އެފްއޭއެމްގެ ހަރަކާތްތަކުން ނިއު ސަސްޕެންޑުކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ހިންގާ ހުރިހާ ހަރަކާތްތަކުން ނިއުރޭޑިއަންޓް ސްޕޯޓްސް ކްލަބް ސަސްޕެންޑްކޮށްފިއެވެ.

އެފްއޭއެމުން ނެރުނު ބަޔާނެއްގައި ބުނީ، މިދިޔަ އަހަރުގެ އޯގަސްޓް މަހުން ފެށިގެން މިއަދާ ހަމައަށް ނިއު އިން އެ ކްލަބުގެ ކުޅުންތެރިންނަށް ދޭންޖެހޭ 3.8 މިލިއަން ރުފިޔާއަށްވާ މުސާރަ އާއި އުޖޫރަ ދީފައިނުވާ ކަމަށާއި، އެ މައްސަލަ ކުޅުންތެރިން އެފްއޭއެމަށް ހުށަހަޅާފައިވާ ކަމަށެވެ.

އެގޮތުން މައްސަލަ ބެލުމުގެ ގޮތުން އެފްއޭއެމްގެ ޕްލޭޔާ ސްޓޭޓަސް ކޮމިޓީއަށް ހާޒިރުކުރެވި، މުސާރަ އާއި އުޖޫރަ ދިނުމަށް އެތައް މުހުލަތަކާއި ފުރުސަތެއް ދެވިފައިވީ ނަމަވެސް، ކްލަބުގައި ބަޖެޓު ނެތް ކަމަށާއި، ބަޖެޓު ކުރެވިފައި ހުރި ހުރިހާ ފައިސާއެއް ހަރަދުކޮށް ހުސްވެފައިވާ ކަމަށް އެ ކްލަބުން ބުނެފައިވާ ކަމަށް ވެސް އެފްއޭއެމުން ބުނެއެވެ.

އެފްއޭއެމުން ބުނީ، މިއަދާ ހަމަޔަށް ވެސް މުސާރަ ނުދެވޭ ކުޅުންތެރިންނާއި، ނިއުއާ ދެމެދު ވެފައިވާ އެއްބަސްވުމާ އެއްގޮތަށް ކްލަބުން އަދާކުރަންޖެހޭ އެންމެހައި ހައްގުތައް އަދާކުރުމުގައި ޒިންމާދާރުކަން ކުޑަކޮށް ކްލަބުގެ ފަރާތުން އަމަލުކޮށްފައިވާ ކަމަށެވެ.

އެގޮތުން އެ އިދާރާ އިން ބުނީ، އެފްއޭއެމްގެ ހިންގާ ގަވައިދުގެ 14 ވަނަ މާއްދާ އިން އެފްއޭއެމްގެ ހިންގާ ކޮމިޓީއަށް ލިބިދޭ ބާރުތަކުގެ ތެރެއިން ނިއު އިން މުސާރައިގެ މައްސަލަ ހައްލުކޮށް، އެ ކްލަބުން ދައްކަންހުރި ހުރިހާ ފައިސާ އާއި އުޖޫރަ ދައްކާ ހަލާސްކުރުމާ ހަމަޔަށް އެފްއޭއެމްއިން ހިންގާ ހުރިހާ ކަންކަމުން ސަސްޕެންޑުކުރެވިފައިވާ ކަމަށެވެ.

މީގެއިތުރުން އެފްއޭއެމުން ބުނީ، މި މައްސަލަ އިތުރަށް ބަލާ ދިރާސާކޮށް އިތުރަށް އަޅަންޖެހޭ ފިޔަވަޅެއް އޮތްތޯ ބެލުމަށް އެފްއޭއެމްގެ ޑިސިޕްލިނަރީ ކޮމިޓީއަށް ފޮނުވުމަށް އެ އިދާރާގެ ހިންގާ ކޮމިޓީން ފާސްކޮށްފައިވާ ކަމަށެވެ.

"ދިވެހި ރާއްޖޭގެ ފުޓުބޯޅައިގެ މައި އިދާރާގެ ހައިސިއްޔަތުން މި އިދާރާގެ މަގްސަދުތަކުގެ ތެރޭގައި ފުޓުބޯޅައިގެ މި އާއިލާގައި ހިމެނޭ އެންމެހާ ފަރާތްތަކުގެ ހައްގުތަށް ހިމާޔަށް ކޮށްދިނުމާއި އެއިން އެއްވެސް ފަރާތެއްގެ ހައްގަށް އުނިކަން ލިބޭފަދަ އެންމެހައި ކަންކަން ހުއްޓުވުން ހިމެނޭއިރު، ކުޅުންތެރިންނާއި، ކްލަބްތަކުގެ ހައްގުތަށް ހިމާޔަތތްކޮށްދިނުމަކީ މިއިދާރާއިން އެންމެ އިސްކަންދޭ އެއްކަން" އެފްއޭއެމުން ނެރުނު ބަޔާނުގައި ބުނެފައި ވެއެވެ.

ދިވެހި ރާއްޖޭގެ އެންމެ ކާމިޔާބު އެއް ކްލަބް ސަސްޕެންޑުކޮށްފައިވާއިރު، އެ ކްލަބުން މިކަމާ ގުޅިގެން އަދި އެއްވެސް އެއްޗެއް ބުނެފައެއް ނުވެއެވެ.