުހައްމަދު ޞޯލިހްގެ މެނިފެސްޓޯގައި ހިމެނޭ ވައުދެކެވެ. ރާއްޖޭގެ ރަށްރަށުގައި ހުރި ތަރިކަތައް ހޯދާ ލިސްޓުކޮށް (އާކައިވް) ކުރުމުގެ މަސައްކަތް މިނިސްޓްރީ އޮފް އާޓްސް، ކަލްޗާެރ އެންޑް ހެރިޓޭޖްގެ ފަރާތުން ދަނީ ކުރަމުންނެވެ.
