ސިފައިންގެ ހިދުމަތަށް 127 އަހަރު ފުރުމުގެ ގޮތުން ދިދަ ނެގުމުގެ ރަސްމިއްުޔާތު ބާއްވައިފި
ޝިއާރަކީ، '' އަސްކަރީ އުސޫލު ނެގެހެއްޓުން، ސަފުތަކުގެ ތަރުތީބު ދެމެހެއްޓުން''
ދިދަ ނެގުމުގެ ރަސްމިއްޔާތުގެ ތެރެއިން
ދިވެހިރާއްޖޭގެ ގައުމީދިފާއިބާރު 127 އަހަރު ފުރުމުގެ ގޮތުން ދިދަ ނެގެމުގެ ހާއްސަ ރަސްމިއްޔާތެއް ބާއްވައިފިއެވެ.
އާދިއްތަ ދުވަހު ސިފައިންގެ ކަލުތުއްކަލާކޮށީ ގައި ބޭއްވި ރަސްމިއްޔާތުގެ ޝަރަފްވެރި ކޮށްދެއްވީ ސިފައިންގެ އެންމެ މަތީ ވެރިޔާ އަދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ.
އެމަނިކުފާނު އަރިހުގައި ޑިފެންސް މިނިސްޓަރު މާރިޔާ އަހުމަދު ދީދީގެ އިތުރުން ޗީފް އޮފް ޑިފެންސް މޭޖަރ ޖެނެރަލް އަބްދުﷲ ޝަމާލް ބައިވެރިވެވަޑައިގެންނެވިއެވެ.
ސިފައިންގެ އަހަރީ ދުވަހުގެ ރަސްމިއްޔާތުގައި ރައީސް ސޯލިހު ބައިވެރިވެވަޑައިގަންނަވަނީ. ފޮޓޯ: ރައީސް އޮފީސް
ސިފައިންގެ އޮފިސަރުންނާއި، އިއްޒަތާއި އެކު ސިފައިންގެ ހިދުމަތުން ރިޓަޔާ ކޮށްފައިވާ ބޭފުޅުންވެސް ބައިވެރިވެވަޑައިގަތް އެ ރަސްމިއްޔާތުގައި ސިފައިންގެ މޭޖަރ ޗީފް އޮފް ޖެނެރަލް އަބްދުﷲ ޝަމާލް ވަނީ ސިފައިންނާ މުހާތަބުކޮށް ވާހަކަ ދައްކަވާފައެވެ.
އާދީއްތަ ދުވަހު ބޭއްވި އެ ރަސްމިއްޔާތުގައި ވާހަކަ ދައްކަވަމުން ޝަމާލް ވިދާޅުވީ، ސިފައިންގެ ހިދުމަތަށް 127 އަހަރު ފުރިގެން ދިޔުމަކީ ސިފައިންގެ ހަޔާތުން އާ ސަފްހާއެއް ހުޅުވިގެންދާ ދުވަހެއް ކަމަށާއި، ސިފައިންގެ ހަޔާތުން ހޭދަވާ ކޮންމެ ދުވަހަކީ ތަފާތު އެތަކެއް ކަމެއްގެ އިތުރުން މައުނަވީ އެތައް ކަމެއް ލިބިގެންދާ އަހަރެއް ކަމަށެވެ.
ދިވެހި ރައްޔިތުންގެ އުއްމީދުތައް ހާސިލްކުރެވޭ ތަނަކަށް ސިފައިންގެ މުއައްސަސާ ހެދުމަށްޓަކައި އާ ހިތްވަރާއި އެކު މަސައްކަތް ކުރަމުންދާ ކަމަށް ވިދާޅުވިއެވެ.
ޗީފް އޮފް ޑިފެންސްފޯސް މޭޖަރ ޖެނެރަލް އަބްދުﷲ ޝަމާލް. ފޮޓޯ: އެމްއެންޑީއެފް
ސިފައިންގެ 127 ވަނަ އަހަރީ ދުވަހަށް ހާއްސަ ކުރެވިފައިވާ ޝިއާރަކީ، '' އަސްކަރީ އުސޫލު ނެގެހެއްޓުން، ސަފުތަކުގެ ތަރުތީބު ދެމެހެއްޓުން'' އެވެ.
''މިފަހަރު ޝިއާރަކީ އަމަލީ ގޮތުން ބޭނުން ކުރެވޭ އަޅުގަނޑުމެން ކުރާ ކޮންމެ ހަރާކަތެއްގައި މި ޝިޔާރު ހިމެނިގެންދާ އަދި އަޅުގަނޑުމެންގެ ސިކުނޑި ތަކުގައި ހަނދާން ކުރަމުންދާ ޝިޔާރެއްގެ ގޮތުގައި އިރާދަ ކުރެއްވިއްޔާ މި ޝިޔާރު ވެގެންދާނެ. އަދި މިޝިއާރަކީ އަދުގެ ސަރުކާރުގެ ވިސްނުންފުޅާއި ސިފައިންގެ ލީޑާރޝިޕްގެ ވިސްނުމުގެ ތެރެއިން ހާސިލްކުރުމަށް ބޭނުންވާ ހިދުމަތުގެ ނަތިއްޖާ ހާސިލްކުރުމަށް މަގު ދައްކައިދޭނެ ޝިޔާރަކަށް ވެގެންދާނެ'' ޝަމާލް ވިދާޅުވިއެވެ.
މި ޝިއާރަކީ ހަނގުރާމަވެރި ހާލަތްތަކާއި ކާރިސީ އަދި ޙިރާސީ އެކި އެކި ''އަރައްކާތަކުގައި'' ސިފައިންގެ ލަޝްކަރު ހަރަކާތްތެރިވާއިރު ސިފައިން ނަގަހައްޓަން ޖެހޭ އުސޫލުތަކާއި ދަމަހައްޓަން ޖެހޭ ހަމަތަކާއި ތަބާވާން ޖެހޭ އަސާސްތަކާއި ހަމަޔަށް ސިފައިން ވާސިލްކޮށް ދޭނެ ''ފާލަމަކަށް'' ވެގެންދާނެ ކަމަށް ޗީފްއޮފް ޑިފެންސް ވިދާޅުވިއެވެ.
ދިވެހިރާއްޖޭގެ ސިފައިންގެ ހިދުމަތް ފެށިގެން ދިޔައީ 1892 ވަނައަހަރުގެ އޭޕްރީލް މަހުގެ 21 ވަނަ ދުވަހެވެ. ރަސްމީ ސިފައެއްގައި ދިވެހިސިފައިން އުފެދުނުފަހުން ސިފައިންގެ ޚިދުމަތްތަކަށް އަންނަމުންދާ ބަދަލުތަކާ ގުޅޭގޮތުން، ޚިދުމަތް ދިނުމަށްޓަކައި ހެޑްކްއާރޓަރޒް ގެ ގޮތުގައި މައިގަޑު ތިންތަނެއް ބޭނުން ކޮށްފައިވެއެވެ.
އެންމެފުރަތަމަ ސިފައިންގެ އެންމެހާ ކަންތައްތައް ކުރަމުން އައިސްފައިވަނީ ރަށްދެބައިގޭގައެވެ. އަތިރީގޭ ޢަބުދުالله ދީދީ ސިފައިންގެ ކޮމާންޑަރަކަށް ހަމަޖެހުމާއިގުޅިގެން ގެންނެވި ބަދަލުތަކުގެ ތެރޭގައި ރަށްދެބައިގޭގައި ހިނގަމުންއައި ސިފައިންގެ އެންމެހާކަންތައްތައް ބޮޑުގަނޑުވަރުތެރެއަށް ބަދަލުކުރެއްވުން ހިމެނެއެވެ. ބޮޑުގަނޑުވަރުތެރޭގައި ސިފައިން ތިބުމަށް ހަމަޖެހުނުތަނަކީ ރަންހަދާ ދޮރޯށިތެރޭގައި ހުރި ތަނެކެވެ. މިގޮތުގައި ދުވަސްތަކެއް ދިއުމަށް ފަހު ސިފައިންގެ ތެރެއަށް އިތުރު މީހުން ލެއްވުމުން ދެން ސިފައިން ބަދަލުވީ އާކޯއްޓޭ މަތިގެއަށެވެ.
ސިފައިންގެ އަހަރީ ދުވަސް ފުރަތަމަ ފާހަގަކުރެވުނީ 16 ރަޖަބް 1366 ގަ އެވެ. އެދުވަހުގެ ފަހުން ކޮންމެ އަހަރަކު ވެސް ސިފައިންގެ އަހަރީ ދުވަހުގެ ގޮތުގައި ފާހަގަކުރެވެމުން އައީ ރަޖަބްމަހުގެ 16 ވަނަދުވަހެވެ. ދެވަނަ ޖުމްހޫރިއްޔާގެ ފުރަތަމަ ރައީސް ވެލާނާގޭ އިބްރާހިމް ނާޞިރު ގެންނެވި ބަދަލުތަކުގެ ތެރެއިން ސިފައިންގެ އަހަރީ ދުވަސް މީލާދީ ގޮތުން ފާހަގަކުރުމަށް ނިންމެވި އެވެ. އެދުވަހަކީ ޖޫން މަހުގެ 06 ވަނަ ދުވަހެވެ. އޭގެފަހުން އަނެއްކާވެސް އިތުރު ހޯދުންތަކުގެ މައްޗަށް ރިއާޔަތްކޮށް ސިފައިންގެ އަހަރީ ދުވަހަކީ 21 އޭޕްރީލް ކަމަށް ނިންމަވައި ސިފައިން އުފެދިފައިވަނީ 21 އޭޕްރީލް 1892 ކަމުގައި ކަނޑައަޅުއްވައި 1992 ވަނައަހަރު ގެ އޭޕްރީލްމަހުގެ 21 ވަނަދުވަހު ސިފައިން އުފެދުނުތާ 100 އަހަރު ފުރުން ފާހަގަކުރެވުނެވެ.
