ބޮޑެތި އަދަދުތަކުން ވައްކަމާއި ފޭރުމުގެ މައްސަލަތައް އިތުރުވެ، މިއަހަރުގެ މިހާތަނަށް ފުލުހުންނަށް ހުށަހެޅި ފޭރުމުގެ މައްސަލަތައް 120 އަރައިފިއެވެ.

ނަގުދު ފައިސާ ހިފައިގެން ދަނިކޮށް، ގްރޫޕުތަކުން މި މަހުގެ ތެރޭގައި ވަނީ މާލޭގައި ހަ މިލިއަނަށް ވުރެ ގިނަ ރުފިޔާ ފޭރިގެންފައެވެ. އެގޮތުން އެފްއެސްއެމްގެ 250،000 ރުފިޔާ ފޭރިގެންފައިވާއިރު، ހުޅުމާލެ ރޫޓް ފިހާރައިގެ ތިން ލައްކައަށް ރުފިޔާ ވެސް ވަނީ މަގުމަތިން ފޭރިގެންފައެވެ.

ހޮރައިޒަން ފިޝަރީސްގެ 160،000 ރުފިޔާގެ ޗެކަކާ އެކު، ދޮޅު ލައްކަ ރުފިޔާ ވެސް ވަނީ މި އަހަރު ތެރޭ ފޭރިގެންފައެވެ. ވަޅިން ބިރު ދައްކައި، އެކްސްޕާޓް މޮޓޯސް ފިހާރައަށް ވަދެ، ފަސް ލައްކައަށް ވުރެ ގިނަ ރުފިޔާ ފޭރިގެންފައިވާއިރު، ސްޓޭޓް ބޭންކް އޮފް އިންޑިއާ (އެސްބީއައި)އަށް 2.3 މިލިއަން ރުފިޔާ ޖަމާކުރަން ދަނިކޮށް ހެލްމެޓް އަޅައިގެން ތިބި ބަޔަކު ވަނީ 2.3 މިލިއަން ރުފިޔާ ފޭރިގެންފައެވެ. އަދި މިދިޔަ މިދިޔަ ހަފްތާގެ ބުރާސްފަތި ދުވަހު މިފްކޯގެ ވޭނެއް ހުއްޓުވައި، ދެ މިލިއަން ރުފިޔާ ވަނީ ފޭރިގެންފައެވެ.

ތަފާސް ހިސާބުތަކުން ދައްކާ ގޮތުން މިއަހަރުގެ މިހާތަނަށް ފާއިތުވި ދެ މަހާއި 27 ދުވަހުގެ ތެރޭގައި ފުލުހުންނަށް ވަނީ ފޭރުމުގެ 120 މައްސަލަ ހުށަހަޅާފައެވެ. އެގޮތުން ޖެނުއަރީ މަހު ފޭރުމުގެ 37 މައްސަލަ ހުށަހަޅާފައިވާއިރު، މިދިިޔަ މަހު ފުލުހުންނަށް ހުށަހެޅީ ފޭރުމުގެ 44 މައްސަލައެވެ. ހިނގަމުންދާ މާޗު މަހުގެ ތެރޭގައި މިހާތަނަށް ވަނީ ފޭރުމުގެ 39 މައްސަލަ ހިނގާފައެވެ.

ފޭރުމުގެ ބޮޑެތި މައްސަލަތަކުގައި ފުލުހުން ވަނީ އަށް މީހަކު ހައްޔަރުކޮށްފައެވެ. އަދި ބައެއްގެ މީހުންގެ ބަންދުގެ މުއްދަތު އިތުރުކޮށް، ތަހުގީގަށް ބޭނުންވާ މައުލޫމާތުތައް ފުލުހުން ދަނީ ހޯދަމުންނެވެ.