ކ. މާލެ
|
21 އޮކްޓޯބަރ 2018 | އާދީއްތަ 09:19
ބާސާ ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ
ބާސާ ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ
ޓްވިޓަރ
ސްޕެނިޝް ލަލީގާ
ސްޕެނިޝް ލަލީގާ: ސެވިއްޔާ ބަލިކޮށް ބާސާ އެއްވަނަ އަށް ޖެހިލައިފި
 
ބާސާ އެއްވަނައިގައި އޮތީ 18 ޕޮއިންޓާއެކު

ސްޕެނިޝް ލަލީގާގައި ސެވިއްޔާ ބަލިކޮށް ބާސެލޯނާ ޕޮއިންޓް ތާވަލުގެ އެއްވަނަ އަށް ޖެހިލައިފިއެވެ.

ހޮނިހިރު ދުވަހުގެ ރޭ ކުޅުނު މެޗު ސެވިއްޔާއާ ވާދަކޮށް ބާސާ އިން ކާމިޔާބު ކުރީ 2-4 ގެ ނަތީޖާއަކުންނެވެ.

ބާސާ ދަނޑުގައި ކުޅުނު މި މެޗު ފެށިގެން ދެވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު ލިއޮނެލް މެސީގެ އެހީތެރިކަމާއެކު ކާމިޔާބުކުރީ ފިލިޕޭ ކުޓީނިއޯއެވެ.

މި ލަނޑަށް ފަހު ސެވިއްޔާ އަށް ވަނީ ނަތީޖާ ހަމަހަމަކުރުމަށް ރަނގަޅު ފުރުސަތެއް ލިބި ބޭކާރުވެފައެވެ. އެހެން ނަމަވެސް 12 ވަނަ މިނެޓުގައި ބާސާ އިން ވަނީ ލީޑު ފުޅާކޮށްފައެވެ. މި ލަނޑު ލުއިސް ސުއަރޭޒްގެ އެހީތެރިކަމާއެކު ކާމިޔާބުކުރީ މެސީއެވެ.

މެޗުގެ 18 ވަނަ މިނެޓުގައި ބާސާގެ މެސީގެ އަތަށް އަނިޔާވުމުން އޭނާ ވަނީ ޑެމްބެލޭއާ ބަދަލު ކޮށްފައެވެ. އެގޮތުން މެޗުގެ ބޮޑުބައި ބާސާ އިން ކުޅުނީ މެސީއާ ނުލައެވެ.

ފުރަތަމަ ހާފް ނިމުނީ ބާސާގެ މޮޅު ކުޅުމާއެކު 0-2 ގެ ނަތީޖާއިން ސެވިއްޔާގެ މައްޗަށް އެޓީމު ކުރީގައި އޮވެގެންނެވެ.

ދެވަނަ ހާފް ފެށިގެންވެސް ބާސާގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު، 63 ވަނަ މިނެޓުގައި އެޓީމުން ވަނީ ތިންވަނަ ލަނޑު ކާމިޔާބު ކޮށްފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކުރީ ސުއަރޭޒްއެވެ.

މެޗުގެ ފަހު 10 މިނެޓު ތެރޭގައި ތިން ލަނޑު ވަނީ ފެނިގެން ގޮސްފައެވެ. އެގޮތުން 81 ވަނަ މިނެޓުގައި ސެވިއްޔާ އިން ނަތީޖާގެ ފަރަގު ކުޑަކުރިއިރު، މި ލަނޑަކީ ބާސާގެ ކްލިމެންޓް ލެންގްލެޓް އަތުން ބައިކޮޅަށް ވަން ލަނޑެކެވެ.

އެހެންނަމަވެސް މެޗުގެ 88 ވަނަ މިނެޓުގައި އިވާން ރަކިޓިޗް ބާސާގެ ހަތަރުވަނަ ލަނޑު ކާމިޔާބު ކޮށްފައިވާއިރު، އިތުރުވަގުތުގައި ސެވިއްޔާ އިން ވަނީ އެޓީމުގެ ދެވަނަ ލަނޑު ކާމިޔާބުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ލުއިސް މުރިއެލްއެވެ.

މި ނަތީޖާއާއެކު ބާސާ އޮތީ ކުޅުނު ނުވަ މެޗުން ލިބުނު 18 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ސެވިއްޔާ އަށް ނުވަ މެޗުން 16 ޕޮއިންޓް ލިބިފައިވާއިރު، އެޓީމު ވަނީ ޕޮއިންޓް ތާވަލުގެ ތިންވަނަ އަށް ވެއްޓިފައެވެ.

ހޮނިހިރު ދުވަހުގެ ރޭ އެޓްލެޓިކޯ މެޑްރިޑް އާއި ވިޔަރެއާލް ބައްދަލުކުރި މެޗު ނިމުނީ 1-1 ގެ ނަތީޖާއިން އެއްވަރުވެގެންނެވެ.

ވިޔަރެއާލް ދަނޑުގައި ކުޅުނު މި މެޗުގައި ފުރަތަމަ ހާފްގައި ލަނޑެއް ފެނިގެން ނުދާއިރު، ފުރަތަމަ ލަނޑު ޖަހާ ލީޑު ނެގީ އެޓްލެޓިކޯ އިންނެވެ. މި ލަނޑު 51 ވަނަ މިނެޓުގައި ކާމިޔާބުކުރީ ފިލިޕޭ ލުއިޒްއެވެ. ވިޔަރެއާލް އިން ނަތީޖާ ހަމަހަމަކުރީ 65 ވަނަ މިނެޓުގައި މާރިއޯ ގަސްޕާ ކާމިޔާބުކުރި ލަނޑުންނެވެ.

މި ނަތީޖާއާއެކު އެޓްލެޓިކޯ އޮތީ ސެވިއްޔާއާ އެއް އަދަދަކަށް ޕޮއިންޓް ހޯދައިގެން އެޓީމުގެ ފަހަތުން ޕޮއިންޓް ތާވަލުގެ ހަތަރުވަނައިގައެވެ. އެޓްލެޓިކޯ އަށް ހަތަރުވަނަ ލިބެނީ ލަނޑުގެ ތަފާތުންނެވެ. ވިޔަރެއާލް އޮތީ ނުވަ މެޗުން ލިބުނު ނުވަ ޕޮއިންޓާއެކު ޕޮއިންޓް ތާވަލުގެ 14 ވަނައިގައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުޝާމް މުހަޢްމަދް
0%
0%
0%
0%
0%
0%
ކޮމެންޓް