''ކަސައުޓީ ޒިންދަގީކީ'' ގައި ކޮމޯލިކާއަކީ ހީނާ: އޭކްތާ
އޭކްތާ ވަނީ ހީނާ އެ ޝޯގައި ހުންނަން ބެނުންވާ ކަމަށް ބުނެފައި
ހީނާ ޚާން އާއި އޭކްތާ ކަޕޫރު
ސްޓާ ޕްލަސް އިން ދައްކަމުންދާ ޑްރާމާ ސީރިއަލް "ކަސައުޓީ ޒިންދަގީކީ" ގައި ކޮމޯލިކާގެ ރޯލް ކުޅޭ ހީނާ ޚާން އެ ރޯލުން ނުފެންނާނެ ކަމަށް ބައެއް ރިޕޯޓްތައް ވަނީ ބުނެފައެވެ.
ނަމަވެސް ހީނާގެ އިންސްޓަގްރާމްގައި ހިއްސާކޮށްފައިވާ ވީޑިއޯގައި މި ޝޯގެ ޕްރޮޑިއުސަރ އޭކްތާކަޕޫރު ހީނާ އެ ޝޯގައި ހުންނަން ބޭނުންވާ ކަމަށް ބުނެއެވެ.
"އޭނަ (އޭކްތާ) ވަރަށް ކިއުޓް. އޭނަ ބޭނުންވޭ އަހަރެން މަޑުކުރަން" ހީނާ އޭނާގެ އިންސްޓަގްރާމް ސްޓޯރީގައި ހިއްސާކޮށްފައިވާ ވީޑިއޯގައި ލިޔެފައިވެއެވެ.
މި ވީޑިއޯ ނަގާފައި ވަނީ ބޮކްސް ކްރިކެޓް ލީގް ގައެވެ. މި ވީޑިއޯގައި ހީނާ އާއި އޭކްތާގެ އިތުރުން ކަރިޝްމާ ތަންނާ އަދި ކްރިސްޓެލް ޑި ސޫޒާ ވެސް ފެނިގެންދެއެވެ.
ބޮމްބޭ ޓައިމްސްއަށް ހީނާ ކުރިން ދީފައިވާ އިންޓަވިއުގައި ބޭނުންވެއްޖެ ކޮންމެ ހިނދެއްގައި އެ ޝޯއަށް އޭނާ ދާނެ ކަމަށް ވަނީ ބުނެފައެވެ.
ބައެއް ރިޕޯޓްތައް ބުނާ ގޮތުން މި ޝޯގައި ހީނާގެ ބަދަލުގައި އެރޯލަށް ހަމަޖައްސާފައި ވަނީ އަލީޝާ ޕަންވަރު އެވެ. އަލީޝާ ކުޅެފައިވާ ފާހަގަ ކޮށްލޭވޭ ޓީވީ ސޯޕްއަކީ "އިޝްގް މެއިން މަރުޖާވާން" އެވެ.
ސްޓާޕަލްސް އިން "ކަސައުޓީ ޒިންދަގީކީ" ދައްކަން ފަށާފައި ވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. ނަމަވެސް ހީނާގެ ކެރެކްޓަރ ދައްކަން ފަށާފައި ވަނީ ޝޯ ފެށިތާ މަހެއްހާ ދުވަސް ފަހުންނެވެ.
އޭކްތާ ކަޕޫރު ޕްރޮޑިއުސްކުރާ މި ޝޯގައި ޕްރޭނާގެ ރޯލުން ފެނިގެންދަނީ އެރިކާ ފެނާންޑޭޒްއެވެ. އަދި އަނޫރާގްގެ ރޯލުން ފެނިގެންދަނީ ޕާރތް ސަމްތާން އެވެ.
