ޔުއެފާ ނޭޝަންސް ލީގުގައި ޖަރުމަން ބަލިކޮށް ފްރާންސުން ގްރޫޕްގައި ހަތަރު ޕޮއިންޓްގެ ލީޑެއް ނަގައިފިއެވެ.

އަންގާރަ ދުވަހުގެ ރޭ ކުޅުނު މެޗު ޖަރުމަނާ ވާދަކޮށް ފްރާންސުން މެޗު ކާމިޔާބުކުރީ 1-2 ގެ ނަތީޖާއަކުންނެވެ.

ފްރާންސްގެ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ އެޓީމުންނެވެ. އެހެންނަމަވެސް ފްރާންސުން ރަނގަޅަށް ކުޅެމުން ދަނިކޮށް 14 ވަނަ މިނެޓުގައި ޖަރުމަނުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކުރީ ޓޯނީ ކްރޫޒްއެވެ.

މި ލަނޑާއެކު ޖަރުމަނުން ވަނީ ކުޅުން ރަނގަޅުކޮށްފައެވެ. އެގޮތުން ފްރާންސްގެ ހާފަށް ބާރުބޮޑުކޮށް އެޓީމުން ވަނީ ލީޑު ފުޅާކުރުމަށް ފުރުސަތުތަކެއް ތަނަވަސްކޮށްފައެވެ. އެހެންނަމަވެސް ފުރަތަމަ ހާފްގެ ފަހުކޮޅު ފްރާންސަށްވެސް ވަނީ ނަތީޖާ ހަމަހަމަ ކުރުމަށް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ ކްރޫޒްގެ ލަނޑުން ފްރާންސްގެ މައްޗަށް ޖަރުމަން 0-1 ގެ ނަތީޖާއިން ކުރީގައި އޮވެގެންނެވެ.

ދެވަނަ ހާފް ފެށިގެން ފްރާންސުން ވަނީ އެޓީމުގެ އެޓޭކްތައް ވަރުގަދަކޮށްފައެވެ. އެގޮތުން 62 ވަނަ މިނެޓުގައި އެޓީމުން ވަނީ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އެންޓޯނިއޯ ގްރިޒްމަންއެވެ.

މި ލަނޑަށްފަހުވެސް ފްރާންސްގެ ފަރާތުން މޮޅު ކުޅުމެއް ފެނިގެންދިޔައިރު، އެޓީމުން ދިޔައީ ފުލުފުލުގައި ލަނޑު ޖެހުމަށް ފުރުސަތުތައް ތަނަވަސްކުރަމުންނެވެ. ފްރާންސުން މެޗުގައި ލީޑު ނެގީ 80 ވަނަ މިނެޓުގައި އެޓީމަށް ލިބުނު ޕެނަލްޓީއަކުންނެވެ. މި ލަނޑުވެސް ކާމިޔާބުކޮށްދިނީ ގްރިޒްމަންއެވެ. މި ލަނޑާއެކު ގްރިޒްމަން ވަނީ 26 ލަނޑާއެކު ފްރާންސްގެ ތާރީހުގައި އެންމެ ގިނަ ލަނޑު ޖެހި 10 ކުޅުންތެރިންގެ ތެރޭގައި ހިމެނިފައެވެ.

މި ނަތީޖާއާއެކު ފްރާންސުން ވަނީ ޖަރުމަން އަދި ނެދަލޭންޑްސް ހިމެނޭ ފުރަތަމަ ކެޓަގަރީގެ ގްރޫޕް އެކެއްގެ އެއްވަނައިގައި ހަތަރު ޕޮއިންޓްގެ ލީޑެއް ނަގާފައެވެ. ދެވަނައިގައި ނެދަލޭންޑްސް އޮތީ ކުޅުނު ދެ މެޗުން ލިބުނު ތިން ޕޮއިންޓާއެކު ނެދަލޭންޑްސްއެވެ. ފުލުގައި ޖަރުމަން އޮތީ ކުޅުނު ތިން މެޗުން ލިބުނު އެއް ޕޮއިންޓާއެކުގައެވެ.

ނޭޝަންސް ލީގުގައި ފައިނަލް ބުރަށް ކޮލިފައިވާނީ އެއް ވަނަ އަށް ދާ ޓީމެވެ. އަދި އެންމެ ފުލަށްދާ ޓީމެއް ދެ ވަނަ ކެޓަގަރީ އަށް ރެލިގޭޓްވާނެއެވެ