އެންމެ މޮޅު ކުޅުންތެރިޔަކަށް ދަގަނޑޭ އާއި ފަދުވާ

އެފްއޭއެމް އާއި މޯލްޑިވްސް ފުޓްބޯލް ޑޯޓްކޮމް ގުޅިގެން ބާއްވާ އެފްއޭއެމް އެވޯޑްސް އިން ހޮވާ ރާއްޖޭގެ އެންމެ މޮޅު ފިރިހެން ފުޓުބޯޅަ ކުޅުންތެރިޔާގެ މަގާމު ޓީސީ ސްޕޯޓްސް ކްލަބަށް ކުޅެމުން އަންނަ އަލީ އަޝްފާގު (ދަގަނޑޭ) އަށް ލިބިއްޖެއެވެ.

ހުކުރު ދުވަހު ކްލަބް ފަރުގައި ބޭއްވި މޯލްޑިވްސް ފުޓްބޯލް އެވޯޑްސްގެ އެންމެ މޮޅު ފިރިހެން ފުޓުބޯޅަ ކުޅުންތެރިޔާގެ މަގާމު ދަގަނޑޭއާ ހަވާލުކުރީ އެފްއޭއެމްގެ ރައީސް ބައްސާމް އަދީލް ޖަލީލްއެވެ.

މޮޅު ކުޅުންތެރިޔާއަށް ދަގަނޑޭއާ ވާދަކުރީ ޓީސީގެ އިބްރާހިމް މަހުދީ (ފޭދޫ އިއްބެ) އަދި ކްލަބް އީގަލްސްގެ ރިޒުވާން އަހުމަދު (ރިޒޭ) އެވެ.

މިއަހަރު އެންމެ ގިނަ ލަނޑު ޖަހައިގެން ރަންބޫޓްވެސް ހޯދީ ދަގަނޑޭއެވެ. މި ސީޒަނުގެ ކުރީކޮޅުގައި ނިއު ރޭޑިއަންޓް ސްޕޯޓްސް ކްލަބަށް ކުޅުމަށް ފަހު ފަހުން ޓީސީ އަށް ބަދަލުވި އުމުރުން 33 އަހަރުގެ ދަގަނޑޭ ވަނީ މި ސީޒަނުގައި ޖުމްލަ 42 ގޯލު ޖަހައިފަ އެވެ. ދަގަނޑޭ ރަން ބޫޓު ހާސިލްކުރީ 76 ޕޮއިންޓް ހަމަކޮށްގެންނެވެ.

މި ސީޒަނުގައި ނިއުއާއެކު މާލޭ ލީގު ކާމިޔާބުކުރި އަދި ޓީސީއާއެކު ދިރާގު ދިވެހި ޕްރިމިއާ ލީގު ކާމިޔާބުކުރި ދަގަނޑޭގެ ޕޮއިންޓްތަކުގެ ތަފްސީލަށް ބަލާއިރު ނިއު އަށް އޭއެފްސީ ކަޕުގައި ޖަހައިދިން ހަ ގޯލަށް ވަނީ 18 ޕޮއިންޓް ލިބިފަ އެވެ. ދަގަނޑޭ ނިއު އަށް މާލޭ ލީގުގައި ޖަހައިދިން 14 ލަނޑަށް 14 ޕޮއިންޓް ލިބުނުއިރު، ޓީސީ އަށް ދިވެހި ޕްރިމިއާ ލީގުގައި ޖަހައިދިން 22 ލަނޑަށް ވަނީ 44 ޕޮއިންޓް ލިބިފަ އެވެ.

އެންމެ އުންމީދީ ފިރިހެން ކުޅުންތެރިޔަކަށް ހޮވިފައިވަނީ ށ،ފޯކައިދޫގެ މުހައްމަދު ޖައިލަމްއަށެވެ. އޭނާ ވަނީ މިފަހަރު ފޯކައިދޫގައި މޮޅު ކުޅުމެއް ދައްކާ އެޓީމަށް ގަދަ ހަތެއް ކަށަވަރުކޮށްދިނުމަށް މުހިންމު ދައުރެއް އަދާކޮށްދީފައެވެ.

އެންމެ މޮޅު އަންހެން ކުޅުންތެރިޔަކަށް ހޮވިފައިވަނީ މިއަހަރު ގައުމީ އަންހެން ޓީމަށް މޮޅު ކުޅުމެއް ދެއްކި ކެޕްޓަން ފަދުވާ ޒާހިރުއަށެވެ. އޭނާ ވަނީ މިއަހަރު ބޭއްވި އޮލިމްޕިކް ކޮލިފިކޭޝަންގައި މޮޅު ކުޅުމެއް ދެއްކުމުގެ އިތުރުން ސިންގަޕޫރުގައި ބޭއްވި ސިންގަޕޫރު އިންޓަނޭޝަނަލް ކުއަޑަ ރެންގިއުލާ މުބާރާތުގެ ލޯ މެޑަލް ރާއްޖެއަށް ހޯދައި ދިނުމަށް މުހިންމު ދައުރެއް އަދާކޮށްފައެވެ.

އެންމެ އުންމީދީ އަންހެން ކުޅުންތެރިޔަކަށް ހޮވިފައިވަނީ އައިޝަތު ފިރުޝާއެވެ. އޭނާވެސް ވަނީ ސިންގަޕޫރުގައި ބޭއްވި މުބާރާތުގެ އިތުރުން އޮލިމްޕިކް ކޮލިފިކޭޝަންގައި މޮޅު ކުޅުމެއް ދައްކާފައެވެ.

އެންމެ މޮޅު ބިދޭސީ ކުޅުންތެރިޔަކަށް މާޒިޔާގެ ސްޓެވާޓްއަށް ލިބުނުއިރު، އޭނާ ވަނީ މާޒިޔާއަށް ގިނަ ލަނޑުތަކެއް ކާމިޔާބުކޮށްދީފައެވެ. އެގޮތުން އޭނާ ވަނީ ދިވެހި ޕްރިމިއާ ލީގުގެ ދެވަނަ މާޒިޔާއަށް ހޯދައި ދިނުމަށްވެސް މުހިންމު ދައުރެއް އަދާކޮށްފައެވެ.

އެންމެ މޮޅު ގޯލް ކީޕަރަކަށް ހޮވިފައިވަނީ ޓީސީގެ ލިމްބޫ ކިރަން ކުމާރަށެވެ. އޭނާ ވަނީ ޓީސީއަށް ދިވެހި ޕްރިމިއާ ލީގު ކާމިޔާބުކޮށްދިނުމަށް މުހިންމު ދައުރެއް އަދާކޮށްދީފައެވެ.

އެންމެ މޮޅު ކޯޗަކަށް ހޮވިފައިވަނީ ޓީސީ އަށް ދިވެހި ޕްރިމިއާ ލީގު ކާމިޔާބުކޮށްދިން މުހައްމަދު ނިޒާމް (ނިޒާމްބެ) އަށެވެ. މިއީ މި އެވޯޑް ނިޒާމްބެ ހޯދި ދެވަނަ ފަހަރެވެ. ނިޒާމްބެ ވަނީ މި އެވޯޑް 2016 ވަނަ އަހަރު ޓީސީގައި ހުރެ ހޯދާފައެވެ.

ދިވެހި ރާއްޖެއަށް އެންމެ ފުރަތަމަ ލަނޑު ޖެހި ކުޅުންތެރިޔާ މަރުހޫމް އަބްދުﷲ ރަޝީދު (ޖޫލޭ) ގެ ނަމުން ހާއްސަކޮށްގެންދޭ "ޖޫލޭ އެވޯޑު" މިފަހަރު ލިބުނީ ނިއުގެ ހަމްޒާ މުހައްމަދު (ހަމްޕު) އަށެވެ. އެއީ އޭނާ ދިވެހި ޕްރިމިއާ ލީގުގައި ނިލަންދޫ ކޮޅަށް ޖެހި ލަނޑެކެވެ. އޭނާ އެ ލަނޑު ޖެހީ ހަތަރު ކުޅުންތެރިން ކައިރިން ނައްޓާލުމަށްފަހުއެވެ.

މިފަހަރު ލައިފްޓައިމް އެޗީވްމެންޓް އެވޯޑު ލިބިފައިވަނީ ކުރީގެ ރެފްރީ މައްލާ ޅަހުއްތުއަށެވެ. މި އެވޯޑު ހަފްލާގައި ސާފް ޗެމްޕިއަންޝިޕް 2008 ވަނަ އަހަރު ކާމިޔާބުކުރި ޓީމާއި، މި އަހަރު ކާމިޔާބުކުރި ޓީމުގައި ހިމެނޭ ހުރިހާ ކުޅުންތެރިން އަދި އޮފިޝަލުންގެ އަގުވަޒަން ކުރުމުގެ ގޮތުން ވަނީ ހާއްސަ ބެޖެއް ދީފައެވެ. އަދި މިއަހަރު ސާފް ޗެމްޕިއަންޝިޕްގެ އެންމެ މޮޅު ކުޅުންތެރިޔާގެ މަގާމު ހޯދި ކީޕަރު މުހައްމަދު ފައިސަލަށް ވަނީ އެވޯޑެއްވެސް ދީފައެވެ.

މި އެވޯޑުގައި މިފަހަރު އެވޯޑު ނުދެނީ ބެސްޓް ސަޕޯޓްސް އެވޯޑެވެ. އެ އެވޯޑް މިދިޔަ އަހަރު ހޯދީ ދިވެހި ޕްރިމިއާ ލީގުގައި ވާދަކުރި އއ.މާޅޮސްއެވެ. އަންނަ އަހަރުގެ އެވޯޑުގައި ގްރާސް ރޫޓް އެވޯޑާއި، އެންމެ ރަނގަޅު ކަވަރޭޖެއް ގެނެސްދޭ މީޑިއާއަކަށް އެވޯޑު ދިނުމަށް ވަނީ ނިންމާފައެވެ.