އެފްއޭ ކަޕް: ރޮދާހަމް ބަލިކޮށް ސިޓީވެސް ހަތަރު ވަނަ ބުރަށް

އެފްއޭ ކަޕްގައި ރޮދާހަމް ޔުނައިޓެޑް ބަލިކޮށް މެންޗެސްޓާ ސިޓީވެސް ހަތަރުވަނަ ބުރަށް ދަތުރުކޮށްފިއެވެ.

އާދީއްތަ ދުވަހުގެ ރޭ ކުޅުނު މެޗުން ރޮދާހަމް އަތުން ސިޓީ މޮޅުވީ 0-7 ގެ ތަފާތުބޮޑު ނަތީޖާއަކުންނެވެ.

ސިޓީ ދަނޑުގައި ކުޅުނު މި މެޗު ފެށިގެން 12 ވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު ކާމިޔާބުކުރީ ރަހީމް ސްޓާލިންއެވެ. ސިޓީން ލީޑު ފުޅާކުރީ 43 ވަނަ މިނެޓުގައި ފޮޑެން ކާމިޔާބުކުރި ލަނޑުންނެވެ.

ފުރަތަމަ ހާފް ނިމުމުމުގެ ކުރިން ސިޓީން ވަނީ ތިންވަނަ ލަނޑު ކާމިޔާބުކޮށްފައެވެ. މި ލަނޑަކީ ރޮދާހަމްގެ ކުޅުންތެރިޔެއް އަތުން ބައިކޮޅަށް ވަތް ލަނޑެކެވެ. ފުރަތަމަ ހާފް ނިމުނީ 0-3 ގެ ނަތީޖާއިން ރޮދާހަމްގެ މައްޗަށް ސިޓީ ކުރީގައި އޮވެގެންނެވެ.

ދެވަނަ ހާފް ފެށިގެންވެސް ސިޓީގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު، ސިޓީގެ ހަތަރުވަނަ ލަނޑު 52 ވަނަ މިނެޓުގައި ކާމިޔާބުކުރީ ގެބްރިއަލް ޖީސަސްއެވެ. ފަސްވަނަ ލަނޑު 73 ވަނަ މިނެޓުގައިރިޔާދް މަހުރޭޒް ކާމިޔާބުކުރިއިރު، ހަވަނަ ލަނޑު 78 ވަނަ މިނެޓުގައި ކާމިޔާބުކުރީ އޮޓަމެންޑީއެވެ. އަދި ހަތްވަނަ ލަނޑު 85 ވަނަ މިނެޓުގައި ކާމިޔާބުކުރީ ލީރޯއި ސާނޭއެވެ.

މުޅި މެޗުގައިވެސް ރޮދާހަމްގެ ފަރާތުން މާ އެދެވޭ ކުޅުމެއް ފެނިގެން ގޮސްފައިނުވާއިރު، ލަނޑު ޖެހުމަށްވެސް އެޓީމަށް ރަނގަޅު ފުރުސަތުތަކެއް ލިބިފައެއް ނުވެއެވެ.