ރާއްޖޭގެ މަސް ޔޫރަޕިއަން މާކެޓަށް ވިއްކުމަށް މިހާރު ނަގާ ޑިއުޓީ ކުޑަ ކުރަން ޔޫރަޕިއަން ޔޫނިއަންއާ އެކު މަޝްވަރާ ކޮށްފައިވާ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ކުރުނބާ މޯލްޑިވްސްގައި ހޯމަ ދުވަހު ބޭއްވުނު ހަތަރު ވަނަ މޯލްޑިވްސް - އިޔޫ ޕޮލިސީ ޑައިލޮގް އަށް ފަހު މީޑިއާ އަށް ދިން އިންޓަވިއުއެއްގައި ޝާހިދު ވިދާޅުވީ، ޔޫރަޕްގެ ގައުމުތަކަށް މަސް ވިއްކުމުގައި އެންމެ ބޮޑަށް ދިމާވާ ކަމަކީ މަހުން ނަގަމުން އަންނަ 24 ޕަސެންޓްގެ ޑިއުޓީ ކަމަށެވެ.
''24 ޕަސެންޓްގެ ޑިއުޓީ ކުޑަކުރުމާ ބެހޭ ގޮތުން މަޝްވަރާ ކުރެވުނު. އަދި އެކަމަށް ޔޫރަޕިއަން ޔޫނިއަންގެ ގައުމުތަކުން މަސައްކަތް ކޮށްދޭނެ ކަމުގެ ޔަގީންކަން ދެއްވި،'' ޝާހިދު ވިދާޅުވިއެވެ.
މި ބައްދަލުވުމުން ފެނިގެން ދިޔައީ ޔޫރަޕިއަން ޔޫނިއަންގެ ގައުމުތަކުން ރާއްޖެ ބަލައިގެންފައިވާ މިންވަރު ކަމަށާއި، ރާއްޖޭގެ ރައްޔިތުން މިސަރުކާރު އިންތިހާބުކޮށް ގެނައި ބަދަލަށް އީޔޫ އިން މަރުހަބާ ކިޔާ ކަމަށެވެ.
މީގެ އިތުރުން ދިވެހިން ޔޫރަޕްގެ ގައުމުތަކަށް ދަތުރުކުރުމަށް މިހާރަށް ވުރެ ފަސޭހަ ގޮތްތަކެއް ހޯދައިދިނުމާ ބެހޭ ގޮތުން ބައްދަލުވުމުގައި މަޝްވަރާ ކޮށްފައިވާ ކަމަށެވެ. ވޭތުވެދިޔަ އަހަރު މި ބައްދަލުވުން ބޭއްވިފައި ނުވާކަން ފާހަގަ ކުރައްވަމުން ޝާހިދު ވިދާޅުވީ، އީޔޫއަކީ އިގްތިސާދީ ގޮތުން ރާއްޖެއަށް މުހިއްމު ސަރަހައްދެއް ކަމަށެވެ.
އިޔޫ އިން ރާއްޖެ-އިޔޫ އިންވެސްޓާސް ޑައިލޮގެއް ރާއްޖޭގައި ބާއްވަން ޝައުގުވެރިކަން ފާޅުކޮށްފައި ވާތީ އެކަމަށް އިޝާރާތް ކުރައްވާ ޝާހިދު ވިދާޅުވީ، އެފަދަ ޑައިލޮގެއް ބޭއްވިއްޖެ ނަމަ އޭގެ ސަބަބުން ޔޫރަޕްގެ އިތުރު އިންވެސްޓްމެންޓްތައް ރާއްޖެއަށް ގެނައުމުގެ ޔަގީންކަން އެބަ އޮތް ކަމަށެވެ.
ރާއްޖެ- އީޔޫ އިންވެސްޓާސް ޑައިލޮގެއް ބާއްވަން އީޔޫ ސަފީރު ޓަންގް-ލައި ޝައުގުވެރިކަން ފާޅުކުރައްވަފައި ވަނީ މޯލްޑިވިސް-އީޔޫ ޕޮލިސީ ޑައިލޮގެ ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.
ކުރުނބާ މޯލްޑިވްސްގައި ހޯމަ ދުވަހު ބޭއްވި ހަތަރު ވަނަ މޯލްޑިވްސް-އީޔޫ ޕޮލިސީ ޑައިލޮގްގައި ޔޫރަޕް އިން ރާއްޖެއަށް ކަނޑައަޅާފައިވާ މިޝަންތަކުގެ ހެޑް އޮފް މިޝަންސް ނުވަތަ ޑެޕިއުޓީ ހެޑް އޮފް މިޝަންސް ވަނީ ބައިވެރިވެވަޑައިގެންފައެވެ.
އީޔޫ ވަފްދުގެ ބޭފުޅުން ވަނީ ހޯމަ ދުވަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާ ބައްދަލުކުރައްވާފައެވެ.
