ބޭރުގެ ފަރާތްތަކަށް ބިން މިލްކު ކުރެވޭ އިސްލާހު ބާތިލު ކުރަން ހުށަހަޅާނަން: ބޮޗޭ
ގާނޫނުއަސާސީ އިސްލާހު ކުރީ 70 މެމްބަރުންގެ ވޯޓުން
މާފަންނު ދެކުނު ދާއިރާގެ މެމްބަރު އަބްދުﷲ ރިފާއު
ބޭރުގެ ފަރާތްތަކަށް ރާއްްޖެއިން ބިން މިލްކު ކުރެވޭ ގޮތަށް ގާނޫނުއަސާސީއަށް ގެނެސްފައިވާ އިސްލާހު ބާތިލު ކުރަން ހުށަހަޅުއްވާނެ ކަމަށް ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެމްބަރު އަބްދުﷲ ރިފާއު (ބޮޗޭ) ވިދާޅުވެއްޖެއެވެ.
ބޭރުގެ ފަރާތްތަކަށް ބިން މިލްކު ކުރެވޭ ގޮތަށް ގާނޫނުއަސާސީ އިސްލާހު ކުރީ 2015 ވަނަ އަހަރުގެ ޖުލައި މަހުގެ 22 ވަނަ ދުވަހުއެވެ. ރިފާއު ވެސް ވޯޓު ދެއްވި، އެ އިސްލާހު މަޖިލީހުން ފާސްވީ 70 މެމްބަރުންގެ އަގުލަބިއްޔަތުންނެވެ. ސަރުކާރުން ހުށަހެޅި އެ އިސްލާހު ފާސް ކުރުމަށް އެމްޑީޕީ އާއި ޖޭޕީން ވެސް ވޯޓު ދީފައިވެއެވެ.
ހޯމަ ދުވަހު ރިފާއު ކުރެއްވި ޓްވީޓެއްގައި ވިދާޅުވީ އެ އިސްލާހަކީ ގިނަ ރައްޔިތުންގެ ކަންބޮޑުވުންފާޅުކޮށްފައިވާ އިސްލާހެއް ކަމަށާއި އިސްލާހު ބާތިލު ކުރަން މަޖިލީހަށް ހުށަހެޅުމުން ފާސްވާނެ ކަމަށް އުންމީދު ކުރައްވާ ކަމަށެވެ.
ބޭރުގެ ފަރާތްތަކަށް ރާއްޖެއިން ބިން މިލްކު ކުރެވޭނީ އެއް ބިލިއަން އެމެރިކާ ޑޮލަރު އިންވެސްޓު ކުރުމުންނެވެ. އަދި މިލްކު ކުރާ ބިމުގެ 70 ޕަސެންޓަކީ ހިއްކާފައިވާ ސަރަހައްދަކަށް ވާންޖެހޭނެ ކަމަށް ގާނޫނުއަސާސީއަށް ގެނެސްފައިވާ އިސްލާހުގައިވެއެވެ.
