ދިވެހި ޕްރިމިއާ ލީގު: ގްރީން ބަލިކޮށް މާޒިޔާ ދެވަނަ އަށް ޖެހިލައިފި

ދިވެހި ޕްރިމިއާ ލީގުގައި ކްލަބް ގްރީން ސްޓްރީޓްސް ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން ޕޮއިންޓް ތާވަލުގެ ތިންވަނަ އަށް ޖެހިލައިފިއެވެ.

އާދީއްތަ ދުވަހު ހަވީރު ކުޅުނު މެޗު ގްރީންއާ ވާދަކޮށް މާޒިޔާ އިން މެޗު ކާމިޔާބުކުރީ 2-4 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ފަސްވަނަ މިނެޓުގައި ގްރީން އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ބިދޭސީ ކުޅުންތެރިޔާ ރޮލަންޑް ރަސެލް ބިލާލާއެވެ.

އެހެންނަމަވެސް 23 ވަނަ މިނެޓުގައި މާޒިޔާ އިން ވަނީ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މި ސީޒަނުގައި މޮޅު ކުޅުމެއް ދައްކަމުން އަންނަ މުހައްމަދު އިރުފާން އެވެ.

މި ލަނޑުތަކާއެކު ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ގްރީން އިން ވަނީ ދެވަނަ ފަހަރަށް މެޗުގެ ލީޑު އަނބުރާ ހޯދާފައެވެ. މި ލަނޑު އެޓީމަށް ކާމިޔާބުކޮށްދިނީ އަހުމަދު ރިލުވާންއެވެ.

އެހެންނަމަވެސް މެޗުގެ 80 ވަނަ މިނެޓުގައި މާޒިޔާގެ ބިދޭސީ ފޯވާޑް ކޯނެލިއަސް ސްޓެވާޓް ވަނީ އެޓީމަށް ނަތިޖާ ހަމަހަމަކޮށްދީފައެވެ. އޭގެ މިނެޓެއް ފަހުން އިތުރު ލަނޑެއް ކާމިޔާބުކޮށް ސްޓެވާޓް ވަނީ ފުރަތަމަ ފަހަރަށް މާޒިޔާ އަށް ލީޑު ހޯދައިދީފައެވެ.

މާޒިޔާ އިން މެޗުގެ ލީޑު ފުޅާކުރީ ކެޕްޓަން އަސަދުﷲ އަބްދުﷲ އެވެ. މެޗުގެ މޮޅު ކުޅުންތެރިޔަކަށް ހޮވުނީ ސްޓެވާޓްއެވެ.

މި ނަތީޖާއާއެކު މާޒިޔާ އޮތީ ކުޅުނު 10 މެޗުން ލިބުނު 22 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ގްރީން އޮތީ ކުޅުނު 10 މެޗުން ލިބުނު 17 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ.