ވީއައިއޭގައި މުދާ ބަލައި ފާސްކުރުމަަށް އިތުރު ދެ އެކްސްރޭ މެޝިން ބަހައްޓައިފި
14 ޖެނުއަރީ 2019 | ހޯމަ 13:56މުދާ އެކްސްޕޯޓު ކުރާ ފަރާތްތަކަށް ބޮޑެތި ލުއިފަސޭހަތަކެއް ލިބޭނެ
އެއާޕޯޓުގެ އެކްސްޕޯޓު ޓާމިނަލްގައި ބެހެއްޓި އެކްސްރޭ މެޝިން
ވެލޭނާ އިންޓަރނޭޝަނަލް އެއާޕޯޓުގައި މުދާ ބަލާފާސް ކުރުމަށް އެންމެ ފަހުގެ އިތުރު ދެ އެކްސްރޭ މެޝިން ބަހައްޓައި ޚިދުމަތް ދޭން ފަށައިފިއެވެ.
މި ދެ މެޝިން ބޭނުންކުރަން ފެށުމަށް ބޭއްވި ޚާއްސަ ރަސްމިއްޔާތުގައި އެމްއޭސީއެލްގެ އެކްޓިން މެނޭޖިން ޑިރެކްޓަރު މޫސާ ސޯލިހު ވިދާޅުވީ ކާގޯ މަސައްކަތްކުރާ މުއައްޒަފުން މަސައްކަތްތައް ހަލުހިކޮށް، ފަރުވާތެރިކަމާ އެކު ކުރިއަށް ގެންދިއުމަށް އެދޭ ކަމަށެވެ.
ވީއައިއޭގެ ކާގޯ އެކްސްޕޯޓް ޓާމިނަލްގައި ބެހެއްޓި ދެ އެކްސްރޭ މެޝިނަކީ ލިބުނު ވަރަށް ބޮޑު ކުރިއެރުމެއްކަން ފާހަގަކުރައްވައި މޫސާ ސޯލިހު ވިދާޅުވީ ކާގޯގެ ގޮތުގައި އެކްސްޕޯޓުކުރާ ހުރިހާ މުދަލެއް ވެސް ދެން ބަރުކުރެވޭނީ އެ މެޝިންތައް މެދުވެރިކޮށް ބަލައި ފާސްކޮށްގެން ކަމަށެވެ. އަދި މުދާ އެކްސްޕޯޓްކުރާ ފަރާތްތަކަށް ވެސް ބޮޑެތި ލުއިފަސޭހަތަކެއް ލިބޭނެ ކަމަށް މޫސާ ސޯލިހު ވިދާޅުވިއެވެ.
މީގެ އިތުރުން މޫސަ ވިދާޅުވީ މިދެ އެކްސްރޭ މެޝިނުން ސަލާމަތާއި ރައްކާތެރިކަން އިތުރަށް ޔަގީން ކުރެވި، އިތުބާރު ބޮޑުވެގެންދާނެ ކަމަށެވެ.
