ސްޕެނިޝް ލަލީގާ: ލެގަނޭޒް ބަލިކޮށް ބާސާ ލީޑު ފުޅާކޮށްފި

ސްޕެނިޝް ލަލީގާގައި ލެގަނޭޒް ބަލިކޮށް ބާސެލޯނާއިން ޕޮއިންޓް ތާވަލުގެ އެއްވަނައިގައި ލީޑު ފުޅާކޮށްފިއެވެ.

އާދީއްތަ ދުވަހުގެ ރޭ ކުޅުނު މެޗު ލެގަނޭޒްއާ ވާދަކޮށް ބާސާއިން މެޗު ކާމިޔާބުކުރީ 1-3 ގެ ނަތީޖާއަކުންނެވެ.

ބާސާ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ އެ ޓީމުންނެވެ. އެގޮތުން 32 ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު ކާމިޔާބުކުރީ އުސްމާނޭ ޑެމްބެލޭއެވެ.

މި ލަނޑަށް ފަހު ވެސް ރަނގަޅަށް ކުޅުނީ ބާސާއިންނެވެ. އެގޮތުން ލެގަނޭޒްގެ ހާފާށް ބާރު ބޮޑުކޮށް ގިނަ ހަމަލާތަކެއް އެޓީމުން ވަނީ ފޮނުވާލާފައެވެ.

ފުރަތަމަ ހާފް ނިމުނީ ޑެމްބެލޭގެ ލަނޑުން ލެގަނޭޒްގެ މައްޗަށް 0-1 ގެ ނަތީޖާ އިން ބާސާ ކުރީގައި އޮވެގެންނެވެ.

ދެވަނަ ހާފް ފެށިގެން ލެގަނޭޒްއިން ވަނީ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ 57 ވަނަ މިނެޓުގައި ބްރައިތްވައިޓްއެވެ.

ނަމަވެސް 71 ވަނަ މިނެޓުގައި ބާސާއިން ވަނީ މެޗުގެ ލީޑު އަނބުރާ ހޯދާފައެވެ. މި ލަނޑު އެޓީމަށް ކާމިޔާބުކޮށްދިނީ ލުއިސް ސުއަރޭޒްއެވެ. ބާސާއިން ލީޑު ފުޅާކުރީ އިތުރުވަގުތުގައި ލިއޮނެލް މެސީ ކާމިޔާބުކުރި ލަނޑުންނެވެ.

މިނަތީޖާއާ އެކު ބާސާ އޮތީ ކުޅުނު 20 މެޗުން ލިބުނު 46 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ދެވަނައިގައި އޮތް އެޓްލެޓިކޯ މެޑްރިޑަށް 41 ޕޮއިންޓް ލިބިފައިވާއިރު، ތިން ވަނައިގައި އޮތް ރެއާލް މެޑްރިޑަށް ލިބިފައިވަނީ 36 ޕޮއިންޓެވެ. އަދި ހަތަރުވަނައިގައި އޮތް ސެވިއްޔާއަށް ލިބިފައި ވަނީ 33 ޕޮއިންޓެވެ.