ޔުއެފާ ނޭޝަންސް ލީގުގައި ސްޕެއިން ބަލިކޮށް އިންގްލޭންޑުން އުންމީދު އާކޮށްފިއެވެ.

ހޯމަ ދުވަހުގެ ރޭ ކުޅުނު މެޗު ސްޕެއިންއާ ވާދަކޮށް އިންގްލޭންޑުން މެޗު ކާމިޔާބުކުރީ 2-3 ގެ ނަތީޖާއަކުންނެވެ.

ސްޕެއިން ދަނޑުގައި ކުޅުނު މި މެޗު ފެށިގެން ރަނގަޅަށް ކުޅުނީ ސްޕެއިނުންނެވެ. އެގޮތުން އެޓީމުން ވަނީ އިންގްލޭންޑްގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތައް ތަނަވަސްކޮށްފައެވެ.

އެހެންނަމަވެސް 16 ވަނަ މިނެޓުގައި އިންގްލޭންޑުން ވަނީ މެޗުގެ ލީޑު ނަގާފައެވެ. މި ލަނޑު މާކަސް ރަޝްފަޑްގެ އެހީތެރިކަމާ އެކު ކާމިޔާބުކުރީ ރަހީމް ސްޓާލިންއެވެ.

އިންގްލޭންޑުން ލީޑު ފުޅާކުރީ 29 ވަނަ މިނެޓުގައެވެ. މި ލަނޑު ހެރީ ކޭންގެ އެހީތެރިކަމާ އެކު ކާމިޔާބުކުރީ މާކަސް ރަޝްފަޑްއެވެ. އިންގްލޭންޑުން ތިން ވަނަ ލަނޑު ޖެހީ 38 ވަނަ މިނެޓުގައެވެ. މި ލަނޑު ހެރީ ކޭންގެ އެހީތެރިކަމާ އެކު ކާމިޔާބުކުރީ ރަހީމް ސްޓާލިންއެވެ.

ފުރަތަމަ ހާފް ނިމުނީ 0-3 ގެ ބޮޑު ތަފާތަކުން ސްޕެއިންގެ މައްޗަށް އިންގްލޭންޑް ކުރީގައި އޮވެގެންނެވެ.

ދެވަނަ ހާފް ފެށިގެން ސްޕެއިނުން އެޓީމުގެ ކުޅުން ރަނގަޅުކޮށްފައިވާއިރު، އިންގްލޭންޑްގެ ހާފަށް ބާރުބޮޑުކޮށް ގިނަ ހަމަލާތަކެއް ވަނީ ފޮނުވާލާފައެވެ. ސްޕެއިނުން ނަތީޖާގެ ފަރަގު ކުޑަކުރީ 58 ވަނަ މިނެޓުގައި މާކޯ އެސެންސިއޯގެ އެހީތެރިކަމާ އެކު ޕެކާ އަލްކަސާ ކާމިޔާބުކުރި ލަނޑުންނެވެ. އަލްކަސާ ލަނޑު ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން އެރިތާ މިނެޓެއް ތެރޭގައެވެ.

ސްޕެއިން އަށް މެޗުގެ ފަހު 20 މިނެޓު ތެރޭގައި ލަނޑު ޖެހުމަށް ފުލުފުލުގައި ގިނަ ފުރުސަތުތައް ވަނީ ލިބި ބޭކާރުވެފައެވެ. ސްޕެއިންގެ ދެވަނަ ލަނޑު އިތުރުވަގުތުގެ ތެރޭގައި ކާމިޔާބުކޮށްދިނީ ކެޕްޓަން ސާޖިއޯ ރާމޮސްއެވެ.

މިއީ 1987 ވަނަ އަހަރު ފަހުން ސްޕެއިންގެ މައްޗަށް އިންގްލޭންޑް ކުރިހޯދުނު ފުރަތަމަ ފަހަރެވެ. އަދި މިއީ 2003 ވަނަ އަހަރު ފަހުން އަމިއްލަ ދަނޑުގައި ސްޕެއިންގެ މައްޗަށް ޓީމަކަށް ކުރިހޯދުނު ފުރަތަމަ ފަހަރެވެ.

މި ނަތީޖާއާ އެކު ރެލިގޭޓު ނުވުމުގެ އުންމީދު އިންގްލޭންޑުން ވަނީ އާކޮށްފައެވެ. މުބާރާތުގެ ފުރަތަމަ މެޗުން އިންގްލޭންޑް ވަނީ ސްޕެއިން އަތުން ބަލިވެފައެވެ. ދެވަނަ މެޗުގައި ރަށުން ބޭރުގައި ކްރޮއޭޝިއާ އަތުން އިންގްލޭންޑް ވަނީ އެއްވަރުވެފައެވެ.

ނޭޝަންސް ލީގުގެ ފުރަތަމަ ކެޓަގަރީގެ ގްރޫޕް ހަތަރެއްގެ އެއް ވަނައިގައި ސްޕެއިން އޮތީ ތިން މެޗުން ހަ ޕޮއިންޓާ އެކު އެވެ. ދެ ވަނައިގައި އިންގްލެންޑް ތިން މެޗުން ހަތަރު ޕޮއިންޓް ހޯދައިގެން އޮތްއިރު، ގްރޫޕުގެ ފުލުގައި އޮތް ކްރޮއޭޝިއާ އަށް ތިން މެޗުން ލިބިފައިވަނީ އެއް ޕޮއިންޓެވެ. ކޮންމެ ޓީމަކަށް ބާކީ ދެ މެޗު އޮތްއިރު، ފައިނަލް ބުރަށް ކޮލިފައިވާނީ އެއް ވަނަ އަށް ދާ ޓީމެވެ. އަދި އެންމެ ފުލަށްދާ ޓީމެއް ދެ ވަނަ ކެޓަގަރީ އަށް ރެލިގޭޓްވާނެއެވެ.