ބުލޮކް މޯޑަށް ކިޔަވައި ދިނުން މަނާ: އެމްކިޔޫއޭ
28 ފެބުރުއަރީ 2019 | ބުރާސްފަތި 00:41ހުއްދަ ދީފައިވާ ގޮތާއި ޚިލާފަށް ހިންގާ ޕްރޮގްރާމްތަށް ގަބޫލު ނުކުރާނެ
މަތީ ތައުލީމަށް ކިޔަވާ ދަރިވަރުންތަކެއް
ރާއްޖޭގެ ޔުނިވާސިޓީތަކާއި ކޮލެޖްތަކުގައި ބުލޮކް މޯޑަށް ޕްރޮގްރާމެއް ހިންގުމުގެ ހުއްދަ ދީފައި ނުވާނެ ކަމަށް މޯލްޑިވްސް ކޮލިފިކޭޝަން އޮތޯރިޓީން ބުނެފިއެވެ.
އެމްކިޔޫއޭ އިން ބުދަ ދުވަހު ނެރެފައިވާ ސާރކިއުލާގައި ބުނެފައިވަނީ ފުލްޓައިމްކޮށް ހިންގުމަށް ހުއްދަ ދީފައިވާ ޕްރޮގްރާމްތައް ރާއްޖޭގެ ގައުމީ ސަނަދުގެ އޮނިގަނޑުގައިވާ ފުލްޓައިމް މިންގަނޑަށް ނުފެތޭ ގޮތްގޮތަށް ހިންގާ ކަމުގެ ޝަކުވާތަށް ލިބެމުންދާ ކަމަށެވެ. އެގޮތަށް ޕްރޮގްރާމްތައް ހިނގާ ހިންގުމަށް ބްލޮކްމޯޑް ކިޔަމުންދާ ކަމުގެ ޝަކުވާތައްވެސް އެ އޮތޯރިޓީއަށް ލިބެމުން ދާ ބުނެ އެވެ.
ފުލްޓައިމް ޕްރޮގްރާމެއް ހިންގުމަށް ކަނޑައަޅާފައިވާ ގަޑި ހަމަނުކޮށް ހިންގުމަކީ ދީފައިވާ ހުއްދައާއި ޚިލާފް ކަމެއް ކަމުގައި ވާތީ ހުއްދަ ދީފައިވާ ގޮތާއި ޚިލާފަށް ހިންގާ ޕްރޮގްރާމްތައް ގަބޫލު ނުކުރާނެ ކަމަށް އެމްކިޔޫއޭއިން ބުނެ އެވެ.
އެ އޮތޯރިޓީން ބުނެފައި ވަނީ ރާއްޖޭގެ މަތީ ތައުލީމް ދޭ މަރުކަޒްތަކުގައި ކިޔަވައި ދިނުމަށް ހުއްދަ ދީފައިވާނީ ދުނިޔޭގެ އެހެން ގައުމުތަކުގައިވެސް ގަބޫލުކުރާ ދެ ވައްތަރު ކަމުގައި ވާ "ފުލްޓައިމް" އާއި "ޕާރޓް ޓައިމް" ޕްރޮގްރާމް ހިންގުމަށެވެ.
