ހަންޏާ މީދޫ ސުކޫލްގެ ގްރޭޑް ހަތަރެއް އަދި ފަހެއްގެ އެއްވެސް ދަރިވަރަކު މިއަދު ސުކޫލަކަށް ނުފޮނުވާކަމުގެ މައުލޫމާތު ރާއްޖެއެމްވީއަށް ލިބިއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ހަންޏާމީދޫ ކައުންސިލްގެ ނައިބް ރައީސް ހަސަން އަޝްރަފް ވިދާޅުވީ، ދަރިވަރުން ސްކޫލަށް ނުދާ ވާހަކައަކީ ރަނގަޅު ވާހަކައެއްކަމަށެވެ.

އަޝްރަފު ވިދާޅުވީ، މަލްޓި-ގްރޭޑް ސިސްޓަމަށް އެރަށުގެ ގްރޭޑް ހަތަރެއް އަދި ފަހަކަށް ކިޔަވައިދޭން ފެށުމުން، އެ ގްރޭޑްތަކުގެ ދަރިވަރުންގެ ނަތީޖާ ދެއްކީ ވަރަށް ދަށްކޮށްކަމަށެވެ. އަދި އެކަމުގެ ސަބަބުން މި އަހަރު އެ ދެ ގްރޭޑް އެއްކޮށްގެން ކިޔައިވައިދޭން ބެލެނިވެރިން ދެކޮޅު ހަދައި ދަރިވަރުން ސްކޫލަށް ނުފޮނުވީކަމަށެވެ.

"މިދިޔަ އަހަރުވެސް އަދި އޭގެ ކުރީ އަހަރުވެސް، އެ ދެ ގްރޭޑް އެއްކޮށް ގެންދިޔައީ. އަޅުގަނޑަށް އެނގިފައިވާ ގޮތުގައި ހަތަރެއް ފަހެއް އެއްކޮށްލައިގެން ކުދިންގެ ނަތީޖާ އެދެވޭގޮތަށް، ބެލެނިވެރިން ބޭނުންވާގޮތަށް ނުކުމެފައި ނުވާތީ އެކަމުގެ ކަންބޮޑުވުމާއިއެކު މިއަހަރު ބަލެނިވެރިން ނިންމި ގޮތް އެއީ" ހަސަން އަޝްރަފް ވިދާޅުވިއެވެ.

ރާއްޖެއެމްވީއަށް މައުލޫމާތު ދެއްވި އެރަށު ސްކޫލުގެ އިސްބޭފުޅަކު ވިދާޅުވީ، އެ ދެ ގްރޭޑްގެ ދަރިވަރުން އެއްކޮށްލައިގެން ކިޔައިވަދޭން ފެށީ ކުރީގެ ސަރުކާރު އޮތް އިރު، އެޑިއުކޭޝަން މިނިސްޓްރީގެ ނިންމުމާ އެއްގޮތަށްކަމަށެވެ. ނަމަވެސް އެވްރެޖްކޮށް ނަތީޖާތައް ދަށްކަމަށް ފާހަނގަކުރެވި ތަފާތު ދެ އޭޖް ގްރޫޕެއްގެ ކުދިންނަށް ވުމުން އެކި ކަހަލަ މައްސަލަތައް ކުރިމަތިވަމުންދާކަމަށްވެސް އޭނާ ވިދާޅުވިއެވެ. 

އޭނާ ވިދާޅުވީ، މި މައްސަލައިގައި އެޑިއުކޭޝަން މިނިސްޓްރީއާ ވާހަކަ ދެކެވިފައިވާއިރު، މައްސަލަ ހައްލުކުރުމަށްޓަކައި މިނިސްޓްރީގެ ޓީމެއް މާދަމާ އެރަށަށް ޒިޔާރަތް ކުރުމަށް ހަމަޖެހިފައިވާކަމަށެވެ.

ހަންޏާމީދޫ ސްކޫލްގައި 110 ދަރިވަރުން ތައުލީމް ހާސިލްކުރަމުންދާއިރު، މަލްޓި-ގްރޭޑްގައި ކިޔަވާ 18 ދަރިވަރުން ތިބެއެވެ. އެ ސްކޫލްގައި އެލްކޭޖީން ފެށިގެން ގްރޭޑް 10 އާހަމައަށް ކިޔަވައިދެއެވެ.