ދިރާގު ދިވެހި ޕްރިމިއާ ލީގުގައި ގްރީން ސްޓްރީޓުން ނިއުރޭޑިއަންޓް ސްޕޯޓްސް ކްލަބް ކޮޅަށް ފަސް ލަނޑު ޖަހައިފިއެވެ.

ބުރާސްފަތި ދުވަހުގެ ރޭ ކުޅުނު މެޗު ނިއުއާ ވާދަކޮށް ގްރީން އިން މެޗު ކާމިޔާބުކުރީ 1-5 ގެ ތަފާތު ބޮޑު ނަތީޖާއަކުންނެވެ.

ގަލޮޅު ދަނޑުގައި ކުޅުނު މެޗު ފެށިގެން ލަނޑު ޖަހާ ލީޑު ނެގީ ގްރީން އިންނެވެ. މި ލަނޑު 28 ވަނަ މިނެޓުގައި އެޓީމަށް ކާމިޔާބުކޮށްދިނީ ރޮލާންޑް ރަފައެލް ބިލާލާ އެވެ.

އެހެންނަމަވެސް އޭގެ ދެ މިނެޓު ފަހުން ނިއުގެ އަލީ ފާސިރު (ސެންޓޭ) ވަނީ ލަނޑެއް ކާމިޔާބުކޮށް އެޓީމަށް ނަތީޖާ ހަމަހަމަ ކޮށްދީފައެވެ. ފުރަތަމަ ހާފް ނިމުމުގެ ކުރިން ގްރީން އިން ވަނީ މެޗުގެ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އާދަމް އިމްރާންއެވެ.

މި ލަނޑުތަކާއެކު ފުރަތަމަ ހާފް ނިމުނީ 1-2 ގެ ނަތީޖާއިން ނިއުގެ މައްޗަށް ގްރީން ކުރީގައި އޮވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް ގްރީން އިން ވަނީ މެޗުގެ ލީޑު ފުޅާކޮށްފައެވެ. މި ލަނޑު 53 ވަނަ މިނެޓުގައި އެޓީމަށް ކާމިޔާބުކޮށްދިނީ ރޮލާންޑް ރަސެލް ބިލާލާއެވެ.

މި ލަނޑަށްފަހުވެސް ގްރީން އިން ދިޔައީ ނިއުގެ ގޯލަށް ނުރާއްކާ ކުރަމުންނެވެ. އެގޮތުން 80 ވަނަ މިނެޓުގައި ރޮލެންޑް ރަސެލް ބިލާލާ ވަނީ އެޓީމަށް ލަނޑެއް ކާމިޔާބުކޮށް އޭނާގެ ހެޓްރިކް ފުރިހަމަކޮށްފައެވެ. ގްރީންގެ ފަސްވަނަ ލަނޑު އިތުރުވަގުތުގައި ކާމިޔާބުކުރީވެސް އޭނާއެވެ.

މި ނަތީޖާއާއެކު ގްރީން އޮތީ ކުޅުނު 14 މެޗުން ލިބުނު 23 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ. މެޗުން ބަލިވި ނިއު އޮތީ 14 މެޗުން ލިބުނު 27 ޕޮއިންޓާއެކު ހަތަރުވަނައިގައެވެ. އެއްވަނައިގައި 14 މެޗުން 39 ޕޮއިންޓް ހަމަކޮށްގެން އޮތީ ޓީސީ ސްޕޯޓްސް ކްލަބެވެ.