ބީއެމްއެލްގައި ތަފާތު ދުވަހެއް!
3 އޮކްޓޯބަރު 2018 | ބުދަ 14:26ބީއެމްއެލް އިން ހިންގި ހަރަކާތުގެ ތެރެއިން ވަނީ ބޭންކުގެ މުވައްޒަފުންގެ ކުދިން ބޭންކަށް ޒިޔާރަތް ކުރުމުގެ ފުރުސަތު ހުޅުވާލާފައި
ބީއެމްއެލް އިން ބޭއްވި ހަރަކާތުގެ ތެރެއިން
ބީއެމްއެލްގެ މުވައްޒަފުން މަސައްކަތް ކުރުމަށް ހުންނަ ޝައުގުވެރިކަން މަތީ ފެންވަރެއްގައި ހިފެހެއްޓުމުގެ ގޮތުން ކުންފުނިން ހިންގާ ތަފާތު ހަރަކާތްތަކުގެ ތެރެއިން ބެންކް އޮފް މޯލްޑިވްސް (ބީއެމްއެލް) އިން ވަނީ ވަރަށް ތަފާތު ހަރަކާތެއް ބުދަ ދުވަހު ހިންގާފައެވެ.
ބީއެމްއެލް އިން ހިންގި ހަރަކާތުގެ ތެރެއިން ވަނީ ބޭންކުގެ މުވައްޒަފުންގެ ކުދިން ބޭންކަށް ޒިޔާރަތް ކުރުމުގެ ފުރުސަތު ހުޅުވާލާފައެވެ. އަދި ތަފާތު ކުލަކުލައިގެ ފުއްޕާހަމާއި އެކި ކަހަލަ ކަރުދާސް ބޭނުންކޮށްގެން ބީއެމްއެލްގެ ބްރާންޗްތަކާއި ޑިޕާރޓްމަންޓްތައް ވަނީ ޒީނަތްތެރިކޮށްފައެވެ. ކުޑަ ކުދިންނަށް ހާއްސަކޮށްގެން އެކި އުމުރުފުރާއި ގުޅޭ ހަރަކާތްތައްވެސް ބީއެމްއެލް އިން ވަނީ ހިންގާފައެވެ.
މި ހަރަކާތާއި ގުޅޭ ގޮތުން ބީއެމްއެލްގެ މުވައްޒަފުން ބުނީ ކުރެވޭ އިހުސާސްތައް ވަރަށް ތަފާތު ކަމަށާއި އާއިލާގެ ތުއްތު ކުދިންނާއެކު، ވަޒީފާގެ މާހައުލުގައި ވަގުތުކޮޅެއް ހޭދަކޮށްލެވުމުން ވަރަށް އުފާކުރާ ކަމަށެވެ.
މިއަހަރު ބީއެމްއެލް އިން ވަނީ އޭޝިއާގެ ކުންފުނިތަކުގެ ތެރެއިން މަސައްކަތްކުރަން އެންމެ ރަނގަޅު ކުންފުނިތަކަށް ދޭ އެވޯޑް ޖެހިޖެހިގެން ދެވަނަ އަހަރު ހޯދާފައެވެ.
ބޭންކް އޮފް މޯލްޑިވްސްގެ ޑެޕިއުޓީ ސީއީއޯ މުހައްމަދު ޝަރީފް ވިދާޅުވީ ބީއެމްއެލްގައި މަސައްކަތް ކުރަމުން އަންނަ ހުރިހާ މުވައްޒަފުންނަކީ ވެސް ވަރަށް ބުރަކޮށް މަސައްކަތް ކުރާ މުވައްޒަފުން ކަމަށާއި އެ މުވައްޒަފުންގެ ހިދުމަތްތަކަކަކީ އަގުވަޒަން ކުރެވޭ ވަރަށްވުރެ ބުރަ މަސައްކަތެއް ކަމަށެވެ. އަދި ކުދިންނަށް މިފަދަ ހިތްގައިމު މާހައުލެއް ގާއިމްކޮށްލެވޭ ކަމަކީ ހުރިހާ މުވައްޒަފުންނަށްވެސް ލިބޭ އުފަލެއް ކަމަށާއި ބޭންކުގެ މުވައްޒަފުންނަކީ ކޮންމެ ކަމެއްގައިވެސް ނަމޫނާ ބައެއް ކަމަށާއި، އަދި ބީއެމްއެލް އަކީ ގައުމުގެ އިގްތިސާދު ބިނާކުރުމުގައި އެންމެ އިސްދައުރެއް އަދާކުރަމުންދާ އެއް ކުންފުނި ކަމަށް ޝަރީފް ވިދާޅުވިއެވެ.
ބީއެމްއެލް އިން ވަނީ ކުޑަކުދިންނަށް އަމާޒުކޮށްގެން ބީއެމްއެލް ކިޑްސް ސޭވަރ ޕްރޮމޯޝަނެއް މި މަ މަހުގެ އެއްވަނަ ދުވަހު ފަށާފައެވެ. ޕްރޮމޯޝަންގެ މުއްދަތުގައި ކިޑްސް ސޭވަރ އެކައުންޓް ހުޅުވާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް 15،000 ރުފިޔާ ދިނުމަށްވަނީ ހަމަޖެހިފައެވެ. އަދި އިތުރު 3 ފަރާތަކަށް 5،000 ރުފިޔާވެސް ލިބިގެން ދާނެއެވެ.
950 އަށްވުރެ ގިނަ މުވައްޒަފުން ބީއެމްއެލްގައި މަސައްކަތް ކުރަމުންދެއެވެ.
