އިޓާލިއަން ލީގު: ރޮނާލްޑޯގެ ދެ ލަނޑުން އެމްޕޮލީގެ މައްޗަށް ޔުވަންޓަސް ކުރިހޯދައިފި

އިޓާލިއަން ލީގުގައި ކްރިސްޓިއާނޯ ރޮނާލްޑޯ ކާމިޔާބުކުރި ދެ ލަނޑުން އެމްޕޮލީގެ މައްޗަށް ޔުވަންޓަސް ކުރިހޯދައިފިއެވެ.

ހޮނިހިރު ދުވަހުގެ ރޭ އެމްޕޮލީއާ ވާދަކޮށް ޔުވަންޓަސް އިން މެޗު ކާމިޔާބުކުރީ 1-2 ގެ ނަތީޖާއަކުންނެވެ.

އެމްޕޮލީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލް ކޮށްގެން ރަނގަޅަށް ކުޅުނީ ޔުވަންޓަސްއެވެ. އެގޮތުން އެޓީމުން ވަނީ އެމްޕޮލީގެ ހާފަށް ބާރުބޮޑުކޮށް ހަމަލާތަކެއް އުފައްދާފައެވެ.

އެހެން ނަމަވެސް ޔުވަންޓަސް އިން ރަނގަޅަށް ކުޅެމުން ދަނިކޮށް 28 ވަނަ މިނެޓުގައި އެމްޕޮލީން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކަޕޫޓޯއެވެ.

މި ލަނޑާއެކު ޔުވަންޓަސް އިން ވަނީ އެޓީމުގެ ކުޅުން އިތުރަށް ވަރުގަދަކޮށް ލަނޑު ޖެހުމަށް ފުލުފުލުގައި ފުރުސަތުތަކެއް ތަނަވަސް ކޮށްފައެވެ. އެހެންނަމަވެސް ފުރަތަމަ ހާފް ނިމުނީ 0-1 ގެ ނަތީޖާއިން ޔުވަންޓަސްގެ މައްޗަށް އެމްޕޮލީ ކުރީގައި އޮވެގެންނެވެ.

ދެވަނަ ހާފް ފެށިގެން ޔުވަންޓަސް އިން ވަނީ މެޗުގެ ނަތީޖާ ހަމަހަމަ ކޮށްފައެވެ. މި ލަނޑު 54 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކުރީ ރޮނާލްޑޯއެވެ.

ޔުވަންޓަސް އިން މެޗުގެ ލީޑު ނެގީ 70 ވަނަ މިނެޓުގައެވެ. މި ލަނޑުވެސް ޔުވަންޓަސް އަށް ކާމިޔާބުކޮށްދިނީ ރޮނާލްޑޯއެވެ.

މި ނަތީޖާއާއެކު ޔުވަންޓަސް އޮތީ ކުޅުނު 10 މެޗުން ލިބުނު 28 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި އެމްޕޮލީ އޮތީ ކުޅުނު 10 މެޗުން ލިބުނު ހަ ޕޮއިންޓާއެކު ޕޮއިންޓް ތާވަލުގެ 18 ވަނައިގައެވެ.

ހޮނިހިރު ދުވަހުގެ ރޭ ކުޅުނު އެހެން މެޗުތަކަށް ބަލާއިރު، އެޓަލާންޓާ އިން ވަނީ 0-3 ގެ ނަތީޖާއިން ޕާމާގެ މައްޗަށް ކުރި ހޯދާފައެވެ. އަދި ޓޮރީނޯ އަދި ފިއޮރެންޓީނާ ބައްދަލުކުރި މެޗު ނިމުނީ 1-1 ގެ ނަތީޖާއަކުން އެއްވަރުވެގެންނެވެ.