ވޮލީބޯލް އެސޯސިއޭޝަން ކަޕް: އަލްމާ އާއި ލޮރެންޒޯ މޮޅުވެއްޖެ

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ ވީއޭއެމް އެސޯސިއޭޝަން ކަޕްގެ އަންހެން ޑިވިޝަނުގެ ފުރަތަމަ މެޗުތަކުން އަލްމާ ސްޕޯޓްސް ކްލަބާއި ލޮރެންޒޯ ސްޕޯޓްސް ކްލަބް މޮޅުވެއްޖެއެވެ.

އާދީއްތަ ދުވަހު ހަވީރު ކުޅުނު ފުރަތަމަ މެޗުން ވޮލީބޯލް ޔޫތު ނިއު ޖެނެރޭޝަންއާ ވާދަކޮށް އަލްމާ މޮޅުވިއިރު، ދެވަނަ މެޗުގައި އާދީއްތަ ދުވަހުގެ ރޭ ލޮރެންޒޯ ވަނީ ޒެނިތު ސްޕޯޓްސް ކްލަބްއާ ވާދަކޮށް ފަސޭހަކަމާއެކު މޮޅުވެފައެވެ.

ޒުވާނުންގެ މަރުކަޒު އެތެރެ ކޯޓުގައި ކުޅުނު މެޗުގައި ޔޫތު ނިއު ޖެނެރޭޝަންއާ ދެކޮޅަށް ކުޅުނު މެޗުން އަލްމާ މޮޅުވީ ސީދާ ތިން ސެޓުންނެވެ. މެޗުގެ ސެޓުތައް ގެންދިޔައީ އަލްމާއިން ގެންދިޔައީ 17-25، 17-25 އަދި 20-25 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ އަލްމާގެ އައިމިނަތު ޔުމްނާއެވެ.

ޒެނިތުގެ މައްޗަށް ލޮރެންޒޯ ކުރިހޯދީވެސް ސީދާ ތިން ސެޓުންނެވެ. ލޮރެންޒޯއިން މެޗުގެ ސެޓުތައް ގެންދިޔައީ 25-06، 25-11 އަދި 25-09 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ލޮރެންޒޯއަށް ކުޅޭ ގައުމީ އަންހެން ޓީމުގެ ޖޫޒާން ޒަރީރެވެ.

މި މުބާރާތް މި ފަހަރު ކުރިއަށްދަނީ ދެ ބުރަކަށް ބަހާލައިގެންނެވެ. އެގޮތުން ފުރަތަމަ ފަސް ޓީމެއްގެ މެދުގައި ކުރިއަށްދާނީ ޕްރިލިމިނަރީ ބުރެވެ.

ޕްރިލިމިނަރީ ބުރުގައި ވާދަކުރަނީ ޔޫތު ނިއު ޖެނެރޭޝަނާއި، އަލްމާ އާއި ޒެނިތު އަދި ލޮރެންޒޯގެ އިތުރުން ކްލަބް ވޮލީބޯލްއެވެ. މި ފަސް ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ގަދަ ދެ ޓީމެއް ކޮލިފައިވާނީ އަނެއް ބުރަށެވެ.

އެ ބުރުގައި އެ ދެ ޓީމު ވާދަކުރާނީ ކްލަބް ވެމްކޯ އާއި ޕޮލިސް ކްލަބާއެވެ.

މިދިޔަ އަހަރުގެ ފައިނަލުގައި ވެމްކޯގެ މައްޗަށް ކުރިހޯދައި މުބާރާތުގެ ތަށި އުފުލާލީ މާފަންނު ޔޫތު ޑިވެލޮޕްމަންޓް އެސޯސިއޭޝަން (މައިޑާ) އެވެ. ނަމަވެސް މި ފަހަރުގެ މުބާރާތުގައި މައިޑާ ވާދައެއް ނުކުރެއެވެ.