ދިވެހި ޕްރިމިއާ ލީގު: ނިލަންދޫ ބަލިކޮށް އީގަލްސް ދެވަނަ އަށް ޖެހިލައިފި

ދިރާގު ދިވެހި ލީގުގައި ބޮޑު ތަފާތަކުން ފ.ނިލަންދޫ ބަލިކޮށް ކްލަބް އީގަލްސް ޕޮއިންޓް ތާވަލުގެ ދެވަނަ އަށް ޖެހިލައިފިއެވެ.

ބުދަ ދުވަހު ހަވީރު ކުޅުނު މެޗު ނިލަންދޫއާ ވާދަކޮށް އީގަލްސް އިން މެޗު ކާމިޔާބުކުރީ 2-7 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ހަވަނަ މިނެޓުގައި އީގަލްސް އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މުހައްމަދު ނާއިމްއެވެ. އޭގެ ތިން މިނެޓު ފަހުން އީގަލްސް އަށް ލީޑު ފުޅާކޮށްދިނީ އިސްމާއިލް ޖަމީލްއެވެ.

މި ލަނޑަށްފަހުވެސް އީގަލްސް އިން ދިޔައީ ނިލަންދޫގެ ގޯލަށް ނުރައްކާ ކުރަމުންނެވެ. އެގޮތުން 14 ވަނަ މިނެޓުގައި ހުސެއިން ޝިފާއު ޔޫސުފް އީގަލްސްގެ ތިންވަނަ ލަނޑު ކާމިޔާބުކޮށްފައިވާއިރު، 27 ވަނަ މިނެޓުގައި އަހުމަދު ރިޒުވާން ވަނީ އީގަލްސްގެ ހަތަރުވަނަ ލަނޑު ކާމިޔާބުކޮށްފައެވެ.

ފުރަތަމަ ހާފް ނިމުނީ 0-4 ގެ ތަފާތުބޮޑު ނަތީޖާއަކުން ނިލަންދޫގެ މައްޗަށް އީގަލްސް ކުރީގައި އޮވެގެންނެވެ.

އެހެންނަމަވެސް ދެވަނަ ހާފް ފެށިގެން ނިލަންދޫ އިން އެޓީމުގެ ކުޅުން ރަނގަޅުކޮށްފައިވާއިރު، ކުރީކޮޅު އެޓީމުން ވަނީ ދެ ލަނޑު ކާމިޔާބުކޮށްފައެވެ. ނިލަންދޫގެ ފުރަތަމަ ލަނޑު 48 ވަނަ މިނެޓުގައި ލޫކަސް ކާމިޔާބުކުރިއިރު، އޭގެ ފަސް މިނެޓު ފަހުން ލޫކަސް ވަނީ އިތުރު ލަނޑެއް އެޓީމަށް ކާމިޔާބުކޮށްދީފައެވެ.

އެހެންނަމަވެސް އީގަލްސް އިން ވަނީ ދެވަނަ ހާފްގެ ވަކި ހިސާބަކުން މެޗުގެ ކޮންޓްރޯލް އަނބުރާ ހޯދާފައެވެ. އެގޮތުން 74 ވަނަ މިނެޓުގައި އީގަލްސްގެ ފަސްވަނަ ލަނޑު ރިޒުވާން ކާމިޔާބުކޮށްފައިވާއިރު، 88 ވަނަ މިނެޓުގައި ނާއިމް ވަނީ އެޓީމުގެ ހަވަނަ ލަނޑު ކާމިޔާބުކޮށްފައެވެ. އަދި އިތުރު ވަގުތުގައި އެޓީމުން ވަނީ ހަތްވަނަ ލަނޑު ކާމިޔާބުކޮށްފައެވެ. މި ލަނޑަކީ ނިލަންދޫގެ އަލީ ހާޝިމް އަތުން ބައިކޮޅަށް ވަތް ލަނޑެކެވެ.

މި ނަތީޖާއާއެކު އީގަލްސް އޮތީ ކުޅުނު ނުވަ މެޗުން ލިބުނު 19 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ނިލަންދޫ އޮތީ ކުޅުނު ނުވަ މެޗުން ލިބުނު ހަތް ޕޮއިންޓާއެކު ޕޮއިންޓް ތާވަލުގެ ހަތްވަނައިގައެވެ.